ଅସ୍ତରଙ୍ଗ,୩।୨(ଡି.ଏନ୍.ଏ.): ପୁରୀ ଜିଲା ମୃତ୍ତିକା ସଂରକ୍ଷଣ ବିଭାଗ ଅଧୀନରେ ଅସ୍ତରଙ୍ଗ ବ୍ଲକରେ ଚାରାରୋପଣ ଓ ରାଡ୍ ଯୋଜନାରେ ଦୁର୍ନୀତି ହୋଇଥିବା ଅଭିଯୋଗରେ ମଙ୍ଗଳବାର ଭୁବନେଶ୍ୱର ଭିଜିଲାନ୍ସର ଡିଏସପି ଅନୁପମା ମହାପାତ୍ରଙ୍କ ନେତୃତ୍ୱରେ ୬ଜଣିଆ ଟିମ୍ ୨ ପଞ୍ଚାୟତରେ ଖୋଳତାଡ଼ କରିଛନ୍ତି। ସୂଚନାଯୋଗ୍ୟ, ଏହି ବ୍ଲକର ଝାଡ଼ଲିଙ୍ଗ ଓ ନୂଆଗଡ଼ ପଞ୍ଚାୟତରେ ଚାରା, ରାଡ୍ ଯୋଜନାରେ ଦୁର୍ନୀତି ହୋଇଥିବା ନେଇ ଅଞ୍ଚଳର ସାମାଜିକ କର୍ମୀ ଜିତେନ୍ଦ୍ର ସ୍ବାଇଁ ଭିଜିଲାନ୍ସ ନିକଟରେ ଅଭିଯୋଗ କରିଥିଲେ। ତେବେ ପୂର୍ବରୁ ମଧ୍ୟ ବ୍ଲକରେ ମୃତ୍ତିକା ବିଭାଗରେ ଦୁର୍ନୀତି ହୋଇଥିବା ଅଭିଯୋଗରେ ଭିଜିଲାନ୍ସ ଟିମ ଯାଞ୍ଚ କରି ଫେରିଥିଲେ। ତେବେ ଏବେ ପୁଣି ଅଭିଯୋଗ ହେବା ପରେ ଭିଜିଲାନ୍ସ ଟିମ୍ ଅଭିଯୋଗକାରୀଙ୍କୁ ଧରି ୨ ପଞ୍ଚାୟତ ବୁଲି ଯାଞ୍ଚ କରିଥିଲେ। ପ୍ରଥମେ ଟିମ୍ ଝାଡ଼ଲିଙ୍ଗରେ ପହଞ୍ଚି ଗଛ ଗଣିବା ସମେତ ମୃତ୍ତିକା ସଂରକ୍ଷଣ ଦର୍ଶାଉଥିବା ବିଭିନ୍ନ ସ୍ଥାନର ପ୍ରକଳ୍ପ କାର୍ଯ୍ୟ ଯାଞ୍ଚ କରିଥିଲେ। ସେହିପରି ନୂଆଗଡ଼ରେ ପଞ୍ଚାୟତରେ ରାଡ୍ ଯୋଜନାରେ ଗାଈ ଓ ଛେଳିମେଣ୍ଢା ହାତେଇଥିବା ଅଧିକାଂଶ ମଧ୍ୟରୁ ପ୍ରାୟ ୮ଜଣ ହିତାଧିକାରୀଙ୍କ ଘରକୁ ଯାଇ କିଏ ପ୍ରକୃତ ଯୋଗ୍ୟ ବା ଅଯୋଗ୍ୟ ତାହା ଟିମ୍ ତନଖି କରିଥିଲେ। ଏହି ହିତାଧିକାରୀଙ୍କ ମଧ୍ୟରେ ବିଜୟ ମହାନ୍ତି, ଦୀପ୍ତି କାଣ୍ଡି, ଶରତ ମହାନ୍ତି, ବୈରାଗୀ ମହାନ୍ତି, ଡଲି ଦାସ, ଶାନ୍ତନୁ ମହାନ୍ତି, ରାଜୁ ପ୍ରଧାନ, ଆଶୁତୋଷ ବାରିକଙ୍କ ଘରକୁ ଯାଇ ତନଖି କରିବା ଜିତେନ୍ଦ୍ର ସୂଚନା ଦେଇଛନ୍ତି। ରାଡ୍ ଯୋଜନାର ତାଲିକାରେ ବହୁ ପ୍ରଭାବଶାଳୀ, ଚାରିଚକିଆ ଓ ଧନୀ ପରିବାର ଥିବା ଭିଜିଲାନ୍ସ ଟିମ୍ ସୁରାକ ପାଇବା ଜିତେନ୍ଦ୍ର କହିଛନ୍ତି। ଖୁବଶୀଘ୍ର ତଦନ୍ତ କାର୍ଯ୍ୟ ଶେଷ କରି ଆସନ୍ତା ୧୮ ତାରିଖ ପୂର୍ବରୁ ଲୋକାୟୁକ୍ତକୁ ରିପୋର୍ଟ ଦେବାକୁ ପ୍ରସ୍ତୁତ ହେଉଥିବା ଟିମ୍ର ମୁଖ୍ୟ ଡିଏସ୍ପି ମହାପାତ୍ର ସୂଚନା ଦେଇଛନ୍ତି। ଟିମ୍ ମଧ୍ୟରେ ପୁରୀ ଜିଲା ମୃତ୍ତିକା ସଂରକ୍ଷଣ ବିଭାଗର ଅଫିସର ସ୍ବୟଂପ୍ରଭା ଦାସ ଓ ବିଶ୍ୱଜିତ ପ୍ରଧାନ, ଜିଲା ଉଦ୍ୟାନ କୃଷି ବିଭାଗର ୨ ଅଫିସର ସାମିଲ
ହୋଇ ବିଭିନ୍ନ ପ୍ରକଳ୍ପ ସ୍ଥାନ ଯାଞ୍ଚ କରିଥିଲେ।
