ଢେଙ୍କାନାଳ ଅଫିସ, ୧୮।୨
ଢେଙ୍କାନାଳ ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଦ୍ୱିତୀୟ ପର୍ଯ୍ୟାୟ ମତଦାନ ଶୁକ୍ରବାର ଅନୁଷ୍ଠିତ ହେଉଛି। ଏଥିଲାଗି ପୋଲିଂ ବୁଥ୍ରେ ସମସ୍ତ ପ୍ରସ୍ତୁତି ଶେଷ ହୋଇଛି। ଉଭୟ ବ୍ଲକର ୮୧୮ ବୁଥ୍ରେ ୨ ଲକ୍ଷ ୨୮ ହଜାର ୫୮୯ ଭୋଟର ମତଦାନ ସାବ୍ୟସ୍ତ କରିବେ। ୭ ଜିଲା ପରିଷଦ ଆସନରେ ୨୯ ପ୍ରାର୍ଥୀ, ୫୮ ପଞ୍ଚାୟତର ୨୯୨ ସରପଞ୍ଚ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେବ। ପ୍ରଥମ ପର୍ଯ୍ୟାୟ ନିର୍ବାଚନରେ କେତେକ ସ୍ଥାନରେ ବିଶୃଙ୍ଖଳା ଦେଖାଦେଇଥିବାବେଳେ ଏହାକୁ ନେଇ ସଜାଗ ହୋଇଉଠିଛି ପୋଲିସ ପ୍ରଶାସନ। ସମ୍ବେଦନଶୀଳ ବୁଥ୍ଗୁଡ଼ିକ ଉପରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଥିବାବେଳେ ଅପ୍ରୀତିକର ପରିସ୍ଥିତି ଏଡ଼ାଇବାକୁ ସମସ୍ତ ପଦକ୍ଷେପ ଗ୍ରହଣ କରାଯାଇଛି।
ଢେଙ୍କାନାଳ ସଦର ବ୍ଲକରେ ୪ ଜିଲା ପରିଷଦ ଆସନ ଲାଗି ୧୭ ପ୍ରାର୍ଥୀ ମଇଦାନକୁ ଓହ୍ଲାଇଛନ୍ତି। ଏହିକ୍ରମରେ ୩୦ ପଞ୍ଚାୟତରେ ୧୭୨ ସରପଞ୍ଚ, ୧୪୩ ସମିତିସଭ୍ୟ ପ୍ରାର୍ଥୀ ନିର୍ବାଚନ ଲଢୁଛନ୍ତି। ସେହିପରି ୩୯୯ ୱାର୍ଡରେ ୫୦୩ ଜଣ ଓ୍ବାର୍ଡସଭ୍ୟ ରହିଛନ୍ତି। ମୋଟ ୧ ଲକ୍ଷ ୧୮ ହଜାର ୨୬୯ ଭୋଟର ସେମାନଙ୍କ ବହୁମୂଲ୍ୟ ମତ ସାବ୍ୟସ୍ତ କରିବେ। ସଦର ବ୍ଲକର ୬୪ ବୁଥ୍କୁ ଉତ୍ତେଜନାପ୍ରବଣ ଭାବେ ଚିହ୍ନଟ କରାଯାଇଛି। ସମ୍ପୃକ୍ତ ମତଦାନ କେନ୍ଦ୍ରଗୁଡ଼ିକରେ ଭିଡିଓଗ୍ରାଫି ବ୍ୟବସ୍ଥା କରାଯାଇଛି। ସେଠାରେ ଜଣେ ଲେଖାଏ କନଷ୍ଟେବଳ, ହାବିଲଦାର, ହୋମଗାର୍ଡ, ଫରେଷ୍ଟ ଗାର୍ଡଙ୍କୁ ମୁତୟନ କରାଯାଇଛି। ବଳଦିଆବନ୍ଧ ପଞ୍ଚାୟତରେ ମହିଳାଙ୍କ ପାଇଁ ୨ଟି ପିଙ୍କ୍ ବୁଥ କରାଯାଇଛି। ସକାଳ ୭ଟାରୁ ଅପରାହ୍ନ ୧ଟା ଯାଏ ଭୋଟ ଗ୍ରହଣ ହେବ। ସେହିପରି ଓଡ଼ାପଡ଼ା ବ୍ଲକର ୩ ଜିଲା ପରିଷଦ ଜୋନ୍ରେ ୧୨ ଆଶାୟୀ, ୨୮ ପଞ୍ଚାୟତ ୧୨୦ ସରପଞ୍ଚ ଏବଂ ୧୧୪ ସମିତିସଭ୍ୟ ପ୍ରାର୍ଥୀ ରହିଛନ୍ତି। ୪୧୯ ୱାର୍ଡ ପାଇଁ ୫୩୧ ୱାର୍ଡସଭ୍ୟ ନିର୍ବାଚନ ଲଢୁଛନ୍ତି। ମୋଟ ୧ ଲକ୍ଷ ୧୦ ହଜାର ୩୨୦ ଭୋଟର ମତଦାନ କରିବେ। ବ୍ଲକର ୫୧ ଉତ୍ତେଜନାପ୍ରବଣ ବୁଥ ଚିହ୍ନଟ ହୋଇଛି। ବାଙ୍ଗୁରୁସିଂ ପଞ୍ଚାୟତରେ ମହିଳାଙ୍କ ଲାଗି ପିଙ୍କ୍ ବୁଥ୍ କରାଯାଇଛି।
ଏ ସଂକ୍ରାନ୍ତରେ ଜିଲାପାଳ ସରୋଜ କୁମାର ସେଠୀ କୁହନ୍ତି, ଦ୍ୱିତୀୟ ପର୍ଯ୍ୟାୟ ନିର୍ବାଚନ ପାଇଁ ଓଡ଼ାପଡ଼ା ଓ ଢେଙ୍କାନାଳ ସଦର ବ୍ଲକରେ ସମସ୍ତ ପ୍ରସ୍ତୁତି ସରିଛି ା ପୋଲିଂ ପାର୍ଟିମାନେ ସୁରକ୍ଷିତ ଭାବେ ବୁଥ୍ରେ ପହଞ୍ଚତ୍ଛନ୍ତି। ଶାନ୍ତିଶୃଙ୍ଖଳାର ସହ ମତଦାନ ପ୍ରକ୍ରିୟା କରାଯିବା ଲାଗି ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି।
