ରାଞ୍ଚି,୨୬।୨: ଟିମ ଇଣ୍ଡିଆର ତାରକା କ୍ରିକେଟର ବିରାଟ କୋହଲି ଯୁବ ଖେଳାଳିଙ୍କୁ ଇଂଲଣ୍ଡ ବିପକ୍ଷରେ ବିଜୟର ଶ୍ରେୟ ଦେଇଛନ୍ତି। ବ୍ୟକ୍ତିଗତ କାରଣରୁ ସିରିଜରୁ ବାହାରିଥିବା ବିରାଟ କୋହଲି କହିଛନ୍ତି, ଯୁବ ଖେଳାଳିମାନେ ଭଲ ପ୍ରଦର୍ଶନ କରିଛନ୍ତି ଏବଂ ଟିମ ଇଣ୍ଡିଆକୁ ବିଜୟୀ କରାଇଛନ୍ତି। ସିରିଜ ଆରମ୍ଭ ହେବାର ଗୋଟିଏ ଦିନ ପୂର୍ବରୁ ବିରାଟ କୋହଲି ବ୍ୟକ୍ତିଗତ କାରଣ ଦର୍ଶାଇ ତାଙ୍କ ନାମ ପ୍ରତ୍ୟାହାର କରି ନେଇଥିଲେ। ତେବେ ଫେବୃଆରୀ ୧୫ରେ ବିରାଟ କୋହଲି ଦ୍ୱିତୀୟ ଥର ପାଇଁ ପିତା ହୋଇଥିଲେ।
ତେବେ ଏହି ସିରିଜରେ ଟିମ ଇଣ୍ଡିଆ ଅଗ୍ରଣୀ ହେବା ମାତ୍ରେ ବିରାଟ କୋହଲି ତୁରନ୍ତ ପ୍ରତିକ୍ରିୟା ପ୍ରକାଶ କରିଛନ୍ତି। ବିରାଟ କୋହଲି ଏହି ବିଜୟକୁ ଚମତ୍କାର ବୋଲି ବର୍ଣ୍ଣନା କରିଛନ୍ତି।
ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ଜିତିବା ଟିମ ଇଣ୍ଡିଆ ପାଇଁ ସହଜ ହୋଇନାହିଁ। ବିରାଟ କୋହଲି ଏବଂ ମହମ୍ମଦ ଶାମିଙ୍କ ବିନା ଭାରତକୁ ଏହି ସିରିଜରେ ପ୍ରବେଶ କରିବାକୁ ପଡିଲା। ଆଘାତ ହେତୁ ମହମ୍ମଦ ଶାମି ଏହି ସିରିଜର ଅଂଶ ହୋଇ ନ ଥିଲେ। ପ୍ରଥମ ଟେଷ୍ଟ ପରେ କେ.ଏଲ ରାହୁଲ ମଧ୍ୟ ସିରିଜ ବାହାରେ ଥିଲେ। ରୋହିତ ଶର୍ମାଙ୍କ ବ୍ୟତୀତ ଟିମ ଇଣ୍ଡିଆର ବ୍ୟାଟିଂ ଲାଇନଅପ ରେ କୌଣସି ବ୍ୟାଟ୍ସମ୍ୟାନ ନ ଥିଲେ, ଯାହାର ୨୫ରୁ ଅଧିକ ଟେଷ୍ଟ ଖେଳିବାର ଅଭିଜ୍ଞତା ଥିଲା।
କେବଳ ଏତିକି ନୁହେଁ ଇଂଲଣ୍ଡ ସିରିଜ୍ର ଏକ ଭଲ ଆରମ୍ଭ କରି ପ୍ରଥମ ମ୍ୟାଚ ଜିତିଥିଲା। ତେବେ ଦ୍ୱିତୀୟ ଟେଷ୍ଟରେ ଭାରତ ଏକ ଶକ୍ତିଶାଳୀ ପ୍ରତ୍ୟାବର୍ତ୍ତନ କରି ସିରିଜକୁ ୧-୧ରେ ସମାନ କରିଥିଲା। ଏହା ପରେ ରାଜକୋଟ ଏବଂ ରାଞ୍ଚିରେ କ୍ରମାଗତ ଦୁଇଟି ମ୍ୟାଚ ଜିତି ଟିମ ଇଣ୍ଡିଆ ସିରିଜରେ ୩-୧ରେ ଅଗ୍ରଣୀ ହାସଲ କରିଛି। ସିରିଜର ଶେଷ ମ୍ୟାଚ ଧର୍ମଶାଳାରେ ଖେଳାଯିବ।
