ନନ୍ଦପୁର/ପାଡୁଆ, ୧୧।୫ (ତୁଷାରକାନ୍ତ ମହାନ୍ତି/ଶଙ୍କର ପୂଜାରୀ): ଲିଆଖିଆ ଉତ୍ସବ ଦେଖିବାକୁ ଆସିଥିବା ଜଣେ ଯୁବକଙ୍କ ବାଇକ (ନମ୍ବର- OD 10 Q 4739) କେହି ଦୁର୍ବୃତ୍ତ ଚୋରି କରି ନେଇଥିବା ଅଭିଯୋଗ ହୋଇଛି। ଏନେଇ ଯୁବକ ଜଣକ ସୋମବାର ପାଡୁଆ ଥାନାରେ ଲିଖିତ ଏତଲା ଦେବା ପରେ ପୋଲିସ ମାମଲା ରୁଜୁ କରି ତଦନ୍ତ ଚଳାଇଥିବା ସୂଚନା ମିଳିଛି।
ସୂଚନା ମୁତାବକ, ରବିବାର ରାତିରେ ପାନ୍ଥଲୁଙ୍ଗ ଗ୍ରାମରେ ଲିଆଖିଆ ଉତ୍ସବ ଅନୁଷ୍ଠିତ ହୋଇଥିଲା। ଏହି ଉତ୍ସବ ଦେଖିବା ପାଇଁ ସିଡିପୁଟ ଗ୍ରାମର ଦଶରଥ ତାଙ୍ଗୁଲୁ ନିଜ ବାଇକ୍ରେ ଆସିଥିଲେ। ଉତ୍ସବ ରାତି ତମାମ ଚାଲିଥିବା ବେଳେ ସକାଳୁ ସେ ନିଜ ବାଇକ ରଖିଥିବା ସ୍ଥାନରେ ପାଇ ନ ଥିଲେ। ଗ୍ରାମବାସୀଙ୍କ ସହ ବହୁ ଖୋଜାଖୋଜି କରିବା ପରେ ମଧ୍ୟ ବାଇକ ନମିଳିବାରୁ ଶେଷରେ ସେ ପାଡୁଆ ଥାନାରେ ଅଭିଯୋଗ କରିଥିଲେ।
ଉଲ୍ଲେଖଯୋଗ୍ୟ ଯେ, ଦୁଇ ମାସ ତଳେ ପାଡୁଆ ସଦର ମହକୁମାରୁ ମାତ୍ର ଦୁଇ ଦିନରେ ଦୁଇଟି ବାଇକ ଓ ଗୋଟିଏ ସ୍କୁଟି ଚୋରି ହୋଇଥିଲା। ମାତ୍ର ବର୍ତ୍ତମାନ ସୁଦ୍ଧା ପୋଲିସ ସେହି ଚୋରି ଘଟଣାର କୌଣସି ସୂଚନା ପାଇପାରି ନାହିଁ। ବାରମ୍ବାର ବାଇକ ଚୋରି ହେଉଥିବାରୁ ଜନସାଧାରଣରେ ଅସନ୍ତୋଷ ପ୍ରକାଶ ପାଇଛି। ପୋଲିସ ପ୍ରତି ଲୋକଙ୍କ ଆସ୍ଥା ବଜାୟ ରଖିବା ପାଇଁ ଏହି ଘଟଣାର ତୁରନ୍ତ ତଦନ୍ତ କରିବାକୁ ଅଞ୍ଚଳର ବୁଦ୍ଧିଜୀବୀମାନେ ଦାବି କରିଛନ୍ତି।
