ପିଲାଟିକୁ ଜନ୍ମଦେବା ପରେ ତାହାର ଲାଳନପାଳନ ଦାୟିତ୍ୱ ମା’କୁ ହିଁ ନେବାକୁ ପଡ଼ିଥାଏ। କାରଣ ଶିଶୁଟିକୁ ଠିକ୍ ସମୟରେ ଖୁଆଇବା ସହ ତାହାର ସ୍ବାସ୍ଥ୍ୟ ପ୍ରତି ଯତ୍ନବାନ୍ ହେବା ଉପରେ ଜନ୍ମଦାତ୍ରୀ ମା’କୁ ତୀକ୍ଷଣ ନଜର ରଖିବାକୁ ପଡ଼ିଥାଏ। ତେବେ ପିଲାଟିର ଖାଦ୍ୟପେୟ ବିଷୟରେ ମା’ମାନେ କେତେକ ବିଷୟ ପ୍ରତି ଧ୍ୟାନଦେବା ନିହାତି ଜରୁରୀ। ଜାଣନ୍ତୁ ସେ ସମ୍ପର୍କରେ…
ଶିଶୁଟିଏ ଜନ୍ମହେବା ପରେ ତାହାର ପ୍ରଥମ ଖାଦ୍ୟ ହେଲା ମା’ର କଷକ୍ଷୀର ବା କୋଲୋଷ୍ଟ୍ରମ। ତା’ପରେ ମା’ କ୍ଷୀର ହିଁ ହେଉଛି ତାହାର ମୁଖ୍ୟ ଖାଦ୍ୟ। ବୟସ ବଢ଼ିବା ସହ ପିଲାଟି ତରଳ, ଅର୍ଦ୍ଧତରଳ ଏବଂ ପରେ ସାଧାରଣ ଖାଦ୍ୟ ଖାଇବା ଆରମ୍ଭ କରିଥାଏ। କେତେଜଣ ମା’ ପିଲାକୁ ଖୁଆଇବା ସମୟରେ ଭାବନ୍ତି ଯେ, ପିଲାଟି ଯଦି ଏକାଥରେ ପୁଳାଏ ଖାଇଦେବ ତା’ହେଲେ ସେ ହୃଷ୍ଟପୁଷ୍ଟ ହେବ। ହେଲେ ଏଭଳି ଧାରଣା ଠିକ୍ ନୁହେଁ। ଜଣେ ପିଲାକୁ ଆବଶ୍ୟକ ମୁତାବକ ଖାଦ୍ୟ ନିର୍ଦ୍ଦିଷ୍ଟ ସମୟ ବ୍ୟବଧାନରେ ଖୁଆଇବା ଦରକାର।
ଖାଦ୍ୟପେୟ : ମା’ କ୍ଷୀର ଖାଇବା ପରେ ପିଲାଟି ଯେତେବେଳେ ସାଧାରଣ ଖାଦ୍ୟ ଖାଇବା ଆରମ୍ଭକରେ, ସେ କ’ଣ କ’ଣ ଖାଇବା ଦରକାର ତାହା ପ୍ରଥମେ ମା’ ଭଲ ଭାବରେ ଅବଗତ ହେବା ଦରକାର। ଏହି ସମୟରେ ସେ ଏଭଳି ଖାଦ୍ୟ ଖାଇବା ଦରକାର, ଯାହା ଠିକ୍ ଭାବରେ ହଜମ ହେଉଥିବା ଦରକାର। ଜବରଦସ୍ତି ଯଦି ପିଲାଟିକୁ ଏକାଥରେ ଆବଶ୍ୟକତାଠାରୁ ଅଧିକ ଖାଦ୍ୟ ଖୁଆଯାଏ, ତେବେ ପିଲାଟି ଖାଇବାକୁ ଅରୁଚିବୋଧ କରିଥାଏ। ବେଳେବେଳେ ଆବଶ୍ୟକତାଠାରୁ ଅଧିକ ଖାଦ୍ୟ ଖାଇଲେ ପିଲାଟି ଝାଡ଼ାବାନ୍ତି ପରି ସମସ୍ୟାର ସମ୍ମୁଖୀନ ହେବା ଆଶଙ୍କା ରହିଛି। ଏପରି କି ଯଦି ଏହି ସମସ୍ୟା ଜଟିଳ ଆକାର ଧାରଣକରେ ତେବେ ପିଲାଟିକୁ ହସ୍ପିଟାଲରେ ଆଡ୍ମିଶନକରି ଚିକିତ୍ସା କରିବାକୁ ପଡ଼ିଥାଏ। ତେଣୁ ପିଲାଟିକୁ ଖୁଆଇବା ବେଳେ ସେ ଥରକେ କେତେ ଖାଦ୍ୟ ଖାଇବ ପ୍ରଥମେ ତାହା ସ୍ଥିର କରନ୍ତୁ। ଶାନ୍ତ ମନରେ ଧୀରସ୍ଥିର ଭାବରେ ପିଲାଟିକୁ ଖୁଆଇଲେ ଖାଦ୍ୟ ପ୍ରତି ତାହାର ଆଗ୍ରହ ବଢ଼ିଥାଏ ଏବଂ ପରବର୍ତ୍ତୀ ସମୟରେ ସେ ଖାଦ୍ୟ ଖାଇବାକୁ ନିଜ ପଟରୁ ଆଗ୍ରହ ପ୍ରକାଶ କରେ।
