ନୂଆଦିଲ୍ଲୀ,୫।୬:ନିକଟରେ ଶେଷ ହୋଇଥିବା IPLରେ ଚମତ୍କାର ପ୍ରଦର୍ଶନ କରିଥିବା ବୈଭବ ସୂର୍ଯ୍ୟବଂଶୀଙ୍କୁ ନେଇ ଥମୁନି ଚର୍ଚ୍ଚା। କେବଳ ଲୋକପ୍ରିୟତା ନୁହେଁ ବରଂ ବିଶ୍ୱର ସବୁଠାରୁ ବଡ଼ କ୍ରିକେଟ ଲିଗ ମଧ୍ୟ ତାଙ୍କୁ ଧନୀ କରିଛି। ମାତ୍ର ୧୫ ବର୍ଷ ବୟସରେ ବୈଭବ ୭ କୋଟି ଟଙ୍କାର ସମ୍ପତ୍ତି ସଂଗ୍ରହ କରିଛନ୍ତି। ଯେହେତୁ ବୈଭବ ଜଣେ ନାବାଳକ, ତେଣୁ ପ୍ରଶ୍ନ ଉଠେ: ତାଙ୍କର ରୋଜଗାର ଉପରେ କି ଟିକସ ପଡ଼ିବ? ଯଦି ହଁ, ତେବେ ଭାରତୀୟ ଆଇନ ଅନୁଯାୟୀ ତାଙ୍କୁ କେତେ ଟିକସ ଦେବାକୁ ପଡିବ? ଏସବୁ ପ୍ରଶ୍ନ ଏବେ ପ୍ରଶଂସକଙ୍କ ମନରେ ଚାଲିଛି।
ବୈଭବ ସୂର୍ଯ୍ୟବଂଶୀଙ୍କ ଆୟର ପ୍ରାଥମିକ ଉତ୍ସରେ ତାଙ୍କର IPL ଚୁକ୍ତି, ଅନୁମୋଦନ, ପ୍ରାୟୋଜକ ଚୁକ୍ତି ଏବଂ ବିଜ୍ଞାପନ ସାaମିଲ ଅଛି। ରାଜସ୍ଥାନ ରୟାଲ୍ସ ତାଙ୍କୁ IPL ୨୦୨୬ ପାଇଁ ୧.୧୦ କୋଟିରେ ରଖିଥିଲା। ତଥାପି ସିଜନ ପାଇଁ ତାଙ୍କର ମୋଟ ରୋଜଗାର ୩ କୋଟି ଅତିକ୍ରମ କରିଥିଲା। ଏଥିରେ ମ୍ୟାଚ ଫି ଏବଂ ପୁରସ୍କାର ରାଶି ସାମିଲ ଥିଲା। ତାଙ୍କର ମୁମ୍ବାଇରେ ଏକ ଆପାର୍ଟମେଣ୍ଟ ଅଛି।
ଆୟକର ଆଇନର ଧାରା 64(1A) ଅନୁଯାୟୀ, ଜଣେ ନାବାଳକ ଦ୍ୱାରା ପ୍ରାପ୍ତ ଆୟକୁ ତାଙ୍କ ମାତାପିତାଙ୍କ ଆୟ ସହିତ ମିଶ୍ରିତ କରାଯାଏ। ତା’ପରେ ସେହି ପରିମାଣ ଉପରେ ଆୟକର ଲାଗୁ କରାଯାଏ, ଏହାକୁ ପିତାମାତାଙ୍କ ଆୟର ଏକ ଅଂଶ ଭାବରେ ବିବେଚନା କରାଯାଏ।
ପ୍ରାପ୍ତବୟସ୍କଙ୍କ ତୁଳନାରେ ନାବାଳକଙ୍କ ପାଇଁ ଆୟକର ଆଇନ ଭିନ୍ନ ଭାବରେ କାର୍ଯ୍ୟ କରେ। ଯଦି ଜଣେ ନାବାଳକ ଏକ ଆର୍ଥିକ ବର୍ଷରେ ୧,୫୦୦ ପର୍ଯ୍ୟନ୍ତ ରୋଜଗାର କରନ୍ତି, ତେବେ ସେହି ପରିମାଣ ଉପରେ କୌଣସି ଟିକସ ଲାଗୁ ହୁଏ ନାହିଁ। ଯଦି ଜଣେ ନାବାଳକ ଏକ ବର୍ଷରେ ୧,୫୦୦ରୁ ଅଧିକ ରୋଜଗାର କରନ୍ତି, ତେବେ ନିର୍ଦ୍ଦିଷ୍ଟ ପରିସ୍ଥିତି ଉପରେ ନିର୍ଭର କରି କର ପ୍ରଯୁଜ୍ୟ ହୋଇପାରେ।
– ଯଦି ଉଭୟ ମାତାପିତା ଚାକିରି କରନ୍ତି, ତେବେ ନାବାଳକର ଆୟ ଅଧିକ ରୋଜଗାର କରୁଥିବା ପିତାମାତାଙ୍କ ଆୟ ସହିତ ମିଶ୍ରିତ ହୁଏ।
– ଯଦି ମାତାପିତା ଅଲଗା ରୁହନ୍ତି, ତେବେ ନାବାଳକର ଆୟ ପିଲାଟି ରହୁଥିବା ମାତାପିତାଙ୍କ ଆୟ ସହିତ ମିଶ୍ରିତ ହୁଏ।
– ଯଦି କୌଣସି ମାତାପିତା ଜୀବିତ ନାହାଁନ୍ତି, ତେବେ ସେହି ପରିସ୍ଥିତିରେ ଏକ ପୃଥକ ଆୟକର ରିଟର୍ଣ୍ଣ ଦାଖଲ କରାଯାଏ।
Dharitri – Odisha’s No.1 Odia Daily
