ମହଲ ପରି ଏକ ବଡ଼ ବଙ୍ଗଳା, ଚାକର ଚାକରାଣୀ, ଅୟସ ଭରା ଜୀବନର ସ୍ବପ୍ନ ତ ସମସ୍ତେ ଦେଖନ୍ତି। ହେଲେ ଏ ସ୍ବପ୍ନ କେବଳ ସ୍ବପ୍ନ ହୋଇ ରହିଯାଏ ଅନେକଙ୍କ ପାଇଁ। ହେଲେ ଜାଣି ଆଶ୍ଚର୍ଯ୍ୟ ହେବେ ଏଭଳି ଅୟସଭରା ଜୀବନ ଏକ କୁକୁର ବିତାଉଛି। ସେ ଏତେ ଧନୀ ଯେ, ତା’ ଅୟସଭରା ଜୀବନକୁ ନେଇ ଏବେ ଫିଲ୍ମ ବି କରାଯାଇଛି। ଏହି କୁକୁରଟିର ନାମ ହେଉଛି ଗୁନ୍ଥର ୬। ଏହାର ସମ୍ପତ୍ତି କେତେ ଜାଣନ୍ତି? ଏହି ଜର୍ମାନ ଶେଫର୍ଡ ପ୍ରଜାତିର କୁକୁରଟି ହେଉଛି ୬୫୫ କୋଟି ଟଙ୍କାର ମାଲିକ। ଇଟାଲିରେ ରହୁଥିବା ଏହି କୁକୁରର ଅୟସ ଜୀବନକୁ ଦେଖିଲେ ସତରେ ଯେକୌଣସି ମଣିଷ ଇର୍ଷା କରିବେ। ଗୁନ୍ଥର ୬ ଏବେ ମଡୋନାଙ୍କ ପୂର୍ବ ଘରେ ବେଶ୍ ଆରାମଦାୟକ ଜୀବନ ବିତାଉଛି। ଆଉ ତା’ ଜୀବନ କାହାଣୀ ଉପରେ ଏକ ଡକ୍ୟୁମେଣ୍ଟାରୀ ଚଳଚ୍ଚିତ୍ର ବି କରାଯାଉଛି ଯାହାର ନାଁ, ‘ଗୁନ୍ଥର ମିଲିୟନ୍ସ’ ରଖାଯାଇଛି। ଚଳଚ୍ଚିତ୍ରଟି ନେଟଫ୍ଲିକ୍ସରେ ଖୁବ୍ ଶୀଘ୍ର ରିଲିଜ ହେବାକୁ ଯାଉଛି। ଚଳଚ୍ଚିତ୍ରରେ ଗୁନ୍ଥର ଧନୀ ହେବାର ରହସ୍ୟ ଓ ତା’ର ଅୟସଭରା ଗ୍ଲାମର୍ସ ଲାଇଫ୍ ଉପରେ ଚିତ୍ରଣ କରାଯାଇଛି। ଫିଲ୍ମର ନିର୍ଦ୍ଦେଶକ ଅରେଲିୟନ ଲେଟର୍ଗି କୁହନ୍ତି, ‘ଆମେ ଏହି କୁକୁର ସମ୍ପର୍କରେ ଯେବେ ଜାଣିଲୁ ତା’ର ଜୀବନଶୈଳୀ କିଭଳି ହୋଇଥିବ ସେ ସମ୍ପର୍କରେ ସବିଶେଷ ଜାଣିବାକୁ ଇଛା ହୋଇଥିଲା। ତେଣୁ ତା’ ସମ୍ପର୍କରେ ସବୁ ତଥ୍ୟ ସଂଗ୍ରହ କଲୁ। ଆମ ଚଳଚ୍ଚିତ୍ରରେ ତା’ର କାହାଣୀକୁ ବେଶ୍ ସୁନ୍ଦରଭାବେ ଉପସ୍ଥାପନ କରାଯାଇଛି। ଗୁନ୍ଥରକୁ ଜର୍ମାନୀର କାଉଣ୍ଟେସ୍ କାରଲୋଟା ଲିଏମ୍ବଷ୍ଟେନ୍ଙ୍କ ପୁଅର ନାଁ ଗୁନ୍ଥରଙ୍କ ନାମାନୁସାରେ ନାମିତ କରାଯାଇଥିଲା। ଯେକି କୌଣସି କାରଣରୁ ଆତ୍ମହତ୍ୟା କରିଥିଲେ। ଲିଏମ୍ବଷ୍ଟେନ୍ଙ୍କର ନିଜର ବୋଲି ଆଉ କେହି ନ ଥିଲେ। ସେଥିପାଇଁ ସେ ୧୯୯୨ରେ ନିଜ ମୃତ୍ୟୁ ପୂର୍ବରୁ ଏକ ଟ୍ରଷ୍ଟ ଗଠନ କରିଥିଲେ। ଆଉ ନିଜର ପ୍ରିୟ କୁକୁର ନାଁରେ ୬୫୫ କୋଟି ଟଙ୍କାର ସମ୍ପତି କରାଇଦେଲେ। ତା’ଛଡା ଗୁନ୍ଥର ଏକ ଫାର୍ମାସ୍ୟୁଟିକାଲ କମ୍ପାନୀର ମାଲିକ ମଧ୍ୟ।’
