ଚେନ୍ନାଇ,୧୩।୨: ଭାରତ ଓ ଭ୍ରମଣକାରୀ ଇଂଲଣ୍ଡ ମଧ୍ୟରେ ଖେଳାଯାଉଥିବା ଦ୍ୱିତୀୟ ଟେଷ୍ଟ ଶନିବାରଠାରୁ ଏମ୍.ଏ. ଚିଦାମ୍ବରମ୍ ଷ୍ଟାଡିୟମରେ ଖେଳାଯାଉଛି। ଚାରି ମ୍ୟାଚ୍ ବିଶିଷ୍ଟ ଏହି ସିରିଜ୍ରେ ୦-୧ରେ ପଛୁଆ ଥିବା ଭାରତୀୟ ଦଳ ପ୍ରଥମେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା। ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟ ସତ୍ତ୍ୱେ ଓପନର୍ ରୋହିତ ଶର୍ମା ଦମ୍ଦାର ପ୍ରଦର୍ଶନ ଜାରି ରଖିଛନ୍ତି। ହେଲେ ବିରାଟ କୋହଲି ଖାତା ନ ଖୋଲି ଆଉଟ୍ ହୋଇଥିଲେ। ଏହାକୁ ନେଇ ସେ ଏକ ଲଜ୍ଜାଜନକ ରେକର୍ଡର ଅଧିକାରୀ ହୋଇଛନ୍ତି।
ଇଂଲଣ୍ଡର ଅଫ୍ ସ୍ପିନର ମୋଇନ ଅଲି କୋହଲିଙ୍କ ଉଇକେଟ ନେଇଥିଲେ। ଏଥିଯୋଗୁ ସେ ମହେନ୍ଦ୍ର ସିଂହ ଧୋନୀଙ୍କୁ ପଛରେ ପକାଇଛନ୍ତି। କ୍ରିକେଟର ସମସ୍ତ ଫର୍ମାଟରେ ସବୁଠାରୁ ଅଧିକ ଥର ଶୂନରେ ଆଉଟ୍ ହେବାରେ ସେ ଦ୍ୱିତୀୟ ସ୍ଥାନରେ ପହଞ୍ଚିଛନ୍ତି। ୧୨ ଥର ସେ ଏଭଳି କରିଛନ୍ତି। ପୂର୍ବ ଅଧିନାୟକ ଧୋନୀ ୧୧ଥର ଶୂନରେ ଆଉଟ୍ ହୋଇଥିଲେ। ତାଙ୍କ ଛଡ଼ା ସୌରଭ ଗାଙ୍ଗୁଲି ୧୩ଥର ଶୂନରେ ଆଉଟ୍ ହୋଇ ଶୀର୍ଷରେ ଅଛନ୍ତି।
ପ୍ରକାଶ ଯେ, ବିରାଟ ୨୬ଥର ଅନ୍ତରାଷ୍ଟ୍ରୀୟ କ୍ରିକେଟରେ ଶୂନରେ ଆଉଟ୍ ହୋଇଛନ୍ତି। ହେଲେ ପ୍ରଥମ ଥର ପାଇଁ ଚେନ୍ନାଇରେ ଖେଳାଯାଉଥିବା ଦ୍ୱିତୀୟ ଟେଷ୍ଟରେ ସେ ସ୍ପିନ୍ ଖେଳି ନ ପାରି ଆଉଟ୍ ହୋଇଥିବା ଦେଖାଯାଇଛି। ୧୪୯ ପାଳିରେ ପ୍ରଥମ ଥର ପାଇଁ କୋହଲିଙ୍କୁ ଜଣେ ସ୍ପିନର ଶୂନରେ ଆଉଟ୍ କରିଛନ୍ତି।
