ଭୁବନେଶ୍ୱର,୨୦।୨(ବ୍ୟୁରୋ): ଭୁବନେଶ୍ୱର ରସୁଲଗଡ଼ ଅଞ୍ଚଳରେ ଥିବା ଏକ ନମ୍ବର ବିହୀନ କାର୍ରୁ ଜଣେ ନାବାଳିକାଙ୍କ ସହ ୪ ଯୁବକଙ୍କୁ ଶନିବାର ମଞ୍ଚେଶ୍ୱର ଥାନା ପୋଲିସ ଧରିଥିଲା। ସେମାନଙ୍କୁ ଥାନାରେ ଅଟକ ରଖି ପଚରାଉଚରା କରିବାବେଳେ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ଉକ୍ତ ନାବାଳିକା ଜଣକ ୬ ମାସ ତଳେ ଅପହରଣ ହୋଇଥିଲେ। ପୋଲିସ ଧରିଥିବା ୪ଜଣଙ୍କ ମଧ୍ୟରୁ ଅଶୋକ ଚାଣ୍ଡେଲିଆ ନାମକ ଜଣେ ଯୁବକ ତାଙ୍କୁ ଅପହରଣ କରି ଭୁବନେଶ୍ୱର ନେଇ ଆସିଥିଲେ। ଏନେଇ ପଶ୍ଚିମବଙ୍ଗ ଲୁଚିପଡ଼ା ଥାନାରେ ଏନେଇ ଅପହରଣ ମାମଲା ରୁଜୁ ହୋଇଥିବା ପୋଲିସ ଜାଣିବା ପରେ ଉକ୍ତ ରାଜ୍ୟର ପୋଲିସ ବିଭାଗ ସହ ଯୋଗାଯୋଗ କରିଥିଲା। ରବିବାର ପଶ୍ଚିମବଙ୍ଗ ପୋଲିସ ଭୁବନେଶ୍ୱରରେ ପହଞ୍ଚତ୍ ସମସ୍ତଙ୍କୁ ପଚରାଉଚରା କରିବା ପରେ ଉକ୍ତ ନାବାଳିକାଙ୍କ ସହ ୪ ଯୁବକଙ୍କୁ ସାଙ୍ଗରେ ନେଇଯାଇଛି। ତେବେ ଅନ୍ୟ ୩ ଯୁବକ ଅଶୋକଙ୍କ ସାଙ୍ଗ ବୋଲି ଜଣାପଡ଼ିଛି। ଅଭିଯୁକ୍ତ ଅଶୋକ ୨୦୨୨ ଅଗଷ୍ଟରୁ ଉକ୍ତ ନାବାଳିକାଙ୍କୁ ଭୁବନେଶ୍ୱର ଆଣିବା ପରେ ଉଭୟ ଏକ ଭଡାଘର ନେଇ ରହୁଥିଲେ। ଅନ୍ୟପକ୍ଷରେ ନାବାଳିକା ଜଣକ ନିଜ ଇଚ୍ଛାରେ ଅଶୋକଙ୍କ ସହ ପଳାଇ ଆସିଥିଲେ ବୋଲି ପୋଲିସକୁ କହିଛନ୍ତି।
ସୂଚନାଯୋଗ୍ୟ, ଶନିବାର ରାତି ପ୍ରାୟ ୧୦ଟା ୩୦ରେ ନାବାଳିକାଙ୍କ ସହ ୪ଜଣ ଯୁବକ ଏକ ନମ୍ବରବିହୀନ କାର୍ରେ ରସୁଲଗଡ଼ରୁ କଟକରୋଡ଼ ଆଡ଼େ ଯାଉଥିଲେ। ସେମାନେ କାର୍ର ଡୋର୍ ଖୋଲି ଗାଳିଗୁଲଜ କରୁଥିବାରୁ ଲୋକମାନେ ପୋଲିସକୁ ଖବର ଦେଇଥିଲେ। ୩ଟି ପିସିଆର୍ ଭ୍ୟାନ କାର୍କୁ ପିଛା କରି ବମିଖାଲ ନିକଟରେ ସେମାନଙ୍କୁ ଅଟକାଇ ଥାନାକୁ ନେଇଥିଲା।
