ଶିମଲା,୪।୫: ଶିମଲା ମ୍ୟୁନିସିପାଲିଟି କର୍ପୋରେଶନ ନିର୍ବାଚନରେ ଭାଜପା ଏଥର ପରାଜୟର ସମ୍ମୁଖୀନ ହୋଇଛି। ତେବେ କଂଗ୍ରେସ ଏଥର ପୁଣି ବାଜି ମାରି ନେଇଛି। ଏହାକୁ ଭାଜପାର ଲଗାତାର ପରାଜୟର ହ୍ୟାଟ୍ରିକ କୁହାଯାଉଛି। ଏହାପୂର୍ବରୁ ୨୦୨୧ ଉପ-ନିର୍ବାଚନରେ, ୨୦୨୨ ବିଧାନସଭା ନିର୍ବାଚନରେ ଏବଂ ବର୍ତ୍ତମାନ ୨୦୨୩ ମ୍ୟୁନିସିପାଲିଟି କର୍ପୋରେଶନ ଶିମଲା ନିର୍ବାଚନରେ ଭାଜପା ପରାସ୍ତ ହୋଇଛି। ମ୍ୟୁନିସିପାଲିଟି କର୍ପୋରେଶନ ଶିମଲା ନିର୍ବାଚନ ଜୁନ ୨୦୨୨ରେ ଅନୁଷ୍ଠିତ ହେବାକୁ ଥିଲା, କିନ୍ତୁ କୋର୍ଟରେ ଏହି ମାମଲା ଥିବାରୁ ନିର୍ବାଚନ ୧୧ମାସ ବିଳମ୍ବରେ ହୋଇଥିଲା। ଏହି ସମୟରେ ରାଜ୍ୟରେ ବିଧାନସଭା ନିର୍ବାଚନ ହୋଇଥିଲା ଏବଂ ହିମାଚଳ ପ୍ରଦେଶରେ କଂଗ୍ରେସ କ୍ଷମତାକୁ ଆସିଥିଲା। ରାଜ୍ୟରେ କଂଗ୍ରେସ କ୍ଷମତାରେ ଥିବାରୁ ଭାଜପାକୁ ମ୍ୟୁନିସିପାଲିଟି କର୍ପୋରେଶନ ନିର୍ବାଚନରେ ବିପୁଳ କ୍ଷତି ସହିବାକୁ ପଡିଥିଲା।
