ଭୁବନେଶ୍ୱର, ୨୪।୧(ବ୍ୟୁରୋ): ରାଜ୍ୟରେ କୋଭିଡ୍ ଟିକାକରଣ ଅଭିଯାନ ସଫଳ ଭାବେ ଚାଲିଛି। ସର୍ବଭାରତୀୟ ସ୍ତରରେ ଟିକାକରଣରେ ଓଡ଼ିଶା ତୃତୀୟ ସ୍ଥାନରେ ରହିଛି ବୋଲି ସ୍ବାସ୍ଥ୍ୟ ଓ ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ ଶନିବାର ସୂଚନା ଦେଇଛନ୍ତି। ସୂଚନାନୁଯାୟୀ, କର୍ନାଟକ ଓ ଆନ୍ଧ୍ରପ୍ରଦେଶ ପରେ ତୃତୀୟ ସ୍ଥାନରେ ଓଡ଼ିଶା ରହିଛି। ଗତ ୭ଦିନ ଭିତରେ କର୍ନାଟକରେ ସର୍ବାଧିକ ୧,୮୨, ୫୦୩ ଜଣ ସ୍ବାସ୍ଥ୍ୟକର୍ମୀ ଟିକା ନେଇଛନ୍ତି। ଓଡ଼ିଶାରେ ବର୍ତ୍ତମାନ ସୁଦ୍ଧା ୧,୩୦,୦୦୭ ଜଣଙ୍କୁ ଟିକା ଦିଆଗଲାଣି। ପାଣିଗ୍ରାହୀ କହିଛନ୍ତି, ସମସ୍ତଙ୍କର ଟିକାକରଣ କରିବାକୁ ଚେଷ୍ଟା କରାଯିବ। ଶୁକ୍ରବାର ଲକ୍ଷ୍ୟ ଧାର୍ଯ୍ୟଠାରୁ ଅଧିକ ଲୋକଙ୍କୁ ଟିକା ଦିଆଯାଇଛି। ମୋଟ ୧୬,୩୮୪ ଜଣଙ୍କୁ ଟିକା ଦିଆଯାଇଛି। ୨୨୧ ସେସନ ସାଇଟ୍ରେ ୨୦,୩୩୦ ସ୍ବାସ୍ଥ୍ୟକର୍ମୀଙ୍କୁ ଟିକା ଦିଆଯିବ।
ସେପଟେ ରାଜ୍ୟକୁ ତୃତୀୟ ପର୍ଯ୍ୟାୟରେ ଟିକା ଆସି ପହଞ୍ଚତ୍ଛି। ତେବେ ଏଥର ଭାରତ ବାୟୋଟେକ୍ର ‘କୋଭାକ୍ସିନ’ ଟିକା ଆସିଛି। ଶନିବାର ସକାଳ ୮ଟା ୧୭ମିନିଟ୍ରେ ଏକ ସ୍ବତନ୍ତ୍ର କାର୍ଗୋ ବିମାନରେ ୧,୪୯, ୭୬୦ ଡୋଜ୍ କୋଭାକ୍ସିନ ଅଣାଯାଇିଛି। ଏସବୁ ଷ୍ଟେଟ୍ ଭାକ୍ସିନ୍ ଷ୍ଟୋରରୁ ରିଜିଓନାଲ ଷ୍ଟୋରକୁ ପଠାଯିବ। ସେଠାରୁ ପ୍ରତି ଜିଲାକୁ ଯିବ। ସେହିପରି ହିତାଧିକାରୀଙ୍କୁ ଗୋଟିଏ କମ୍ପାନୀର ହିଁ ଟିକା ଦିଆଯିବ। ଅର୍ଥାତ ପ୍ରଥମ ଡୋଜ୍ ଯାହା ଦିଆଯିବ, ଦ୍ୱିତୀୟ ଡୋଜ୍ ମଧ୍ୟ ସେହି ଟିକା ଦିଆଯିବ। ଏପରି ନ କଲେ ଶରୀରର ପ୍ରତିରୋଧକ ଶକ୍ତି ଉପରେ ପ୍ରଭାବ ପଡ଼ିବ ବୋଲି ନିର୍ଦ୍ଦେଶକ ପାଣିଗ୍ରାହୀ କହିଛନ୍ତି।
ରାଜ୍ୟରେ ଶନିବାର ମଧ୍ୟ ଧାର୍ଯ୍ୟ ଟିକାକରଣଠାରୁ ଅଧିକ ହୋଇଛି। ୨୨୪ଟି ସେସନରେ ୨୧,୩୦୪ ଜଣଙ୍କୁ ଟିକା ପ୍ରଦାନ ପାଇଁ ଲକ୍ଷ୍ୟ ରଖାଯାଇଥିଲା। ତେବେ ୨୨, ୩୬୪ ଜଣଙ୍କୁ ଟିକାକରଣ କରାଯାଇଛି। ଫଳରେ ୧୦୫ ପ୍ରତିଶତ ଟିକାକରଣ ହୋଇଥିବା ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ କୁହାଯାଇଛି। ଏଥିମଧ୍ୟରୁ କୋଭିଶିିଲ୍ଡ ୨୦,୭୯୪ ଜଣଙ୍କୁ ଦିଆଯିବାର ଥିବାବେଳେ ୨୧,୮୯୮ ଜଣଙ୍କୁ ଦିଆଯାଇଛି। ସେହିପରି ୫୧୦ ଜଣଙ୍କୁ କୋଭାକ୍ସିନ ଟିକା ଦିଆଯିବାକୁ ଲକ୍ଷ୍ୟ ରହିଥିବା ବେଳେ ୪୬୬ଜଣଙ୍କୁ ଟିକାକରଣ କରାଯାଇଥିବା ବିଭାଗ ପକ୍ଷରୁ କୁହାଯାଇଛି। ତେବେ ଶନିବାର କୌଣସି ହିତାଧିକାରୀଙ୍କର ପାର୍ଶ୍ୱ ପ୍ରତିକ୍ରିୟା ଦେଖାଯାଇ ନ ଥିବା ଜଣାପଡ଼ିଛି। ଅନ୍ୟପକ୍ଷରେ ରାଜ୍ୟରେ ସଂକ୍ରମଣ ହାର ଧୀରେ ଧୀରେ ହ୍ରାସ ପାଉଛି। ଗତ ୨୪ ଘଣ୍ଟାରେ ରାଜ୍ୟରେ ଆଉ ୧୩୦ଜଣ ଆକ୍ରାନ୍ତ ଚିହ୍ନଟ ହୋଇଥିବାବେଳେ ଜଣଙ୍କ ମୃତ୍ୟୁ ହୋଇଛି। ଫଳରେ ରାଜ୍ୟରେ ଏବେ ମୋଟ ଆକ୍ରାନ୍ତଙ୍କ ସଂଖ୍ୟା ୩,୩୪,୧୫୦ରେ ପହଞ୍ଚତ୍ଥିବାବେଳେ ମୃତ୍ୟୁ ସଂଖ୍ୟା ୧,୯୦୪କୁ ଛୁଇଁଛି।
