ମାଧପୁର,୮ା୮ – ୩ ଗ୍ରାମର ଲୋକଙ୍କ ଭରସା ଗୋଟିଏ ରାସ୍ତା। ହେଲେ ଟିକେ ବର୍ଷା ହୋଇଗଲେ ଆଉ ସେହି ରାସ୍ତା ଦେଇ ଯିବାଆସିବା ସହଜ ହୋଇପାରୁନି। ଭଲ ରାସ୍ତାଟିଏ ପାଇଁ ପ୍ରଶାସନ ନିକଟରେ ବାରମ୍ବାର ଅଭିଯୋଗ କଲେ ମଧ୍ୟ କିଛି ସୁଫଳ ମିଳୁନି। ଫଳରେ ମାଟି, କାଦୁଅ ଭିତରେ ପଶି ଯାତାୟାତ ପାଇଁ ବାଧ୍ୟ ହେଉଛନ୍ତି ଅନୁଗୋଳ ଜିଲା ଆଠମଲ୍ଲିକ ବ୍ଲକ କମ୍ପଲା ପଞ୍ଚାୟତର ୩ ଗ୍ରାମର ଲୋକେ।
ସ୍ଥାନୀୟ ବାସିନ୍ଦାଙ୍କ ଅଭିଯୋଗ ମୁତାବକ, କମ୍ପଲା ପଞ୍ଚାୟତ ଦେଉଳି ଗ୍ରାମ୍ୟ ରାସ୍ତା ଉପରେ ଦେଉଳି, ମୋହନଖଳି, କଳାଧ୍ୱନୀ ଆଦି ଗ୍ରାମ ମୁଖ୍ୟତଃ ନିର୍ଭରଶୀଳ। ପ୍ରସିଦ୍ଧ ଗୁପ୍ତେଶ୍ୱର ବାବାଙ୍କ ଶୈବପୀଠ ଏହି ବାଟେ ପଡେ। ହେଲେ ମାଟି ରାସ୍ତା ହୋଇଥିବାରୁ ସାମାନ୍ୟ ବର୍ଷାରେ କାଦୁଅ ଭର୍ତ୍ତି ହୋଇଯାଉଛି। ତେଣୁ ବର୍ଷା ଦିନେ ଯାତାୟାତ କରିବା କଷ୍ଟକର ହୋଇପଡ଼ୁଛି। ଗାଡ଼ିମୋଟର ତ ଦୂର କଥା ଚାଲିକରି ଯିବାରେ ମଧ୍ୟ ଅସୁବିଧା ହେଉଛି। କିଛିଦିନ ହେବ ବର୍ଷା ଲାଗି ରହିଥିବାରୁ ରାସ୍ତା ପାଣି, କାଦୁଅରେ ଭର୍ତ୍ତି ହୋଇଯାଇଛି। ଏ ନେଇ ପ୍ରଶାସନକୁ ଜଣାଯାଇଥିଲେ ମଧ୍ୟ କେହି ଦୃଷ୍ଟି ଦେଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ କମ୍ପଲା ପଞ୍ଚାୟତ ନିର୍ବାହୀ ଅଧିକାରୀ ତିଳକରାଜ ବେହେରା କହିଛନ୍ତି, ଦୁଇଟି ପଞ୍ଚାୟତର ଦାୟିତ୍ୱରେ ଥିବାରୁ ଠିକ୍ ତଥ୍ୟ ଏବେ ଦେଇପାରିବେନି। ସମସ୍ୟାର ତର୍ଜମା କରାଯାଇ କିପରି ସମାଧାନ କରାଯିବ ସେ ଦିଗରେ ଦୃଷ୍ଟି ଦିଆଯିବ ବୋଲି ନିର୍ବାହୀ ଅଧିକାରୀ ପ୍ରକାଶ କରିଛନ୍ତି।
ଗଁ। ରାସ୍ତା ହୋଇଥିବାରୁ ଅବହେଳା
ଗଁ। ରାସ୍ତା ହୋଇଥିବାରୁ କର୍ତ୍ତୃପକ୍ଷ ଦୃଷ୍ଟି ଦେଉନାହାନ୍ତି। ତେଣୁ ବର୍ଷ ବର୍ଷ ଧରି ଏହା ଏପରି ଶୋଚନୀୟ ଅବସ୍ଥାରେ ରହିଛି। ସ୍ଥାନୀୟ ଲୋକ ପ୍ରତିନିଧି ଚାହିଁଲେ ଲୋକେ ଗମନାଗମନର ଭଲ ସୁବିଧା ପାଇପାରନ୍ତେ।
-ମନୋଜ କୁମାର ବାହୁକ, ଦେଉଳି
ପ୍ରଶାସନ ସମାଧାନ କରୁ
ଗଁ। ଗଁ। ରେ ସରକାର ପକ୍କା ରାସ୍ତା ନିର୍ମାଣ କରୁଛନ୍ତି। ହେଲେ ଏହି ରାସ୍ତା ପ୍ରତି ଆଦୌ ଦୃଷ୍ଟି ଦିଆଯାଉ ନାହିଁ। ଏ ଦିଗରେ ଆବଶ୍ୟକ ପଦକ୍ଷେପ ନିଆଗଲେ ଅନେକ ଲୋକ ଉପକୃତ ହୋଇପାରନ୍ତେ। ପ୍ରଶାସନ ଆମ ସମସ୍ୟାର ସମାଧାନ କରୁ।
-ମନୁ ଦେହୁରୀ, କଳାଧ୍ୱନି
