କେନ୍ଦ୍ରାପଡ଼ା ଅଫିସ, ୧୨।୪: ଗ୍ରାମାଞ୍ଚଳରେ ଖରାଦିନ ପାଇଁ ଅଗ୍ନିକାଣ୍ଡ ବଢ଼ୁଛି। ତେବେ ଏହି ବିପଦ ଏବେ କେନ୍ଦ୍ରାପଡ଼ା ଜିଲାର ସହରାଞ୍ଚଳ ପାଇଁ ଏକ ଆଶଙ୍କାରେ ପରିଣତ ହୋଇଛି। ମଲ୍ଗୁଡ଼ିକୁ ନୋଟିସ ଦିଆଯାଇଥିଲେ ମଧ୍ୟ ଅଗ୍ନି ନିରାପତ୍ତା ନେଇ କେହି ସତର୍କ ନୁହନ୍ତି। ସରକାରୀ ଓ ବେସରକାରୀ କୋଠା ମଧ୍ୟ ସୁରକ୍ଷିତ ନୁହେଁ। ଦଲକାଏ ନିଅଁାରେ ଧନ ଜୀବନ ନଷ୍ଟ ହୋଇଯିବ ବୋଲି ବୁଦ୍ଧିଜୀବୀମାନେ ଉଦ୍ବେଗ ପ୍ରକାଶ କରିଛନ୍ତି।
ଏ ସମ୍ପର୍କରେ ବୁଦ୍ଧିଜୀବୀ ଗଣେଶ ଚନ୍ଦ୍ର ସାମଲ, ମୀର ଆବୁ ଓବେଦା, ଆଶିଷ କୁମାର ସେନାପତି କହିଛନ୍ତି, ୨୦୨୦ ସେପ୍ଟେମ୍ବରରେ କେନ୍ଦ୍ର ସରକାରଙ୍କ ସୌରାଷ୍ଟ୍ର ମନ୍ତ୍ରଣାଳୟ ସଚିବ ଅଗ୍ନି ସୁରକ୍ଷା ବ୍ୟବସ୍ଥା ଯାଞ୍ଚ ପାଇଁ ପ୍ରତି ରାଜ୍ୟକୁ ଚିଠି କରିଥିଲେ। ଏହି ଚିଠି ଅନୁଯାୟୀ ମକ୍ ଡ୍ରିଲ ସହ ପ୍ରତି ୨ମାସରେ ଥରେ ସରକାରୀ ଓ ବେସରକାରୀ ଅନୁଷ୍ଠାନର ଅଗ୍ନି ସୁରକ୍ଷା ବ୍ୟବସ୍ଥା ଯାଞ୍ଚ ପାଇଁ ନିର୍ଦ୍ଦେଶ ଦେଇଥିଲେ। ତେବେ ଏହି ଚିଠି ଜିଲାରେ କାର୍ଯ୍ୟକାରୀ ହେଉନାହିଁ। କେନ୍ଦ୍ର ସରକାର ଦେଶରେ ଉଜଳା ଯୋଜନା ପ୍ରଚଳନ ପରେ ରନ୍ଧନ ପାଇଁ ଗ୍ୟାସ କନେକ୍ଶନ ଅହେତୁକ ଭାବେ ବୃଦ୍ଧି ପାଇଛି। ପ୍ରତି ବିତରକ ହିତାଧିକାରୀଙ୍କୁ ଗ୍ୟାସ ସମ୍ପର୍କରେ ଅବଗତ ପାଇଁ ସଚେତନତା କାର୍ଯ୍ୟକ୍ରମ କରାଇବା କଥା। ଏ ନେଇ ଚୁକ୍ତିପତ୍ରରେ ଉଲ୍ଲେଖ ଥିଲେ ମଧ୍ୟ ବିତରକ ଏହି ନିୟମକୁ କେବଳ କାଗଜପତ୍ରରେ ସୀମିତ ରଖିଛନ୍ତି। ସେହିପରି ଜିଲାରେ ବହୁ ଘରୋଇ ଚିକିତ୍ସାଳୟ ଓ ଶିକ୍ଷାନୁଷ୍ଠାନ ଖୋଲାଯାଇଛି। ଏହି ଅନୁଷ୍ଠାନଗୁଡ଼ିକୁ ଅଗ୍ନି