ଭୁବନେଶ୍ୱର,୧୪।୭: ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ୱାସିମ ଜାଫରଙ୍କୁ ଓଡ଼ିଶା ସିନିୟର୍ କ୍ରିକେଟ ଦଳର ମୁଖ୍ୟ କୋଚ ଭାବେ ନିଯୁକ୍ତ କରାଯାଇଛି। ଏ ନେଇ ବୁଧବାର ସୂଚନା ଦେଇଛି ଓଡ଼ିଶା କ୍ରିକେଟ ଆସୋସିଏସନ (ଓସିଏ)। ଗତ ୩ ବର୍ଷ ହେଲା ରଶ୍ମିରଞ୍ଜନ ପରିଡ଼ା ଏହି ଦାୟିତ୍ୱ ସମ୍ଭାଳୁଥିଲେ।
ଜାଫରଙ୍କ ପାଖରେ ରହିଛି ଉଭୟ ଜାତୀୟ ଓ ଅନ୍ତର୍ଜାତୀୟ କ୍ରିକେଟର ପ୍ରଚୁର ଅଭିଜ୍ଞତା। ପୂର୍ବତନ ଭାରତୀୟ ଓପନର ପୂର୍ବରୁ ବାଂଲାଦେଶ ଜାତୀୟ ଦଳର କୋଚ ଦାୟିତ୍ୱ ତୁଲାଇ ସାରିଛନ୍ତି। ଏହାବ୍ୟତୀତ ଆଇପିଏଲରେ ସେ କିଙ୍ଗସ ଇଲେଭେନ ପଞ୍ଜାବ ଦଳର ମଧ୍ୟ ବ୍ୟାଟିଂ କୋଚ ଦାୟିତ୍ୱରେ ଥିଲେ। ଗତବର୍ଷ ସେ ଉତ୍ତରାଖଣ୍ଡ ଦଳର ମୁଖ୍ୟ କୋଚ ଭାବେ ନିଯୁକ୍ତି ପାଇଥିଲେ। କିନ୍ତୁ ଉତ୍ତରାଖଣ୍ଡ କ୍ରିକେଟ ଆସୋସିଏସନର ଅଧିକାରୀଙ୍କ ସହ ବିବାଦ ପରେ ଚଳିତ ବର୍ଷ ଆରମ୍ଭରୁ ସେ ନିଜ ପଦରୁ ଇସ୍ତଫା ଦେଇଥିଲେ।
୨୦୦୧ରେ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିବା ଜାଫର୍ ମୋଟ ୩୧ ଟେଷ୍ଟ ଖେଳିଛନ୍ତି। ତାଙ୍କ ନାମରେ ରହିଛି ଗୋଟିଏ ଦ୍ୱିଶତକ, ୫ଟି ଶତକ ଓ ୧୧ ଅର୍ଦ୍ଧଶତକ ସହ ମୋଟ ୧୯୪୪ ରନ। ୨୦୦୮ରେ ସେ ଭାରତ ପାଇଁ ଖେଳିଥିଲେ ଅନ୍ତିମ ମ୍ୟାଚ୍। ଟେଷ୍ଟ ଛଡ଼ା ଦୁଇଟି ଦିନିକିଆରେ ମଧ୍ୟ ଭାରତ ପକ୍ଷରୁ ପ୍ରତିନିଧିତ୍ୱ କରିଥିଲେ। ଏହା ପରେ ସେ ପ୍ରଥମଶ୍ରେଣୀ କ୍ରିକେଟ ଖେଳିବା ଜାରି ରଖିଥିଲେ।
