ଅପଚୟ କଲେ କମ୍‌ ମିଳିବ

ନୂଆଦିଲ୍ଲୀ,୯ା୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟଗୁଡ଼ିକୁ ସାବାଳକଙ୍କ ପାଇଁ ମାଗଣାରେ ଟିକା ଦିଆଯିବ ବୋଲି ଘୋଷଣା କରିବାର ଦିନକ ପରେ କେନ୍ଦ୍ର ସରକାରଙ୍କ ପକ୍ଷରୁ ନୂଆ ଗାଇଡ୍‌ଲାଇନ୍‌ ଜାରି କରାଯାଇଛି। କେଉଁ ରାଜ୍ୟକୁ କେତେ ଡୋଜ୍‌ ଆବଣ୍ଟନ କରାଯିବ ତାହା ଜନସଂଖ୍ୟା, ସଂକ୍ରମଣ ବୋଝ, ଟିକାକରଣରେ ଅଗ୍ରଗତି ଆଦିକୁ ଦୃଷ୍ଟିରେ ରଖି ସ୍ଥିର କରାଯିବ ବୋଲି ସରକାର ଏଥିରେ ସ୍ପଷ୍ଟ କରିଛନ୍ତି। ସେହିପରି ଭାକ୍ସିନ ଅପଚୟ ମଧ୍ୟ ଆବଣ୍ଟନ ଉପରେ ନକାରାମତ୍କ ପ୍ରଭାବ ପକାଇବ ବୋଲି ଏହି ମାର୍ଗଦର୍ଶିକାରେ ଚେତାଇ ଦିଆଯାଇଛି।
ନୂଆ ଭାକ୍ସିନ ଗାଇଡ୍‌ଲାଇନ୍‌ ଅନୁସାରେ କେନ୍ଦ୍ର ସରକାର ଉତ୍ପାଦନକାରୀ କମ୍ପାନୀଗୁଡ଼ିକଠାରୁ ରାଜ୍ୟଗୁଡ଼ିକର କୋଟା ବାବଦ ୨୫ ପ୍ରତିଶତ ଟିକାକୁ ମିଶାଇ ୭୫% ଭାକ୍ସିନ କିଣିବେ। ୧୮ରୁ ୪୪ ବର୍ଷୀୟଙ୍କ ପାଇଁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ କେନ୍ଦ୍ର ସରକାର ମାଗଣାରେ ଟିକା ଯୋଗାଇଦେବେ। ଏଥିପାଇଁ କୌଣସି ରାଜ୍ୟକୁ ଅର୍ଥ ପଇଠ କରିବାକୁ ପଡ଼ିବ ନାହିଁ। ତେବେ ସମ୍ପୃକ୍ତ ରାଜ୍ୟର ଜନସଂଖ୍ୟା, ସଂକ୍ରମିତଙ୍କ ସଂଖ୍ୟା, ଟିକାକରଣ କେତେ ବାଟ ଆଗେଇଛି ଓ କେତେ ପରିମାଣର ଭାକ୍ସିନ ଅପଚୟ ହୋଇଛି, ଏସବୁ ଆଧାରରେ ଟିକା ଯୋଗାଣ ନିର୍ଭର କରେ। ସେହିପରି ଦେଶର ଟିକା ଉତ୍ପାଦନକାରୀମାନଙ୍କୁ ଘରୋଇ ହସ୍ପିଟାଲଗୁଡ଼ିକୁ ପ୍ରତ୍ୟକ୍ଷ ଭାବେ ଭାକ୍ସିନ ଯୋଗାଣ ନେଇ ବିକଳ୍ପ ଦିଆଯିବ। ସମସ୍ତ ଘରୋଇ ହସ୍ପିଟାଲ ଟିକା ଉପରେ ସର୍ବାଧିକ ୧୫୦ ଟଙ୍କା ସର୍ଭିସ ଚାର୍ଜ ଲଗାଇପାରିବେ ବୋଲି ଜାରି କରାଯାଇଥିବା ସଦ୍ୟ ବିବୃତିରେ କେନ୍ଦ୍ର ସ୍ପଷ୍ଟ କରିଛି।
ରାଜ୍ୟ ବା କେନ୍ଦ୍ରଶାସିତ ଅଞ୍ଚଳକୁ କେତେ ପରିମାଣର ଟିକା ଯୋଗାଇଦିଆଯିବ ତାହା ସେମାନଙ୍କୁ ଆଗୁଆ ଅବଗତ କରାଯିବ। ଅନୁରୂପ ଭାବେ ରାଜ୍ୟଗୁଡ଼ିକ ଏହାକୁ ଦେଖି ଜିଲା ଓ ଟିକାକରଣ କେନ୍ଦ୍ରଗୁଡ଼ିକୁ ଭାକ୍ସିନ ଆବଣ୍ଟନ କରିବେ। ପାଖରେ କେତେ ଟିକା ଉପଲବ୍ଧ ରହିଛି ତାହା ସେମାନେ ସାର୍ବଜନୀନ କରିବେ। ଏହାସହ ଟିକାକୁ ସ୍ଥାନୀୟ ଲୋକଙ୍କ ସୁବିଧା ପାଇଁ ତୁରନ୍ତ ବିସ୍ତୃତ ଭାବେ ସବୁଆଡ଼େ ପଠାଇବେ। ରାଜ୍ୟଗୁଡ଼ିକ ପ୍ରଥମେ ସ୍ବାସ୍ଥ୍ୟକର୍ମୀ, ସମ୍ମୁଖ ଯୋଦ୍ଧା, ୪୫ ବର୍ଷରୁ ଊର୍ଦ୍ଧ୍ୱ ବୟସର ନାଗରିକ, ଦ୍ୱିତୀୟ ଡୋଜ୍‌ ନେବାକୁ ଅପେକ୍ଷା କରିଥିବା ବ୍ୟକ୍ତିଙ୍କୁ ଟିକାକରଣ ଉପରେ ପ୍ରାଥମିକତା ଦେବେ। ପରେ ୧୮ ବର୍ଷରୁ ଊର୍ଦ୍ଧ୍ୱ ବୟସ୍କଙ୍କୁ ଟିକା ଦିଆଯିବ। ନୂଆ ନିୟମ ଅନୁସାରେ ଆୟ ସ୍ଥିତି ନିର୍ବିଶେଷରେ ସମସ୍ତ ନାଗରିକ ମାଗଣା ଟିକା ପାଇବାକୁ ଯୋଗ୍ୟ। ଯେଉଁମାନେ ଏଥିପାଇଁ ଅର୍ଥ ପଇଠ କରିବାକୁ ସକ୍ଷମ ସେମାନେ ଘରୋଇ ହସ୍ପିଟାଲର ଟିକାକରଣ କେନ୍ଦ୍ରରେ ଟିକା ନେବା ଉଚିତ ବୋଲି ଏଥିରେ ଦର୍ଶାଯାଇଛି। ହସ୍ପିଟାଲଗୁଡ଼ିକ କେତେ ମୂଲ୍ୟରେ ଟିକା କିଣିବେ ତାହା ସମ୍ପୃକ୍ତ ଉତ୍ପାଦନକାରୀ କମ୍ପାନୀ ପକ୍ଷରୁ ଘୋଷଣା କରାଯିବ। ବର୍ତ୍ତମାନ ଘରୋଇ ହସ୍ପିଟାଲ ପାଇଁ କୋଭାକ୍ସିନ ଡୋଜ୍‌ ପିଛା ୧,୨୦୦ ଟଙ୍କା ରହିଥିବାବେଳେ କୋଭିଶିଲ୍ଡ୍‌ ଡୋଜ୍‌ ପ୍ରତି ୬୦୦ ଟଙ୍କା ରହିଛି। କିନ୍ତୁ କେନ୍ଦ୍ର ସରକାର ପ୍ରତି ଡୋଜ୍‌କୁ ୧୫୦ ଟଙ୍କାରେ କିଣିବେ।
ଅପଚୟକୁ ନେଇ ଦିଆଯାଇଥିବା ଚେତାବନୀକୁ ରାଜ୍ୟଗୁଡ଼ିକ ଭଲ ଦୃଷ୍ଟିରେ ଦେଖି ନ ପାରନ୍ତି। ବିଶେଷକରି ଯେଉଁ ରାଜ୍ୟଗୁଡ଼ିକ ଅଧିକ ପରିମାଣର ଭାକ୍ସିନ ନଷ୍ଟ କରୁଛନ୍ତି ସେମାନଙ୍କ ପାଇଁ ନୂଆ ଗାଇଡ୍‌ଲାଇନ୍‌ ସୁବିଧାଜନକ ହେବ ନାହିଁ ବୋଲି କୁହାଯାଉଛି। ଗତ ମାସରେ ଝାଡ଼ଖଣ୍ଡ କେନ୍ଦ୍ର ପକ୍ଷରୁ ଯୋଗାଇ ଦିଆଯାଇଥିବା ଟିକାର ୩୭% ଓ ଛତିଶଗଡ଼ ୩୦% ଅପଚୟ କରିଥିବା ଅଭିଯୋଗ ହୋଇଥିଲା। ଭାଜପା ଶାସିତ ମଧ୍ୟପ୍ରଦେଶରେ ୧୧% ଡୋଜ୍‌ ଟିକା ନଷ୍ଟ ହୋଇଥିଲା। ତେବେ ଉକ୍ତ ୩ ରାଜ୍ୟ ଏହି ତଥ୍ୟକୁ ତ୍ରୁଟିଯୁକ୍ତ ଦର୍ଶାଇବା ସହ ପ୍ରକୃତ ଅପଚୟ ୫% ବୋଲି କହିଥିଲେ।
ପ୍ରକାଶ ଯେ, ରାଜ୍ୟଗୁଡ଼ିକର ଲଗାତର ଦାବି ଓ ସୁପ୍ରିମକୋର୍ଟଙ୍କ ହସ୍ତକ୍ଷେପ ପରେ ସୋମବାର ପ୍ରଧାନମନ୍ତ୍ରୀ ମୋଦି ଦେଶର ସମସ୍ତ ନାଗରିକଙ୍କୁ ଆସନ୍ତା ୨୧ ତାରିଖରୁ ମାଗଣା ଟିକା ଦେବା ପାଇଁ ଘୋଷଣା କରିଥିଲେ। ୭ଟି କମ୍ପାନୀ ବିଭିନ୍ନ ପ୍ରକାର ଟିକା ଉତ୍ପାଦନ କରୁଛନ୍ତି ଏବଂ ଅନ୍ୟ ୩ ଭାକ୍ସିନର ଟ୍ରାଏଲ୍‌ ଆଡ୍‌ଭାନ୍ସଡ୍‌ ଷ୍ଟେଜ୍‌ରେ ରହିଛି। ସେହିପରି ପିଲାଙ୍କ ଟିକାକରଣ ନେଇ ୨ଟି ଭାକ୍ସିନ ଏବଂ ଗୋଟିଏ ନାଜାଲ ଭାକ୍ସିନ ଉପରେ ଗବେଷଣା ଜାରି ରହିଥିବା ମୋଦି କହିଥିଲେ। କେନ୍ଦ୍ର ସରକାର ଚଳିତ ବର୍ଷ ଶେଷ ସୁଦ୍ଧା ୧୦୮ କୋଟି ଭାରତୀୟଙ୍କୁ ଟିକା ଦେବା ପାଇଁ ଲକ୍ଷ୍ୟ ରଖିଛନ୍ତି। ସେଥିରୁ ମଙ୍ଗଳବାର ସକାଳ ସୁଦ୍ଧା ଦେଶରେ ପ୍ରାୟ ୨୩.୬ କୋଟି ଡୋଜ୍‌ ଟିକା ଦିଆଯାଇଛି।

