ଏଡ୍ମଣ୍ଟନ,୨ା୬: ବିଶ୍ୱକପ୍ ପୂର୍ବରୁ ସୋମବାର ଅନୁଷ୍ଠିତ ଏକ ଓ୍ବାର୍ମଅପ୍ ମ୍ୟାଚରେ ଉଜ୍ବେକିସ୍ତାନକୁ ୨-୦ ଗୋଲ୍ରେ ପରାସ୍ତ କରି କାନାଡ଼ା। କାନାଡ଼ା ଜାତୀୟ ଦଳ ସହିତ ତାଙ୍କ ୯୦ତମ ପଦାର୍ପଣରେ ଜୋନାଥନ ଓସୋରିଓ ଖେଳର ଦ୍ୱିତୀୟାର୍ଦ୍ଧରେ ଏକ ଗୋଲ୍ ସ୍କୋର କରିଥିଲେ।
ଓସୋରିଓ ମ୍ୟାଚର ଦ୍ୱିତୀୟାର୍ଦ୍ଧରେ ଖେଳିବାକୁ ଆସିଥିଲେ। ୫୮ତମ ମିନିଟ୍ରେ ଉଜ୍ବେକିସ୍ତାନ ଗୋଲ୍କିପର ଅବ୍ଦୁଭୋହିଦ ନେମାତୋଭଙ୍କୁ ପରାସ୍ତ କରି ଏକ ଚମତ୍କାର ଫିଲ୍ଡ ଗୋଲ ଦେଇଥିଲେ। ୨୦୨୩ ପରେ କାନାଡ଼ା ତରଫରୁ ଏହା ଥିଲା ତାଙ୍କର ପ୍ରଥମ ଗୋଲ୍।
ବଦଳ ଖେଳାଳି ଭାବେ ଆସିଥିବା ଜେଡେନ ନେଲ୍ସନ ଷ୍ଟପେଜ ଟାଇମ୍ରେ କାନାଡ଼ା ତରଫରୁ ଦ୍ୱିତୀୟ ଗୋଲ୍ଟିକୁ ସ୍କୋର କରିଥିଲେ। ଉଭୟ ଥର ଗୋଲ୍ ସ୍କୋର ବେଳେ ଟାନି ଓଲୁଓ୍ବାସେଇ ସହାୟତା କରିଥିଲେ। କୋଚ୍ ଜେସ ମାର୍ଶ ଶୁକ୍ରବାର କାନାଡ଼ା ଦଳ ଘୋଷଣା କରିଛନ୍ତି।
ହାମଷ୍ଟ୍ରିଙ୍ଗ୍ ଇଞ୍ଜୁରୀ ସତ୍ତ୍ୱେ ଆଲ୍ଫୋନ୍ସୋ ଡେଭିସଙ୍କୁ ସେ ଦଳରେ ସ୍ଥାନ ଦେଇଛନ୍ତି। ଆଲ୍ଫୋନ୍ସୋ ବିଶ୍ୱକପ୍ରେ ଦଳର ଓପନିଂ ମ୍ୟାଚ ହୁଏତ ଖେଳି ନପାରନ୍ତି। କାନାଡା ଜୁନ୍ ୧୨ରେ ବିଶ୍ୱକପ୍ର ଗ୍ରୁପ୍ ‘ବି’ରେ ଏହାର ପ୍ରଥମ ମ୍ୟାଚ୍ ଟରଣ୍ଟୋଠାରେ ବୋସ୍ନିଆ ଓ ହର୍ଜଗୋଭିନାକୁ ଭେଟିବ। ଅନ୍ୟପକ୍ଷରେ ଉଜ୍ବେକିସ୍ତାନ ଗ୍ରୁପ୍ ‘କେ’ରେ ଏହାର ଓପନିଂ ମ୍ୟାଚ ଜୁନ୍ ୧୭ରେ ମେକ୍ସିକୋ ସହରରେ କଲମ୍ବିଆ ସହ ମୁକାବିଲା କରିବ।
