ବେଜିଂ,୩।୪: ୨ ବର୍ଷ ହେଲା ଚାଇନାରେ ଜନ୍ମହାର କମିବାରେ ଲାଗିଛି। ଫଳରେ ଦେଶର ଜନସଂଖ୍ୟା ହ୍ରାସ ପାଇଛି। ଏହାକୁ ଦୃଷ୍ଟିରେ ରଖି ଜନସଂଖ୍ୟାରେ ସନ୍ତୁଳନ ଆଣିବା ଲାଗି ଚାଇନାର ୯ଟି କଲେଜ ଏକ ନିଆରା ଅଭିଯାନ ଆରମ୍ଭ କରିଛନ୍ତି। କଲେଜରେ ପାଠ ପଢ଼ୁଥିବା ଛାତ୍ରୀଛାତ୍ରଙ୍କୁ ‘ଟୁ ଫଲ୍ ଇନ୍ ଲଭ୍’ ବା ‘ପ୍ରେମରେ ପଡ଼ିବା ପାଇଁ’ ଗୋଟିଏ ସପ୍ତାହର ଛୁଟି ଦିଆଯାଇଛି। ମାର୍ଚ୍ଚ ୨୧ରେ ପ୍ରଥମକରି ମିଆନାଙ୍ଗ ଫ୍ଲାଇଂ ଭୋକେଶନାଲ କଲେଜ ରୋମାନ୍ସକୁ ଫୋକସ୍ କରି ଏହି ନିଆରା ଅଭିଯାନର ଘୋଷଣା କରିଥିଲା।
୭ ଦିନିଆ ଛୁଟିରେ ଛାତ୍ରୀଛାତ୍ର ପ୍ରକୃତିକୁ ଭଲପାଇବା ଏବଂ ବସନ୍ତ ଋତୁକୁ ମନଭରି ଉପଭୋଗ କରିବା ପାଇଁ କଲେଜ କର୍ତ୍ତୃପକ୍ଷଙ୍କ ତରଫରୁ କୁହାଯାଇଛି। ତେବେ ଏହି ଛୁଟି ଛାତ୍ରୀଛାତ୍ରଙ୍କୁ ଅବସାଦରେ ପକାଇବ ନାହିଁ, ବରଂ ଶିକ୍ଷା କ୍ଷେତ୍ରରେ ସହାୟକ ହେବ ବୋଲି ମିଆନାଙ୍ଗ ଫ୍ଲାଇଂ ଭୋକେଶନାଲ କଲେଜର ଡେପୁଟି ଡିନ୍ ଲିଆଙ୍ଗ ଜୁଓହୁଇ କହିଛନ୍ତି। ପିଲାମାନେ ଛୁଟିକୁ କିପରି କାଟିଲେ ସେ ନେଇ ହୋମଓ୍ବର୍କ ମଧ୍ୟ ଦିଆଯାଇଛି। ନିଜ ଅନୁଭୂତି ଡାଏରୀରେ ଲେଖିବା ସହ ଯାତ୍ରାବେଳେର ଭିଡିଓ କରିବା ପାଇଁ କୁହାଯାଇଛି।
ଜନସଂଖ୍ୟା ବୃଦ୍ଧି ଦିଗରେ ଏହି ନିଆରା ଅଭିଯାନ ଉପକାରୀ ସାବ୍ୟସ୍ତ ହେବ ବୋଲି ବିଶେଷଜ୍ଞ କହିଛନ୍ତି। ଜନ୍ମହାର ବୃଦ୍ଧି ସକାଶେ ସରକାରଙ୍କ ତରଫରୁ ୨୦ରୁ ଊର୍ଦ୍ଧ୍ୱ ଯୋଜନା ପ୍ରସ୍ତୁତ କରାଯାଇଥିବାବେଳେ ସେଥିରୁ କିଛି ସୁଫଳ ମିଳି ନ ଥିଲା। ୧୯୮୦ରୁ ୨୦୧୫ ମଧ୍ୟରେ ଦେଶରେ ଏକ-ଶିଶୁ ନୀତି ଯୋଗୁ ବର୍ତ୍ତମାନ ସମୟରେ ଚାଇନା ଜନସଂଖ୍ୟା ଦ୍ରୁତ ହ୍ରାସ ପାଇବାରେ ଲାଗିଛି। ଗତବର୍ଷ ଦେଶରେ ଜନ୍ମହାର ପ୍ରତି ୧୦୦୦ରେ ୬.୭୭ ଥିବାବେଳେ ୨୦୨୧ରେ ଏହା ୭.୫୨ ରହିଥିଲା। ଦୁଇବର୍ଷ ପୂର୍ବରୁ ସରକାର ଶିଶୁ ନୀତିରେ ପରିବର୍ତ୍ତନ କରି ପ୍ରତ୍ୟେକ ଦମ୍ପତିଙ୍କ ପାଇଁ ୩ ଶିଶୁ ଜନ୍ମ କରିବାର ନୂଆ ନିୟମ ଲାଗୁ କଲେ। କମ୍ ରୋଜଗାର ସାଙ୍ଗକୁ ଚାଇଲ୍ଡ କେୟାର ଏବଂ ଶିକ୍ଷା ମୂଲ୍ୟ ବୃଦ୍ଧି ପାଇଁ ଦମ୍ପତିମାନେ ପିଲା ଜନ୍ମ କରିବା ଲାଗି ଅନିଚ୍ଛା ପ୍ରକାଶ କରିଥିଲେ। ଅନ୍ୟପକ୍ଷେ ମାତୃତ୍ୱକାଳୀନ ଛୁଟିରେ ରହୁଥିବା କର୍ମଚାରୀଙ୍କୁ ପିପୁଲ୍ସ ପଲିଟିକାଲ୍ କନ୍ସଲ୍ଟିଭ୍ କନ୍ଫରେନ୍ସ (ସିପିପିସିସି) ଦରମା ଦେବା ଲାଗି ଏନ ନୂଆ ନୀତି ପ୍ରଣୟନ କରିଥିଲା। ଜନ୍ମହାର ବୃଦ୍ଧି ପାଇଁ ନିଆଯାଇଥିବା ପଦକ୍ଷେପ ଫଳପ୍ରଦ ନ ହେବାରୁ ୨୦୨୨ରେ ଚାଇନା ଜନସଂଖ୍ୟା କମିଥିଲା, ଯାହାକି ୬୦ ବର୍ଷରେ ପ୍ରଥମ।
