ନୂଆଦିଲ୍ଲୀ,୨୮।୭: ଭାରତ-ଶ୍ରୀଲଙ୍କା ମଧ୍ୟରେ ୩ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଆରମ୍ଭ ହୋଇଛି। ରବିବାର ପ୍ରଥମ ମୁକାବିଲା ଖେଳାଯାଇଥିଲା। ଏଥିରେ ଭାରତ ୩୮ ରନ୍ରେ ବିଜୟୀ ହୋଇଥିଲା। ମ୍ୟାଚ୍ରେ ଦୁଇ ଖେଳାଳି ପୃଥ୍ବୀ ଶ’ ଏବଂ ବରୁଣ ଚକ୍ରବର୍ତ୍ତୀ ଭାରତ ପାଇଁ ଟି୨୦ ଅନ୍ତର୍ଜାତୀୟ କ୍ରିକେଟରେ ଡେବ୍ୟୁ କରିଥିଲେ। ପୃଥ୍ବୀ ତାଙ୍କର ପ୍ରଥମ ମ୍ୟାଚ୍ରେ କୌଣସି ରନ୍ କରିପାରି ନ ଥିଲେ। ସେହିଭଳି ସ୍ପିନର ଚକ୍ରବର୍ତ୍ତୀ ୨୮ ରନ୍ ଦେଇ ଗୋଟିଏ ଉଇକେଟ ନେଇଥିଲେ।
ଜଣେ ଇଞ୍ଜିନିୟରରୁ କ୍ରିକେଟର ପାଲଟିଥିବା ବରୁଣଙ୍କୁ ଅଷ୍ଟ୍ରେଲିଆ ଗସ୍ତରେ ଆସିବାର ସୁଯୋଗ ମିଳିଥିଲା। ହେଲେ ଆହତ କାରଣରୁ ସେ ଏହି ସୁଯୋଗ ହରାଇଥିଲେ। ଏହାପରେ ଫିଟ୍ନେସ୍ ସମସ୍ୟା କାରଣରୁ ତାଙ୍କୁ ଇଂଲଣ୍ଡ ବିପକ୍ଷରେ ଡେବ୍ୟୁ କରିବାକୁ ବାରଣ କରାଯାଇଥିଲା। ହେଲେ ଚଳିତ ଥର ଶ୍ରୀଲଙ୍କା ବିପକ୍ଷରେ ଅବସର ମିଳିବା ପରେ ସେ ସମ୍ପୂର୍ଣ୍ଣ ଭାବେ ପ୍ରସ୍ତୁତ ଥିଲେ। ସେ ୨୮ ରନ୍ ଦେଇ ଗୋଟିଏ ଉଇକେଟ ନେଇଥିଲେ।
ଏବେ ଭାରତର ପୂର୍ବତନ ବ୍ୟାଟ୍ସମ୍ୟାନ୍ ଭିଭିଏସ୍ ଲକ୍ଷ୍ମଣ ମଧ୍ୟ ବରୁଣଙ୍କ ବୋଲିଂ କରିବାର କ୍ଷମତାକୁ ନେଇ ଅତ୍ୟନ୍ତ ପ୍ରଭାବିତ ହୋଇଛନ୍ତି। ଦ୍ୱିତୀୟ ଟି୨୦ ପୂର୍ବରୁ ସେ ଏହି ମିଷ୍ଟ୍ରି ସ୍ପିନରଙ୍କ ପ୍ରଶଂସା କରିଛନ୍ତି। ସେ ବରୁଣଙ୍କ ଭିତରେ ‘ଏକ୍ସ ଫ୍ୟାକ୍ଟର’ ଦେଖନ୍ତି ବୋଲି ସେ କହିଛନ୍ତି।
ଷ୍ଟାରସ୍ପୋଟ୍ସର ଶୋ’ ଗେମ୍ ପ୍ଲାନ୍ରେ ଲକ୍ଷ୍ମଣ କହିଛନ୍ତି, ସର୍ବପ୍ରଥମେ ବରୁଣ ଡେବ୍ୟୁ କରିବାର ସୁଯୋଗ ପାଇଥିବାରୁ ମୁଁ ବହୁତ ଖୁସି। ସେ ପୂର୍ବରୁ ଦୁଇଥର ମନୋନୀତ ହୋଇଥିଲେ ମଧ୍ୟ ଫିଟନେସ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇ ପ ଥିବାରୁ ଦଳର ଅଂଶ ହୋଇପାରି ନ ଥିଲେ। ସନରାଇଜର୍ସ ବ୍ୟାଟ୍ସମ୍ୟାନ୍ଙ୍କ ସହ କଥାବାର୍ତ୍ତା ହେବା ବେଳେ ବରୁଣଙ୍କ ବୋଲିଂକୁ ସେମାନେ ପ୍ରଶଂସା କରିଥିଲେ। ସେ ନୂଆ ବଲ୍ରେ ଭଲ ବୋଲିଂ କରିପାରିବେ। ଯେତେବେଳେ ଅଧିନାୟକ ଏବଂ ଦଳ ଏକ ଭାଗିଦାରୀକୁ ଭାଙ୍ଗିବାକୁ ଚାହାନ୍ତି, ସେତେବେଳେ ସେ ଉଇକେଟ ନେଇପାରିବେ। ଏହାର ଅର୍ଥ ତାଙ୍କ ପାଖରେ ଏକ୍ସ-ଫ୍ୟାକ୍ଟର ଅଛି। ତେବେ ସେ ଅନ୍ତର୍ଜାତୀୟ କ୍ରିକେଟରେ ଅଭିଜ୍ଞତା ହାସଲ କରନ୍ତୁ। ଏଭଳି କରିବାରେ ଏକମାତ୍ର ଉପାୟ ହେଉଛି ଖେଳିବା। ଗୋଟିଏ ମ୍ୟାଚ୍ରୁ ଚମତ୍କାର ଆଶା କରନାହିଁ। ଜଣେ ଖେଳାଳିଙ୍କ ଉପରେ ଧୌର୍ଯ୍ୟ ଏବଂ ବିଶ୍ୱାସ ଦେଖାଇବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଲକ୍ଷ୍ମଣ କହିଛନ୍ତି।
