ନୂଆଦିଲ୍ଲୀ,୧୫।୨: ୟୁଜରଙ୍କ ଗୋପନୀୟତା ନେଇ ଫେସ୍ବୁକ୍ ଏବଂ ହ୍ବାଟସ୍ ଆପ୍କୁ ସୁପ୍ରିମ୍କୋର୍ଟ ଭର୍ସନା କରିଛନ୍ତି। ୟୁଜରଙ୍କ ଗୋପନୀୟତା ସର୍ବୋପରି। ଏଥିରେ ହସ୍ତକ୍ଷେପ ସହ୍ୟ କରାଯିବ ନାହିଁ। ହ୍ବାଟସ୍ ଆପ୍ର ନୂଆ ଗୋପନୀୟତା ନୀତି ଯୋଗୁ ହୋଇଥିବା ବିବାଦର ଶୁଣାଣି ସମୟରେ ସୁପ୍ରିମ୍କୋର୍ଟ ଏଭଳି କହିଛନ୍ତି। ଫେସ୍ବୁକ୍ ଓ ହ୍ବାଟସ୍ ଆପ୍ ୨ ଅବା ୩ ଟ୍ରିଲିୟନ୍ର କମ୍ପାନୀ ହୋଇ ଥାଇପାରନ୍ତି। ତେବେ ୟୁଜରଙ୍କ ଗୋପନୀୟତା ବଜାୟ ରଖିବା ଅତ୍ୟାବଶ୍ୟକ। ସୋମବାର ସୁପ୍ରିମ୍କୋର୍ଟ କହିଛନ୍ତି ଯେ, ୟୁଜରଙ୍କ ମେସେଜ୍ ପଢ଼ାଯାଉ ନ ଥିବା ନେଇ ଫେସ୍ ବୁକ୍ ଏବଂ ହ୍ବାଟସ୍ ଆପ୍ ଲିଖିତ ଭାବେ ସେମାନଙ୍କର ଉତ୍ତର ଦାଖଲ କରନ୍ତୁ। ସେହିପରି ଭାରତ ଏବଂ ୟୁରୋପରେ ଗୋପନୀୟତା ନୀତିକୁ ନେଇ ଭିନ୍ନ ଭିନ୍ନ ମାନଦଣ୍ଡ ଗ୍ରହଣ କରାଯାଇଥିବାରୁ ପ୍ରଧାନ ବିଚାରପତି ଶରଦ ଅରବିନ୍ଦ ବୋବ୍ଡେଙ୍କ ନେତୃତ୍ୱରେ ଗଠିତ ଖଣ୍ଡପୀଠ କ୍ଷୋଭ ପ୍ରକାଶ କରିଛନ୍ତି। ଏହି ମାମଲାର ପରବର୍ତ୍ତୀ ଶୁଣାଣି ୪ ସପ୍ତାହ ପରେ ହେବ ବୋଲି କୋର୍ଟ ସୂଚନା ଦେଇଛନ୍ତି। ଭାରତରେ ଆଗାମୀ ଦିନରେ ତଥ୍ୟ ସୁରକ୍ଷା ଆଇନ ପ୍ରଣୟନ କରାଯିବ। ତେବେ ଏହା ପୂର୍ବରୁ ହ୍ବାଟସ୍ ଆପ୍ ଅପେକ୍ଷା ନ କରି ନିଜସ୍ବ ଗୋପନୀୟତା ନୀତି ଲାଗୁ କରିସାରିଛି। ସୂଚନାଯୋଗ୍ୟ, ୨୦୧୬ରେ ହ୍ବାଟସ୍ ଆପ୍ ପକ୍ଷରୁ ଅଣାଯାଇଥିବା ଗୋପନୀୟତା ନୀତି ନେଇ ୟୁଜରଙ୍କ ତଥ୍ୟ ସୁରକ୍ଷା ପାଇଁ ଭାରତ ସରକାର କେଉଁ ପ୍ରକାର ଆଇନ ପ୍ରଣୟନ କରିବେ ତାହାର ଉତ୍ତର କେନ୍ଦ୍ର ସରକାରଙ୍କଠାରୁ ସୁପ୍ରିମ୍କୋର୍ଟ ଲୋଡ଼ି ସାରିଛନ୍ତି। ଏହା ଉପରେ ସରକାର ନିଜସ୍ବ ମତ ଉପସ୍ଥାପନ କେବେ କରିବେ ତାହାକୁ ଅପେକ୍ଷା କରାଯାଇଛି।