ସୁରକ୍ଷା ବଳ ମଧ୍ୟରେ ରଖିବା ପାଇଁ ନିୟମ ରହିଥିଲେ ମଧ୍ୟ କର୍ତ୍ତୃପକ୍ଷ ଅବଜ୍ଞା କରୁଛନ୍ତି। ସରକାରୀ କାର୍ଯ୍ୟାଳୟରେ ମଧ୍ୟ ଏପରି ଅବସ୍ଥା ଦେଖିବାକୁ ମିଳୁଛି। କେନ୍ଦ୍ରାପଡ଼ା ଜିଲାରେ ଅଗ୍ନି ସୁରକ୍ଷା ବ୍ୟବସ୍ଥାକୁ ସରକାରୀ, ବେସରକାରୀ ଅନୁଷ୍ଠାନ ଓ କାର୍ଯ୍ୟାଳୟରେ ଅଣଦେଖା କରାଯାଉଥିବା ଅଭିଯୋଗ ହେଉଛି। ସାଧାରଣ ଚଳପ୍ରଚଳ କରୁଥିବା ସରକାରୀ ଓ ବେସରକାରୀ ଅନୁଷ୍ଠାନଗୁଡ଼ିକ ଏହି ବ୍ୟବସ୍ଥା ପ୍ରତି ଆଖି ବୁଜି ଦେଇଛନ୍ତି। ଜିଲାପାଳଙ୍କ କାର୍ଯ୍ୟାଳୟ, କୋର୍ଟ ଆଦିରେ ଉପଯୁକ୍ତ ପରିମାଣରେ ଅଗ୍ନି ନିର୍ବାପକ ବ୍ୟବସ୍ଥା ନାହିଁ। ସେହିପରି ଜିଲାରେ ବହୁ ଘରୋଇ ବିଦ୍ୟାଳୟ, ମହାବିଦ୍ୟାଳୟ କର୍ତ୍ତୃପକ୍ଷ ଏ ନେଇ ସଚେତନ ନାହାନ୍ତି। ଜିଲା ପ୍ରଶାସନ ଏଥିପ୍ରତି ଧ୍ୟାନ ଦେବାକୁ ସେମାନେ ଦାବି କରିଛନ୍ତି। ଏ ସମ୍ପର୍କରେ ସହକାରୀ ଅଗ୍ନିଶମ ଅଧିକାରୀ ନରେନ କୁମାର ମହାନ୍ତିଙ୍କୁ ପଚାରିବାରେ ଅଗ୍ନିକାଣ୍ଡ ଧନ ଜୀବନ ପ୍ରତି ବିପଦ। ନିମିଷକରେ ଏହା ବହୁ କ୍ଷତି ପହଞ୍ଚାଇଥାଏ। ଏ ନେଇ ବିଭାଗ ପକ୍ଷରୁ ଗତ ବର୍ଷକ ମଧ୍ୟର ୩୦ରୁ ଊର୍ଦ୍ଧ୍ୱ ସଚେତନତା କାର୍ଯ୍ୟକ୍ରମ ଜିଲା ମୁଖ୍ୟ ଚିକିତ୍ସାଳୟ ସମେତ କେତେଗୋଟି ଶିକ୍ଷାନୁଷ୍ଠାନରେ ହୋଇଛି। ଗ୍ୟାସ ବିତରକ ସଂସ୍ଥା ଏହି ସଚେତନତା କାର୍ଯ୍ୟକ୍ରମକୁ ଅଣଦେଖା କରିବା ଠିକ୍ ନୁହେଁ। ସହର ମଧ୍ୟରେ ଥିବା ମଲ୍ଗୁଡ଼ିକୁ ଏ ନେଇ ନୋଟିସ ହୋଇଛି। ଜିଲାର ବିଭିନ୍ନ ଅନୁଷ୍ଠାନକୁ ନୋଟିସ ଯାଇଥିବା ବେଳେ ୨୦୦ରୁ ଅଧିକ ଅନୁଷ୍ଠାନ ଏହି ନିରାପତ୍ତା ବ୍ୟବସ୍ଥା ପ୍ରତି ଧ୍ୟାନ ଦେବା ଆବଶ୍ୟକ ବୋଲି ମହାନ୍ତି କହିଛନ୍ତି।