୪୪ କୋଟି ଡୋଜ୍‌ ଅର୍ଡର

କେନ୍ଦ୍ର ସରକାର ମଙ୍ଗଳବାର କୋଭିଶିଲ୍ଡ ଓ କୋଭାକ୍ସିନ ଟିକାର ୪୪ କୋଟି ଡୋଜ୍‌ ଅର୍ଡର ଦେଇଛନ୍ତି। ଏଥିରୁ କୋଭିଶିଲ୍ଡ ନିର୍ମାତା ସିରମ୍‌ ଇନ୍‌ଷ୍ଟିଚ୍ୟୁଟ୍‌ ଅଫ ଇଣ୍ଡିଆକୁ ୨୫ କୋଟି ଓ କୋଭାକ୍ସିନ ପ୍ରସ୍ତୁତକାରୀ ଭାରତ ବାୟୋଟେକ୍‌କୁ ୧୯ କୋଟି ଡୋଜ୍‌ ଯୋଗାଇବାକୁ କୁହାଯାଇଛି। ଉତ୍ପାଦନକାରୀ ଦୁଇ କମ୍ପାନୀ ଆସନ୍ତା ଅଗଷ୍ଟରୁ ଡିସେମ୍ବର ମଧ୍ୟରେ ଏହା ଯୋଗାଇଦେବେ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ କହିଛି। ଜୁନ୍‌ ୨୧ ତାରିଖରୁ ୧୮ ବର୍ଷରୁ ଊର୍ଦ୍ଧ୍ୱ ବୟସ୍କ ନାଗରିକଙ୍କୁ ମାଗଣାରେ ଟିକା ଦିଆଯିବ। ଏଥିଲାଗି କେନ୍ଦ୍ର ସରକାର ୭୫% ଟିକା କିଣିବେ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘୋଷଣା କରିବାର ଦିନକ ପରେ ଏହି ଅର୍ଡର ଦିଆଯାଇଛି।

