ଛତ୍ରପୁର,୧୬।୩(ଡି.ଏନ୍.ଏ.): ଗଞ୍ଜାମ ଜିଲା ହେଡକ୍ୱାର୍ଟର ଛତ୍ରପୁର ସହରରେ ପାନୀୟ ଜଳ ଅଭାବ ଦେଖାଦେଇଛି। ବିଶୁଦ୍ଧ ପାଣି ଟୋପାଏ ପାଇଁ ଏଠାରେ ଲଟେରି ପକାଇବାକୁ ପଡୁଛି। ଭାଗ୍ୟ ସାଥ୍ ଦେଲେ ଲଟେରି ଉଠିଲେ ଶୋଷ ମେଣ୍ଟାଇବାକୁ ପାଣି ମିଳୁଛି। ଏପରି ଦେଖିବାକୁ ମିଳିଛି ଛତ୍ରପୁର ଷ୍ଟେଶନରୋଡ ସାହିରେ। ଦିନକୁ ଥରେ ମାତ୍ର ଷ୍ଟାଣ୍ଡପୋଷ୍ଟରେ ଆସୁଥିବା ପାଣି ନେବାକୁ ମହିଳାମାନଙ୍କ ମଧ୍ୟରେ ଗଣ୍ଡଗୋଳ ହେଉଥିବାରୁ ଏପରି କରାଯାଇଛି। ଲଟେରି ସିରିୟଲ ନମ୍ବର ଅନୁସାରେ ମହିଳାମାନେ ପାଣି ନେଉଛନ୍ତି। ଷ୍ଟାଣ୍ଡପୋଷ୍ଟରେ ପାଣି ଆସିବା ବନ୍ଦ ହୋଇଗଲେ ପାଖରେ ନମ୍ବର ଥାଇ ବି ନିରାଶରେ ଫେରିବାକୁ ପଡ଼ୁଛି।
ଷ୍ଟେଶନରୋଡ ସାହିରେ ୨୦ରୁ ୨୫ ପରିବାର ରହୁଛନ୍ତି। ଏଥିସହ ଦୈନିଦିନ ବଡ଼ଷ୍ଟେଶନ ନିକଟକୁ ମଧ୍ୟ ଯାତ୍ରୀ ଆସିଥାନ୍ତି। ହେଲେ ଏଠାରେ ପାନୀୟ ଜଳ ସଙ୍କଟ ଲାଗିରହିଛି। ସାହି ବାସିନ୍ଦା ବାରମ୍ବାର ଏ ନେଇ ପ୍ରଶାସନକୁ ଜଣାଉଥିଲେ ବି ସୁଫଳ ମିଳୁନି। ଚଳିତବର୍ଷ ଏବେଠୁ ଗ୍ରୀଷ୍ମ ପ୍ରବାହ ନାକେଦମ୍ କଲାଣି। ଏଭଳି ସ୍ଥିତିରେ ପାଣିର ଆବଶ୍ୟକତା ବଢିଯାଇଛି। ଷ୍ଟାଣ୍ଡପୋଷ୍ଟରେ ମାତ୍ର ୧୫ ମିନିଟ ପାଇଁ ପାଣି ଆସୁଛି। ଏହି କମ୍ ସମୟ ମଧ୍ୟରେ ପାଣି ନେବାକୁ ମହିଳାମାନଙ୍କ ମଧ୍ୟରେ ହେଉଥିବା ଗଣ୍ଡଗୋଳକୁ ଏଡାଇବା ପାଇଁ ସ୍ଥାନୀୟ ଲୋକଙ୍କ ଦ୍ୱାରା ପ୍ରତିଦିନ ଲଟେରି ଉଠାଣ କରାଯାଉଛି। ଯାହାର ୧ ନମ୍ବର ସେ ପ୍ରଥମେ ନେବା ପରେ ସିରିୟଲ ଅନୁସାରେ ଅନ୍ୟମାନେ ଷ୍ଟାଣ୍ଡପୋଷ୍ଟକୁ ଆସୁଛନ୍ତି। ସ୍ଥାନୀୟ ବାସିନ୍ଦା ସୁଷମା ପାଢ଼ୀ କହିଛନ୍ତି, ୨ ବର୍ଷ ପୂର୍ବେ ଘରକୁ ପାଣି ପାଇପ ସଂଯୋଗ ପାଇଁ ଜନସ୍ବାସ୍ଥ୍ୟ ବିଭାଗ ପକ୍ଷରୁ ରସିଦ କଟାଯାଇଥିଲା। ହେଲେ ଏ ପର୍ଯ୍ୟନ୍ତ ପାଇପ୍ ସଂଯୋଗ ହୋଇନି। ଏ ନେଇ ବାରମ୍ବାର ଜେଇଙ୍କ ଦୃଷ୍ଟିଆକର୍ଷଣ କରିଛୁ। ମାତ୍ର ସମସ୍ୟା ସମାଧାନ କରାଯାଉନାହିଁ। ସେହିପରି ବାସିନ୍ଦା ଆର. ଲଛମି କହିଛନ୍ତି, ଜଣଙ୍କୁ ୨ ହାଣ୍ଡି ପାଣି ମିଳୁନି। ପ୍ରଶାସନକୁ ଅଭିଯୋଗ କରୁଛୁ, କେହି ଆସୁନାହାନ୍ତି। ଏ ସମ୍ପର୍କରେ ଏନ୍ଏସି ନିର୍ବାହୀ ଅଧିକାରୀ ଏନ. ଗଣେଶ ବାବୁଙ୍କୁ ପଚାରିବାରେ ଷ୍ଟେଶନରୋଡ୍ ଅଞ୍ଚଳର ପାନୀୟ ଜଳ ସମସ୍ୟା ବିଷୟ ଜନସ୍ବାସ୍ଥ୍ୟ ବିଭାଗୀୟ ଅଧିକାରୀଙ୍କ ଦୃଷ୍ଟିକୁ ଆଣିଥିବା କହିଛନ୍ତି। ଖୁବଶୀଘ୍ର ସମସ୍ୟା ସମାଧାନ କରାଯିବ ବୋଲି ସେ ଜଣାଇଛନ୍ତି।
