ଓ୍ବାଶିଂଟନ,୬।୪: ଆମେରିକାରେ ଥିବା ୟେଲୋଷ୍ଟୋନ ଆଗ୍ନେୟଗିରିକୁ ଥଣ୍ଡା କରାଯିବା ଲାଗି ନାସାର ବୈଜ୍ଞାନିକମାନେ ଯୋଜନା ପ୍ରସ୍ତୁତ କରିଛନ୍ତି। ପ୍ରତିବର୍ଷ ଆଗ୍ନେୟଗିରି ରହିଥିବା ଅଞ୍ଚଳରେ ୩୦୦୦ରୁ ଅଧିକ ଥର ଭୂକମ୍ପ ହୋଇଥାଏ। ଏହା ମୁଖ୍ୟତଃ ହାଇଡ୍ରୋଥର୍ମାଲ ପ୍ରତିକ୍ରିୟା ଯୋଗୁ ହେଉଥିବା ବୈଜ୍ଞାନିକମାନେ ଅନୁମାନ କରୁଛନ୍ତି। ଚଳିତ ବର୍ଷ ମାର୍ଚ୍ଚରେ ଏହି ଅଞ୍ଚଳରେ ୧୦୫ ଥର ଭୂକମ୍ପ ହୋଇଛି। ଏହା ଯୋଗୁ ସ୍ଥାନୀୟ ଲୋକେ ଆତଙ୍କିତ ହୋଇ ପଡ଼ିଛନ୍ତି। ତେବେ ଭୂବିଜ୍ଞାନୀଙ୍କ ଅନୁସାରେ ନିକଟ ଭବିଷ୍ୟତରେ ୟେଲୋଷ୍ଟୋନ୍ରୁ ଅଗ୍ନି ଉଦ୍ଗୀରଣ ହେବାର କୌଣସି ଆଶଙ୍କା ନାହିଁ। ଆଗ୍ନେୟ ଗିରିର ନିମ୍ନ ଭାଗରେ ଅତ୍ୟଧିକ ଚାପ ସୃଷ୍ଟି ହେବା ସହିତ ତାପମାତ୍ରା ବୃଦ୍ଧି ଘଟିଲେ ଶେଷରେ ଏଥିରୁ ଅଗ୍ନି ଉଦ୍ଗୀରଣ ହୋଇଥାଏ। ଏହା ପୂର୍ବରୁ ୟେଲୋଷ୍ଟୋନ୍ରୁ ୨୧ ଲକ୍ଷ, ୧୩ ଲକ୍ଷ ଏବଂ ସାଢ଼େ ୬ ଲକ୍ଷ ବର୍ଷ ତଳେ ଅଗ୍ନି ଉଦ୍ଗୀରଣ ହୋଇ ସାରିଛି। ଏବେ ସାଢ଼େ ୬ ଲକ୍ଷ ବର୍ଷ ଧରି ଏହା ସୁପ୍ତ ଅବସ୍ଥାରେ ରହିଛି। ମାତ୍ର ଭବିଷ୍ୟତରେ ଯେଭଳି ଏଥିରୁ ଅଗ୍ନି ଉଦ୍ଗୀରଣ ନ ହେବ ସେଥିଲାଗି ନାସାର ବୈଜ୍ଞାନିକମାନେ ଉଦ୍ୟମ ଆରମ୍ଭ କରିଛନ୍ତି। ଆଗ୍ନେୟଗିରି ଥିବା ଅଞ୍ଚଳରେ ବହୁଗୁଡ଼ିଏ ନଳ ଭୂଗର୍ଭରେ ପ୍ରାୟ ୧୦ କିଲୋମିଟର ପର୍ଯ୍ୟନ୍ତ ପ୍ରବେଶ କରାଯିବ। ଏସବୁ ନଳ ଦେଇ ଥଣ୍ଡାପାଣି ଛଡ଼ାଯିବ। ଏହାଦ୍ୱାରା ଆାଗ୍ନେୟଗିରି ଅଞ୍ଚଳରେ ଚାପ କମ୍ ହେବା ସହିତ ତାପମାତ୍ରାକୁ ନିୟନ୍ତ୍ରଣ କରାଯାଇ ପାରିବ ବୋଲି ନାସାର ବୈଜ୍ଞାନିକମାନେ ପ୍ରକାଶ କରିଛନ୍ତି।