ପାର୍ଲାମେଣ୍ଟ ଅଧିବେଶନ ଡାକିବାକୁ କଂଗ୍ରେସର ଦାବି

କେନ୍ଦ୍ର ସରକାର ନିଜ ଭାକ୍ସିନ ନୀତିକୁ ନେଇ ପାର୍ଲାମେଣ୍ଟରେ ସ୍ପଷ୍ଟୀକରଣ ଦେବା ଆବଶ୍ୟକ। ଏଥିପାଇଁ ସଂସଦର ଅଧିବେଶନ ଡକାଯାଉ ବୋଲି ମଙ୍ଗଳବାର କଂଗ୍ରେସ ପକ୍ଷରୁ ଦାବି କରାଯାଇଛି। ସରକାର ଡେଡ୍‌ଲାଇନ୍‌ ଉପରେ ନୁହେଁ, ବରଂ ହେଡ୍‌ଲାଇନ୍‌ ଉପରେ ଗୁରୁତ୍ୱ ଦେଉଛନ୍ତି ବୋଲି ବରିଷ୍ଠ କଂଗ୍ରେସ ନେତା ଜୟରାମ ରମେଶ ସମାଲୋଚନା କରିଛନ୍ତି।
ଜୟରାମ କହିଛନ୍ତି, ସମସ୍ତ ଭାରତୀୟଙ୍କୁ ମାଗଣାରେ କୋଭିଡ୍‌ ଭାକ୍ସିନ ମିଳିବା ଉଚିତ। ଦେଶର ବହୁ ଲୋକଙ୍କ ପାଖରେ ଡିଜିଟାଲ ସୁବିଧା ନ ଥିବାରୁ କୋଓ୍ବିନ୍‌ ଆପ୍‌ ଜରିଆରେ ଟିକାକରଣକୁ ବାଧ୍ୟତାମୂଳକ କରା ନ ଯାଉ। କେଉଁ ରାଜ୍ୟକୁ କେତେ ଟିକା ଯୋଗାଣ କରାଯିବ ସେନେଇ ସ୍ବଚ୍ଛତା ରହିବା ଉଚିତ। ପାର୍ଲମେଣ୍ଟ ଅଧିବେଶନରେ ସରକାରଙ୍କ ଭାକ୍ସିନ ନୀତିର ଆଲୋଚନା କରାଯାଉ। ଏହାସହ ସମସ୍ତଙ୍କୁ ମାଗଣା ଟିକା ଦେବା ଲାଗି ଆବଶ୍ୟକ ବଜେଟକୁ ଅନୁମୋଦନ ନେଇ ମଧ୍ୟ ଅଧିବେଶନରେ ଚର୍ଚ୍ଚା ହେବା ଜରୁରୀ ବୋଲି ଜୟରାମ କହିଛନ୍ତି।


Enter your email to get our daily news in your inbox.

All Right Reserved By Dharitri.Com

ନିର୍ବାଚନରେ ଫାଇଦା ପାଇଁ ବିରୋଧୀ ଉସୁକାଉଛନ୍ତି ହିଂସା: କେଜରିଓ୍ବାଲ

ନୂଆଦିଲ୍ଲୀ,୧୮।୧୨: ନାଗରିକତା ସଂଶୋଧନ ଆଇନ ବିରୋଧରେ ରାଜଧାନୀରେ ନିଆଁ ଜଳୁଛି। ପ୍ରଦର୍ଶନକାରୀମାନେ ବିକ୍ଷୋଭ ପ୍ରଦର୍ଶନ କରିବା ସହ ଭଙ୍ଗାରୁଜା କରି ଜାତୀୟ ସମ୍ପତ୍ତି ନଷ୍ଟ କରୁଥିବା...

ଦେଶରେ ନୂଆ ଅଧ୍ୟାୟ ଆରମ୍ଭ ହୋଇଛି:ମୋଦି

ନୂଆଦିଲ୍ଲୀ,୨୨।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରାବାର ଦେଶକୁ ସମ୍ବୋଧିତ କରିଛନ୍ତି। ଏହି ଅବସରରେ ସେ କହିଛନ୍ତି, ଅକ୍ଟୋବର ୨୧ ରେ ଭାରତ ଏକ ଅସାଧାରଣ ଲକ୍ଷ୍ୟ...

