ବାରଙ୍ଗ,୨୩ା୨(ଡି.ଏନ୍.ଏ.): ଏବେଠୁ ଧୀରେ ଧୀରେ ଗ୍ରୀଷ୍ମପ୍ରବାହ ଆରମ୍ଭ ହେଲାଣି। ଏହାକୁ ଦୃଷ୍ଟିରେ ରଖି ନନ୍ଦନ କାନନରେ ବନ୍ୟପ୍ରାଣୀଙ୍କ ସୁରକ୍ଷା ପାଇଁ ଆଗୁଆ ପଦକ୍ଷେପ ଗ୍ରହଣ କରାଯାଇଛି। ପ୍ରାଣୀ ଉଦ୍ୟାନର ୨୧୩ ଖୁଆଡ଼ରେ ରହୁଥିବା ୧୬୨ ପ୍ରଜାତିର ୩୮୭୨ ଜୀବଜନ୍ତୁଙ୍କ ସୁରକ୍ଷା ପାଇଁ କର୍ତ୍ତୃପକ୍ଷ ଆଗୁଆ ଉଦ୍ୟମ ଆରମ୍ଭ କରିଛନ୍ତି। ଗ୍ରୀଷ୍ମତାପରେ ଯେମିତି ବନ୍ୟପ୍ରାଣୀ ପ୍ରଭାବିତ ନ ହୁଅନ୍ତି, ସେଥିପାଇଁ ଜୀବଜନ୍ତୁମାନେ ରହୁଥିବା ବାସସ୍ଥଳୀକୁ ବାଉଁଶତାଟ ଓ ନଡ଼ାଛପର କରାଯିବା ସହିତ ନିୟମିତ ବ୍ୟବଧାନରେ ପାଣି ଛିଞ୍ଚାଯିବ। ବିଭିନ୍ନ ଜୀବଜନ୍ତୁଙ୍କୁ ପିଇବାକୁ ଦିଆଯାଉଥିବା ପାଣିରେ ବରଫ ମିଶାଇବାର ବ୍ୟବସ୍ଥା ହେଉଛି। ସିମ୍ପାଞ୍ଜି ଓ ମାଙ୍କଡ଼ମାନଙ୍କୁ ପଇଡ଼ ପାଣି, ଭାଲୁ, ହାତୀ, ଜଳହସ୍ତୀ ଆଦି ଜନ୍ତୁଙ୍କ ପାଇଁ ତରଭୁଜ, ଆଖୁ ଆଦି ଶରୀରକୁ ଥଣ୍ଡା ରଖୁଥିବା ଫଳ ସମେତ ଖାଦ୍ୟ ପାନୀୟ ଦିଆଯିବାର ଯୋଜନା କରାଯାଉଛି। ଖୋଲା ଆକାଶ ତଳେ ରହୁଥିବା ଚଢ଼େଇ ଏନକ୍ଲୋଜରଗୁଡ଼ିିକୁ ଗ୍ରୀଷ୍ମ ପ୍ରକୋପରୁ ସୁରକ୍ଷା ପାଇଁ ଏନ୍କ୍ଲୋଜରରେ ଆଗ୍ରୋନେଟ୍ ବ୍ୟବସ୍ଥା କରାଯିବ। ଜୀବଜନ୍ତୁ ଗାଧୋଇବା ପାଇଁ ଉବ୍ଦିଷ୍ଟ ପାଣି ବାରମ୍ବାର ବଦଳାଯିବ। ଏହାସତ୍ତ୍ବେ ଯେଉଁ ଜୀବଜନ୍ତୁମାନେ କୌଣସି ସମୟରେ ହାଲିଆ ତଥା ଦୁର୍ବଳ ଅନୁଭବ କରିବେ ସେମାନଙ୍କ ଲାଗି ଇଲେକ୍ଟ୍ରୋରାଲ, ମଲ୍ଟି ଭିଟାମିନ ଟାବଲେଟ୍ ଆଦି ଦେବାର ବ୍ୟବସ୍ଥା କରାଯିବ। ଆବଶ୍ୟକ ପଡ଼ିିଲେ ଜନ୍ତୁ ଏନକ୍ଲୋଜରରେ ଏସି ଲଗାଯିବ। ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ଜୀବଜନ୍ତୁଙ୍କ ସୁରକ୍ଷା ଓ ସେମାନଙ୍କ ଦେଖାଶୁଣା ନିମନ୍ତେ ଜଣେ ବରିଷ୍ଠ ଚିକିତ୍ସକ, ଜଣେ ରେଞ୍ଜରଙ୍କ ସମେତ ୬ଜଣିଆ କର୍ମଚାରୀଙ୍କୁ ନେଇ ଏକଟିମ୍ ଗଠନ କରାଯାଇଛି। ଏହି ଟିମ୍ ଦିନ ତମାମ ସମସ୍ତ ଏନକ୍ଲୋଜର ବୁଲି ତଦାରଖ କରିବେ ବୋଲି ଜଣାପଡ଼ିଛି। ଆସନ୍ତା ମାର୍ଚ୍ଚ ପହିଲାରୁ ଏହା କାର୍ଯ୍ୟକାରୀ କରାଯିବ ବୋଲି ସୂଚନା ମିିଳିଛି।