କିପରି ପିଲାକୁ ଖୁଆଇବେ : ଛୋଟ ପିଲାଟିଏ ଯେ ସହଜରେ ଖାଇଦେବ-ଏଭଳି ଧାରଣା ପ୍ରଥମେ ନିଜ ମନରୁ ଦୂରେଇ ଦିଅନ୍ତୁ। କାରଣ ପ୍ରାରମ୍ଭରେ ପିଲାଟି ସାଧାରଣ ଖାଦ୍ୟ ପ୍ରତି ଅଭ୍ୟସ୍ତ ନ ଥାଏ। ତେଣୁ ସେଭଳି ଖାଦ୍ୟ ଦେଖିଲେ ସେ ଖାଇବାକୁ ସମସ୍ୟା ସୃଷ୍ଟି କରିଥାଏ। ଏହି ସମୟରେ ମା’ର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ପିଲାଟିକୁ ଗପ କହି, ବୁଲାଇ, ଖେଳାଇ ତାହାର ମନକୁ ପ୍ରଥମେ ଖାଦ୍ୟ ପ୍ରତି ଆକର୍ଷିତ କରନ୍ତୁ। ପିଲାଟି ଯଦି ଖାଇବାକୁ ଆଗ୍ରହ ପ୍ରକାଶ କରୁନାହିଁ, ତାକୁ କିଛି ଖେଳନା ଦିଅନ୍ତୁ। ସେ ଖେଳିବା ଅବସ୍ଥାରେ ତାକୁ ଖାଦ୍ୟ ଖୁଆନ୍ତୁ। କଦାପି ପିଲାକୁ ବାଧ୍ୟକରି ଖାଦ୍ୟ ଖୁଆନ୍ତୁ ନାହିଁ। କାରଣ ଏହାଦ୍ୱାରା ସେ ନ ଖାଇବାକୁ ଜିଦ୍ ଧରିଥାଏ। ତେଣୁ ପିଲାଟିକୁ ଖୁଆଇବା ପୂର୍ବରୁ ତାକୁ ଏଭଳି ମାହୋଲ ଭିତରେ ରଖନ୍ତୁ, ଯେମିତି ସେ ସହଜରେ ଖାଦ୍ୟ ଖାଇପାରିବ।
ସମୟ ନିର୍ଘଣ୍ଟ : ପିଲାଟି କେତେବେଳେ ଖାଇବ ତାହାର ସମୟ ନିର୍ଘଣ୍ଟ ବିଷୟରେ ମା’ ଅବଗତ ହେବା ନିହାତି ଦରକାର। ଘଣ୍ଟାଏ ୨ଘଣ୍ଟା ପୂର୍ବରୁ ପିଲାଟି ଖାଇଥିବ, ସେହି ସମୟରେ କେତେଜଣ ମା’ ଭାବନ୍ତି ଯେ ଆହା, ପିଲାଟିକୁ ପୁଣି ଭୋକ କରିବଣି। ତେଣୁ ତାକୁ ପୁଣି ଖୁଆଇ ଥାଆନ୍ତି। ପିଲାଟିର ଖାଇବାର ସମୟ ନିର୍ଘଣ୍ଟ ବିଷୟରେ ଶିଶୁରୋଗ ଡାକ୍ତରଙ୍କ ସହ ଆଲୋଚନା କରନ୍ତୁ। ସବୁଠାରୁ ବଡ଼ କଥା ହେଲା, ପିଲାଟି ଏହି ସମୟରେ କେଉଁ ଖାଦ୍ୟ ଖାଇଲେ ତାହାର ଶାରୀରିକ ସହ ମାନସିକ ବିକାଶ ଘଟିବ ସେ ନେଇ ଜାଣିବା ଦରକାର। ତେଣୁ ଏ ବିଷୟରେ ସମ୍ପୃକ୍ତ ଡାକ୍ତରଙ୍କ ସହ ଆଲୋଚନା କରନ୍ତୁ।
