ଓ୍ବାଶିଂଟନ୍,୨୧।୭: କରୋନା ଦ୍ୱିତୀୟ ଲହର ଏବେ ଧୀରେ ଧୀରେ ନିୟନ୍ତ୍ରଣକୁ ଆସୁଛି। କରୋନା ଦୈନିକ ସଂକ୍ରମଣ ସ୍ଥିର ରହୁଥିବା ବେଳେ ସମ୍ଭାବ୍ୟ ତୃତୀୟ ଲହରର ବିପଦ ଏବେ ବଢ଼ିବାରେ ଲାଗିଛି। ପୂର୍ବରୁ କରୋନା ଦ୍ୱିତୀୟ ଲହର ଭାରତରେ ତାଣ୍ଡବ ରଚିଥିବା ବେଳେ ସରକାରୀ ତଥ୍ୟ ଅନୁସାରେ ଏଥିରେ ପ୍ରାୟ ୪ଲକ୍ଷରୁ ଉର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଛି। ଏହାରି ଭିତରେ ଆମେରିକା ଏକ ରିପୋର୍ଟ ଜାରି କରିଛି। ଯେଉଁଥିରେ ଭାରତ ସରକାରଙ୍କ ରିପୋର୍ଟ ତୁଳନାରେ ମୃତ୍ୟୁ ସଂଖ୍ୟା ୧୦ଲକ୍ଷ ଗୁଣା ଅଧିକ ରହିଛି। ଅର୍ଥାତ୍ ୨୦୨୦ରୁ ୨୦୨୧ ମଧ୍ୟରେ ଭାରତରେ ଏପର୍ଯ୍ୟନ୍ତ କରୋନା ସଂକ୍ରମଣରେ ୫୦ଲକ୍ଷ ଲୋକଙ୍କ ମୃତ୍ୟୁ ଘଟିଛି। ଏନେଇ ମଙ୍ଗଳବାର ଓ୍ବାଶିଂଟନ୍ ସ୍ଥିତ ସେଣ୍ଟର ଫର୍ ଗ୍ଲୋବାଲ ଡେଭଲ୍ପମେଣ୍ଟ (ସିଜିଡି) ଏକ ରିପୋର୍ଟ ଜାରି କରି ଦାବି କରିଛି। ସେରୋଲୋଜିକାଲ ଷ୍ଟଡି, ଘରକୁ ଘର ସର୍ଭେ ଓ ରାଜ୍ୟ ସ୍ତରରେ ନଗର ନିଗମର ସରକାରୀ ତଥ୍ୟ ଓ ଅନ୍ତର୍ଜାତୀୟ ଆକଳନ ଉପରେ ଏହି ରିପୋର୍ଟ ଆଧାରିତ ବୋଲି ସଂସ୍ଥା ପକ୍ଷରୁ କୁହାଯାଇଛି। ଏହି ରିପୋର୍ଟର ବିଶେଷତ୍ୱ ହେଉଛି ରିପୋର୍ଟର ଲେଖକଙ୍କ ମଧ୍ୟରେ ମୋଦି ସରକାରଙ୍କ ମୁଖ୍ୟ ଅର୍ଥନୈତିକ ପରାମର୍ଶଦାତା ଅରବିନ୍ଦ ସୁବ୍ରମଣ୍ୟମ ମଧ୍ୟ ସାମିଲ ରହିଛନ୍ତି। ତେବେ ସ୍ବାଧୀନତା ପରଠାରୁ ଏହା ଭାରତର ସବୁଠାରୁ ବଡ ଦୁଃଖଦ ଘଟଣା ବୋଲି ସିଜିଡି ପକ୍ଷରୁ କୁହାଯାଇଛି। ସ୍ବାସ୍ଥ୍ୟ ମନ୍ତ୍ରଣାଳୟ ଅନୁସାରେ ଭାରତରେ କରୋନା ଯୋଗୁ ଏପର୍ଯ୍ୟନ୍ତ ୪,୧୮,୪୭୦ ଜଣଙ୍କର ମୃତ୍ୟୁ ଘଟିଛି। ଯାହା ବିଶ୍ୱରେ ତୃତୀୟ ସ୍ଥାନରେ ରହିଛି। ସେହିପରି ଆମେରିକାରେ କରୋନାଜନିତ ୬୦,୯୦୦୦ ଏବଂ ବ୍ରାଜିଲରେ ୫୪,୨୦୦୦ ମୃତ୍ୟୁ ଘଟିଛି। ସିଜିଡ଼ି ରିପୋର୍ଟ ଅନୁସାରେ କରୋନାରେ ସର୍ବାଧିକ ମୃତ୍ୟୁ ଆମେରିକାରେ ହୋଇଛି। ପୂର୍ବରୁ ଅନେକ ସଂସ୍ଥା ମଧ୍ୟ ଆମେରିକା କ୍ଷେତ୍ରରେ ସମାନ ଦାବି କରିଥିଲେ। ଅନ୍ୟପଟେ ଉକ୍ତ ଗବେଷଣା ସଂସ୍ଥାର ରିପୋର୍ଟ ପରେ ଏବେ କେନ୍ଦ୍ର ସରକାରଙ୍କ କୋଭିଡ ମୃତ୍ୟୁ ରିପୋର୍ଟ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି।
