ସିଡ୍ନୀ,୧ା୧୨(ପି.ଟି.): ଅଷ୍ଟ୍ରେଲୀୟ ଓପନର ଡେଭିଡ ଓ୍ବାର୍ନର ଭାରତ ବିପକ୍ଷ ଅବଶିଷ୍ଟ ସୀମିତ ଓଭର କ୍ରିକେଟ ସିରିଜରୁ ଓହରି ଯାଇଛନ୍ତି। ଏଠାରେ ଅନୁଷ୍ଠିତ ଦ୍ୱିତୀୟ ଦିନିକିଆ ମ୍ୟାଚ ଅବସରରେ ସେ ଉରୁସନ୍ଧିରେ ଆଘାତ ପାଇଥିଲେ। ସେହିପରି ଫାଷ୍ଟ ବୋଲର ପ୍ୟାଟ୍ କୁମିନ୍ସଙ୍କୁ ମଧ୍ୟ ଅବଶିଷ୍ଟ ସୀମିତ ଓଭର କ୍ରିକେଟରେ ଦେଖିବାକୁ ମିଳିବେ ନାହିଁ। ଓ୍ବାର୍କଲୋଡ୍ ମ୍ୟାନେଜମେଣ୍ଟକୁ ଦୃଷ୍ଟିରେ ରଖାଯାଇ ତାଙ୍କୁ ବିଶ୍ରାମ ଦିଆ ଯାଇଛି।
ଓ୍ବାର୍ନର ପ୍ରଥମ ୨ଟି ଦିନିକିଆରେ ୬୯ ଓ ୮୩ ରନ ସ୍କୋର କରିଥିଲେ। ସିଡ୍ନୀ କ୍ରିକେଟ ଗ୍ରାଉଣ୍ଡରେ ରବିବାର ଫିଲ୍ଡିଂ କରୁଥିବାବେଳେ ସେ ଆଘାତପ୍ରାପ୍ତ ହୋଇଥିଲେ। ଏହି ମ୍ୟାଚକୁ ଅଷ୍ଟ୍ରେଲିଆ ୫୧ ରନରେ ଜିତିବା ସହ ଆଗୁଆ ସିରିଜ ବିଜୟୀ ହୋଇଥିଲା। ଓ୍ବାର୍ନର ଏବେ ଘରକୁ ଫେରି ରିହାବିଲିଟେଶନରେ ରହିବେ। ଡିସେମ୍ବର ୧୭ରୁ ଆଡିଲେଡ୍ରେ ଆରମ୍ଭ ହେବାକୁ ଯାଉଥିବା ପ୍ରଥମ ଟେଷ୍ଟ ବେଳକୁ ସେ ଦଳକୁ ଫେରିବା ସମ୍ଭାବନା ରହିଛି। ”ପ୍ୟାଟ୍ ଓ ଡାଭି ଆମ ଟେଷ୍ଟ ସିରିଜ ଯୋଜନାରେ ଗୁରୁତ୍ୱପୂର୍ଣ୍ଣ ଭୂମିକା ନେବେ“ ବୋଲି କୋଚ୍ ଜଷ୍ଟିନ ଲାଙ୍ଗର କହିଥିବା ଅଷ୍ଟ୍ରେଲିଆ ମିଡିଆରୁ ପ୍ରକାଶ। ଡାଭି ଫିଟ୍ ହେବା ଉପରେ ଫୋକସ କରିବେ ଏବଂ ପ୍ୟାଟ୍ ଟେଷ୍ଟ ସିରିଜ ବେଳକୁ ଶାରୀରିକ ଓ ମାନସିକ ସ୍ତରରେ ଫିଟ୍ ରହିବା ଅତି ଜରୁରୀ। ସମ୍ପ୍ରତି ଦ୍ୱିପାକ୍ଷିକ ସିରିଜ ଗୁଡ଼ିକରୁ ବିଶ୍ୱ ଟେଷ୍ଟ ଚାମ୍ପିୟନଶିପ୍ ପଏଣ୍ଟ ମିଳୁଥିବାରୁ ଆଗାମୀ ଘରୋଇ ଟେଷ୍ଟ ଗୁଡ଼ିକ ଆମପାଇଁ ଗୁରୁତ୍ୱପୂର୍ଣ୍ଣ। ସେଥିପାଇଁ ଏହି ଦୁଇ ଖେଳାଳିଙ୍କୁ ପ୍ରସ୍ତୁତ କରି ରଖିବା ଆମର ମୁଖ୍ୟ ଲକ୍ଷ୍ୟ“ ବୋଲି ଲାଙ୍ଗର କହିଛନ୍ତି। ବିଗ୍ବାଶ୍ ଲିଗ୍ର ୨ଟି ସିରିଜରେ ଅଗ୍ରଣୀ ରନ୍ ସ୍କୋରର ବାମହାତୀ ବ୍ୟାଟ୍ସମ୍ୟାନ ଡି’ ଆର୍ସି ଶର୍ଟ ଅଷ୍ଟ୍ରେଲିଆ ଦଳରେ ସାମିଲ ହୋଇଛନ୍ତି। ସେ ଓ୍ବାର୍ନରଙ୍କ ସ୍ଥାନନେବେ। ଭାରତ ଓ ଅଷ୍ଟ୍ରେଲିଆ ମଧ୍ୟରେ ୩ୟ ଦିନିକିଆ ବୁଧବାର ଖେଳାଯିବ। ଏହାପରେ ୩ ମ୍ୟାଚ ବିଶିଷ୍ଟ ଟି୨୦ ସିରିଜ ଅନୁଷ୍ଠିତ ହେବ।
ଗତ ଅଗଷ୍ଟରେ ଇଂଲଣ୍ଡ ଟୁର୍ରେ ଯାଇଥିବା ଅଷ୍ଟ୍ରେଲିଆ ଦଳର ସଦସ୍ୟ ଥିବା କୁମିନ୍ସ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରେ କୋଲକାତା ନାଇଟ ରାଇଡର୍ସ ପକ୍ଷରୁ ଖେଳିଥିଲେ। ଭାରତ ବିପକ୍ଷ ଗତ ପ୍ରଥମ ଦିନିକିଆରେ ସେ ପ୍ରଭାବହୀନ ରହିଥିଲେ। ମାତ୍ର ଦ୍ୱିତୀୟ ଦିନିକିଆରେ ୬୭ ରନ ବିନିମୟରେ ୩ଟି ଉଇକେଟ ନେଇଥିଲେ। ପ୍ରଥମ ଦିନିକିଆ ଅବସରରେ ଆଘାତ ଯୋଗୁ ଦ୍ୱିତୀୟ ଦିନିକିଆ ଖେଳି ପାରି ନ ଥିବା ଅଲରାଉଣ୍ଡର ମାର୍କୁସ ଷ୍ଟୋଇନିସ ଦଳରେ ଅପରିବର୍ତ୍ତିତ ରହିଛନ୍ତି। ମାତ୍ର ଆଇପିଏଲ ଅବସରରେ ପାଦରେ ଆଘାତ ପାଇଥିବା ଅଲରାଉଣ୍ଡର ମିଚେଲ ମାର୍ଶ ଆସନ୍ତା ରବିବାରଠାରୁ ଆରମ୍ଭ ହେବାକୁ ଯାଉଥିବା ଭାରତ-ଏ ବିପକ୍ଷ ଓ୍ବାର୍ମଅପ୍ ମ୍ୟାଚରେ ଖେଳିପାରିବେ ନାହିଁ ବୋଲି ସ୍ପଷ୍ଟ କରାଯାଇଛି। ତେବେ ଅଷ୍ଟ୍ରେଲିଆ-ଏରେ ତାଙ୍କ ବଦଳ ଖେଳାଳିଙ୍କ ନାମ ପ୍ରକାଶ କରାଯାଇନାହିଁ। ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ ଷ୍ଟାଣ୍ଡିଂରେ ଅଷ୍ଟ୍ରେଲିଆ ୩ ସିରିଜରୁ ୨୯୬ ପଏଣ୍ଟ ପାଇଛି। ଭାରତ ୪ ସିରିଜରୁ ୩୬୦ ପଏଣ୍ଟ ହାସଲ କରିଛି।
