ଭଦୋଦରା,୧୧।୧: ଭାରତୀୟ କ୍ରିକେଟର ଷ୍ଟାର ବ୍ୟାଟର ବିରାଟ କୋହଲି ଆନ୍ତର୍ଜାତୀୟ କ୍ରିକେଟରେ ଏକ ନୂତନ ଇତିହାସ ରଚିଛନ୍ତି। ଭଦୋଦରାଠାରେ ନ୍ୟୁଜିଲାଣ୍ଡ ବିପକ୍ଷରେ ଖେଳାଯାଇଥିବା ପ୍ରଥମ ଦିନିକିଆ ମ୍ୟାଚରେ କୋହଲି ମାତ୍ର ୨୫ ରନ୍ କରିବା କ୍ଷଣି ଆନ୍ତର୍ଜାତୀୟ କ୍ରିକେଟରେ ୨୮,୦୦୦ ରନ୍ ସମ୍ପୂର୍ଣ୍ଣ କରିଛନ୍ତି। ଏହି ମାଇଲଖୁଣ୍ଟ ଅତିକ୍ରମ କରିବାରେ ସେ ବିଶ୍ୱର ମାତ୍ର ତୃତୀୟ ବ୍ୟାଟର ହୋଇଥିବା ବେଳେ ସବୁଠାରୁ କମ୍ ପାରିରେ ଏହି ସଫଳତା ପାଇ ସେ ସଚିନ ତେନ୍ଦୁଲକରଙ୍କ ବିଶ୍ୱ ରେକର୍ଡ ଭାଙ୍ଗିଛନ୍ତି।
ଆନ୍ତର୍ଜାତୀୟ କ୍ରିକେଟରେ ସବୁଠାରୁ ଦ୍ରୁତ ୨୮ ହଜାର ରନ୍ କରିବା କ୍ଷେତ୍ରରେ କୋହଲି ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କୁ ପଛରେ ପକାଇଛନ୍ତି। ସଚିନ ୬୪୪ଟି ଇନିଂସରେ ଏହି ରେକର୍ଡ ହାସଲ କରିଥିବା ବେଳେ କୋହଲି ମାତ୍ର ୬୨୪ଟି ଇନିଂସରେ ଏହି ବିରଳ ରେକର୍ଡ ନିଜ ନାମରେ କରିଛନ୍ତି। ବିରାଟ ଓ ସଚିନଙ୍କ ବ୍ୟତୀତ ଶ୍ରୀଲଙ୍କାର କୁମାର ସାଙ୍ଗାକାରା (୬୬୬ ଇନିଂସ) ଏହି ତାଲିକାରେ ତୃତୀୟ ସ୍ଥାନରେ ରହିଛନ୍ତି।
ଏହି ମ୍ୟାଚରେ କୋହଲି ୯୩ ରନର ଏକ ଚମତ୍କାର ଇନିଂସ ଖେଳିବା ସହ କୁମାର ସାଙ୍ଗାକାରାଙ୍କ ମୋଟ ରନ୍ (୨୮,୦୧୬) କୁ ଅତିକ୍ରମ କରି ଆନ୍ତର୍ଜାତୀୟ କ୍ରିକେଟରେ ଦ୍ୱିତୀୟ ସର୍ବାଧିକ ରନ୍ ସଂଗ୍ରହକାରୀ ହୋଇଛନ୍ତି। ବର୍ତ୍ତମାନ କୋହଲିଙ୍କ ଆଗରେ କେବଳ ସଚିନ ତେନ୍ଦୁଲକର (୩୪,୩୫୭ ରନ୍) ରହିଛନ୍ତି।
ତେବେ ଏହି ମୁକାବିଲାରେ କୋହଲି ନିଜର ୮୫ତମ ଆନ୍ତର୍ଜାତୀୟ ଶତକର ନିକଟତର ହୋଇ ମଧ୍ୟ ମାତ୍ର ୭ ରନ୍ ପାଇଁ ଶତକରୁ ବଞ୍ଚିତ ହୋଇଛନ୍ତି। ସେ ୯୧ଟି ବଲରୁ ୯୩ ରନ୍ କରି କାଇଲ୍ ଜାମିସନଙ୍କ ବଲରେ ଆଉଟ୍ ହୋଇଥିଲେ। ଯଦିଓ ସେ ଶତକ କରିପାରିଲେ ନାହିଁ, ତାଙ୍କର ଏହି ଐତିହାସିକ ଉପଲବ୍ଧି ପାଇଁ ଷ୍ଟାଡିୟମରେ ଉପସ୍ଥିତ ସମସ୍ତ ଦର୍ଶକ ଛିଡ଼ା ହୋଇ ତାଙ୍କୁ ସମ୍ମାନ ଜଣାଇଥିଲେ।