ଇଣ୍ଡିଆନ୍‌ ଅଏଲ୍‌ ରିଫାଇନେରିରେ ଭୟଙ୍କର ଅଗ୍ନିକାଣ୍ଡ

ହଳଦିଆ,୨୧।୧୨- ପଶ୍ଚିମବଙ୍ଗର ହଳଦିଆରେ ଥିବା ଇଣ୍ଡିଆନ୍‌ ଅଏଲ୍‌ ରିଫାଇନାରିରେ ମଙ୍ଗଳବାର ଅପରାହ୍ନ ୩ଟାରେ ଭୟାବହ ଅଗ୍ନିକାଣ୍ଡ ଘଟିଛି। ଏଥିରେ ୩ ଜଣଙ୍କ ମୃତ୍ୟୁ ଘଟିଥିବାବେଳେ ୪୪...

ଝାଡୁ ଧରି ହସ୍ପିଟାଲ ଚଟାଣ ସଫା କଲେ ମନ୍ତ୍ରୀ

ନୂଆଦିଲ୍ଲୀ,୧୫।୫: ଦେଶରେ କରୋନା ଭୟଙ୍କର ରୂପ ନେବାରେ ଲାଗିଛି। କରୋନାରେ ଧନୀ, ଗରିବ, ନେତା ଆକ୍ରାନ୍ତ ହୋଇ ହନ୍ତସନ୍ତ ହେବାରେ ଲାଗିଛନ୍ତି । ଏଭଳି ସ୍ଥିତିରେ...

ତିନି ଦିନିଆ ମୁମ୍ବାଇ ଗସ୍ତରେ ଯିବେ ଦିଦି: ଉଦ୍ଧବ ଠାକରେ, ଶରଦ ପାୱାରଙ୍କ ସହ ହେବ ସାକ୍ଷାତ୍‌କାର

କୋଲକାତା,୩୦ ।୧୧: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଙ୍ଗଳବାର ୩ ଦିନିଆ ମୁମ୍ବାଇ ଗସ୍ତରେ ଯାଉଛନ୍ତି । ଏହି ସମୟରେ ସେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ...

କରୋନା ପରୀକ୍ଷା ଲାଗି କିଟ୍‌ ଦିଅ

ଭୁବନେଶ୍ୱର, ୨।୪(ବ୍ୟୁରୋ): ସରକାର ରାଜ୍ୟରେ କୋଭିଡ୍‌-୧୯ ପ୍ରତିରୋଧ କ୍ଷେତ୍ରରେ ସମସ୍ତ ପ୍ରକାର ସମ୍ଭାବ୍ୟ ପଦକ୍ଷେପ ଗ୍ରହଣ କରିଛନ୍ତି। କେନ୍ଦ୍ର ସରକାର ମଧ୍ୟ ନିୟମିତ ବ୍ୟବଧାନରେ ଭିଡିଓ...

ଚିରାଗଙ୍କ ସହ ସାକ୍ଷାତ୍‌କାର ସମୟରେ ଭାବୁକ ହେଲେ ଶରଦ ଯାଦବ

ପାଟନା,୧୯ ।୮: ଚିରାଗ ପାଶୱାନ ଗୁରୁବାର ବରିଷ୍ଠ ନେତା ଶରଦ ଯାଦବଙ୍କୁ ନୂଆଦିଲ୍ଲୀରେ ଭେଟିଛନ୍ତି । ବିହାରରେ ହେଉଥିବା ଆଶୀର୍ବାଦ ଯାତ୍ରା ପାଇଁ ମାର୍ଗଦର୍ଶନଓ ଆଶୀର୍ବାଦ...

CORONAVIRUS UPDATE: ରାଜ୍ୟରେ ୩୦୬୭ ନୂଆ ପଜିଟିଭ୍‌ ଚିହ୍ନଟ, ଆଜି ବି ଖୋର୍ଦ୍ଧା ଆଗରେ

ଭୁବନେଶ୍ୱର,୨୯।୯(ବ୍ୟୁରୋ): ରାଜ୍ୟରେ ମଙ୍ଗଳବାର ୩୦୬୭ ନୂଆ କରୋନା ପଜିଟିଭ୍‌ ଚିହ୍ନଟ ହୋଇଛନ୍ତି। ଏହାକୁ ମିଶାଇ ରାଜ୍ୟରେ ମୋଟ୍‌ ଆକ୍ରାନ୍ତଙ୍କ ସଂଖ୍ୟା୨୧୫୬୭୬କୁ ବୃଦ୍ଧି ପାଇଥିବା ରାଜ୍ୟ ସ୍ବାସ୍ଥ୍ୟ...

Advertisement
Archives

Model This Week