ବାଧ୍ୟ କରନ୍ତୁ ନାହିଁ : କେତେଜଣ ମା’ ଯେତେବେଳେ ପିଲାଟି ନ ଖାଇବାକୁ ଜିଦ୍ ଧରୁଛି ତାହାକୁ ଜବରଦସ୍ତି ଖୁଆଇଥାଆନ୍ତି। ଏପରିକି ନିଜେ ଅସ୍ଥିର ହୋଇପଡ଼ି ପିଲାଟିକୁ ମାରଧର କରନ୍ତି। କିନ୍ତୁ ପିଲାଙ୍କୁ ଖୁଆଇବାର ଏହା ଉଚିତ ଉପାୟ ନୁହେଁ। ପିଲାମାନେ ଚପଳମତି। ସେମାନଙ୍କୁ ବୁଝାଇଶୁଝାଇ ଖୁଆନ୍ତୁ। ସେମାନଙ୍କ ଉପରେ ବିରକ୍ତ ପ୍ରକାଶକଲେ ପିଲାଟି ଧୀରେ ଧୀରେ ଜିଦିଆ ହୋଇଯିବା ଆଶଙ୍କା ରହିଛି। ତେଣୁ ପ୍ରଥମେ ପିଲାକୁ ଏଭଳି ପରିବେଶ ଭିତରକୁ ଆଣନ୍ତୁ ଯେମିତି ତା’ର ଆଗ୍ରହ ଖାଦ୍ୟ ପ୍ରତି ଆସିବ। ଛୋଟ ପିଲାଟି ଯେ ସାଙ୍ଗେ ସାଙ୍ଗେ ଖାଇଦେବ-ଏ ଧାରଣା ମନରୁ ଦୂରକରନ୍ତୁ। ତାହାକୁ ଖୁଆଇବା ବେଳେ ଯେତେ ସମୟ ଆବଶ୍ୟକ ହେଉଛି ଦିଅନ୍ତୁ। ଦେଖିବେ, ଖାଦ୍ୟ ଖାଇବା ପ୍ରତି ତାହାର ଆଗ୍ରହ ଆସିଗଲେ ସେ ଆଉ ସମସ୍ୟା ସୃଷ୍ଟି କରିବ ନାହିଁ। ତେଣିକି ଆପଣ ଆରାମରେ ପିଲାଟିକୁ ଖୁଆଇପାରିବେ।
ବୟସ ଅନୁପାତରେ ଖାଦ୍ୟ : ପିଲାଟି ବୟସ ଅନୁପାତରେ ହିଁ ଖାଦ୍ୟ ଖାଇଥାଏ। କେଉଁ ବୟସରେ ପିଲାଟି କେଉଁ ଖାଦ୍ୟ କେତେ ପରିମାଣରେ ଖାଇବ ତାହା ପ୍ରଥମେ ମା’ ଭଲ ଭାବରେ ଜାଣିବା ଦରକାର। ପିଲାଟିର ଶାରୀରିକ ବିକାଶ ପାଇଁ ଭିଟାମିନ୍ଯୁକ୍ତ ଖାଦ୍ୟ ଖୁଆନ୍ତୁ। ଯଦି ଫୁଡ୍ ସପ୍ଲିମେଣ୍ଟ ଖୁଆଉଛନ୍ତି ତେବେ ଏ ନେଇ ଶିଶୁରୋଗ ଡାକ୍ତରଙ୍କ ସହ ବିଶଦ ଭାବରେ ଆଲୋଚନା କରନ୍ତୁ।
ସ୍ବାସ୍ଥ୍ୟ ସମସ୍ୟା : ପିଲାଟି ଖାଦ୍ୟ ଖାଇବା ସହ ତାହାର ସ୍ବାସ୍ଥ୍ୟ ସମସ୍ୟା ପ୍ରତି ଅବଗତ ରୁହନ୍ତୁ। ପିଲାଟି ଯେତେବେଳେ ଅସୁସ୍ଥ ଅଛି ସେତେବେଳେ କ’ଣ ଖାଇବ ତାହା ଜାଣିବା ଦରକାର।
ଛୋଟ ପିଲାଙ୍କୁ ଖୁଆଉଥିଲେ : ଯେତେବେଳେ ୬ମାସର ଶିଶୁକୁ ଖାଦ୍ୟ ଖୁଆଇବା ଆରମ୍ଭ କରିବେ ସେତେବେଳେ ତାକୁ ଅଳ୍ପ ଅଳ୍ପ କରି ଖୁଆନ୍ତୁ। ଖୁଆଇବା ସମୟରେ ଯଦି ସେ ବାରମ୍ବାର ପାଟିରୁ କାଢ଼ି ଦେଉଛି ତେବେ ବାଧ୍ୟରେ ଖୁଆନ୍ତୁ ନାହିଁ। ଏହି ସମୟରେ ପିଲାର ଶରୀରକୁ କେତେ ଖାଦ୍ୟ ଆବଶ୍ୟକ ସେ ସେହି ଅନୁଯାୟୀ ଖାଇଥାଏ। ଆବଶ୍ୟକତାଠାରୁ ଯଦି ସବୁବେଳେ ତାକୁ ଅଧିକ ଖାଦ୍ୟ ଖୁଆନ୍ତି, ତେବେ ପରବର୍ତ୍ତୀ ସମୟରେ ପିଲାଟି ମେଦବହୁଳତା ପରି ସମସ୍ୟାର ସମ୍ମୁଖୀନ ହେବାର ଆଶଙ୍କା ରହିଛି।
