ଜୁନାଗଡ଼,୧୧।୯(ଡି.ଏନ.ଏ.) ଏନ୍ସିଆର୍ବି ରିପୋର୍ଟ ୨୦୨୧ ଅନୁଯାୟୀ ମହିଳା ନିର୍ଯାତନାରେ ଓଡିଶା ୧ ନମ୍ବର ସ୍ଥାନ ରହିଥିବାରୁ ରାଜ୍ୟ ସରକାରଙ୍କ ବିରୋଧରେ ଭାଜପା ଜିଲା ମହିଳା ମୋର୍ଚ୍ଚା ପକ୍ଷରୁ ରବିବାର କଳାହାଣ୍ଡି ଜିଲା ଜୁନାଗଡ଼ରେ ବିକ୍ଷୋଭ ପ୍ରଦର୍ଶନ କରାଯାଇଛି। ପରେ ମା’ ଲଙ୍କେଶ୍ୱରୀ ମନ୍ଦିରରୁ ଦଳୀୟ କାର୍ଯ୍ୟାଳୟ ପର୍ଯ୍ୟନ୍ତ ଏକ ଶୋଭାଯାତ୍ରା କରାଯାଇଥିଲା। ଗଁାକୁ କାମ, ମା’ଙ୍କୁ ସମ୍ମାନ କହି ରାଜ୍ୟ ସରକାର ଡିଣ୍ଡିମ ପିଟୁଥିବାବେଳେ ଏହା କ’ଣ ତାହାର ବାସ୍ତବିକ ଚିତ୍ର ବୋଲି ମହିଳା ମୋର୍ଚ୍ଚା ପ୍ରଶ୍ନ ଉଠାଇଛି।
ବିଜେଡି ଶାସନରେ ମହିଳାମାନେ ବିପଦରେ ରହିଛନ୍ତି, ଯାହାର ଉଦାହରଣ ଏନ୍ସିଆରବି ରିପୋର୍ଟରୁ ଜଳଜଳ ହୋଇ ଦେଖାଯାଉଛି। ମହିଳାମାନଙ୍କୁ ଯଦି ରାଜ୍ୟ ସରକାର ସୁରକ୍ଷା ପ୍ରଦାନ ନ କରନ୍ତି, ତାହା ହେଲେ ଆଗାମୀ ଦିନରେ ଭାଜପା ମହିଳା ମୋର୍ଚ୍ଚା ଜିଲା ସମେତ ରାଜ୍ୟ ବ୍ୟାପି ଆନ୍ଦୋଳନ କରିବ ବୋଲି ଚେତାବନୀ ଦେଇଛନ୍ତି। ଜିଲା ସଭାନେତ୍ରୀ ନିରୁପମା ନାଏକଙ୍କ ନେତୃତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ଜିଲା ଉପସଭାନେତ୍ରୀ ସୋଭାଗିନୀ ପାତ୍ର, ସନ୍ତୋଷୀ ଦାସ, ଯାଜ୍ଞସିନୀ ମହାନନ୍ଦ, ଜିଲା ସମ୍ପାଦିକା କାଞ୍ଚନ ବାଗ, ରାଜ୍ୟ କାର୍ଯ୍ୟକାରିଣୀ ସଦସ୍ୟା କୁନ୍ତି ପାଲ, ବୋରିଆ ମଣ୍ଡଳ ସଭାନେତ୍ରୀ ଦେବକୀ ସିନ୍ଦୁର, ଜିଲା କାର୍ଯ୍ୟକାରିଣୀ ସଦସ୍ୟା ସଂଯୁକ୍ତା ମହତୀ, ରୀନା ଭାଟି, କାଉନସିଲର ମଞ୍ଜୁଲତା ସେଠୀ, ମାଧବୀ ବାଗ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ମନୋଜ ମେହେର, ପୂର୍ବତନ ବ୍ଲକ ଉପାଧ୍ୟକ୍ଷ ଟଙ୍କଧର ନାଏକ, ଏମ୍ପି ପ୍ରତିନିଧି ଚନ୍ଦ୍ର ହାସ୍ୟ ବିଶ୍ୱାଳ, ଭବାନୀଶଙ୍କର ଠାକୁର ପ୍ରମୁଖ ସାମିଲ ଥିଲେ।
