ମୁମ୍ବାଇ/ଇସ୍ଲାମାବାଦ,୧୦ା୫: ଦ୍ୱିତୀୟ ବିଶ୍ୱଯୁଦ୍ଧ ସମୟରେ ୧୯୪୫ ଅଗଷ୍ଟ ୬ରେ ଜାପାନର ହିରୋଶିମା ଉପରେ ଆମେରିକା ଆକାଶମାର୍ଗରୁ ଏକ ୧୦ ଫୁଟ୍ (୩ ମିଟର) ଲମ୍ବର ବୋମା ପକାଇଥିଲା। ବିସ୍ଫୋରଣରେ ୧ ମିନିଟରୁ କମ୍ ସମୟ ଭିତରେ ସବୁକିଛି ଶେଷ ହୋଇଯାଇଥିଲା। ଏଥିରେ ହଜାର ହଜାର ଲୋକଙ୍କ ମୃତ୍ୟୁ ଘଟିଥିଲା। ଯୁଦ୍ଧରେ ପରମାଣୁ ବୋମାର ଏହା ଥିଲା ପ୍ରଥମ ପ୍ରୟୋଗ, ଯେଉଁଥିରେ ୟୁରାନିୟମ୍ ବ୍ୟବହାର କରାଯାଇଥିଲା। ମହାରାଷ୍ଟ୍ର ଆତଙ୍କବାଦ ନିରୋଧୀ ଦଳ (ଏଟିଏସ୍) ବୁଧବାର ମୁମ୍ବାଇରୁ ଏଭଳି ୭.୧ କେ.ଜି ଓଜନର ୟୁରାନିୟମ୍ ଜବତ କରିବା ପରେ ଆର୍ଥିକ ରାଜଧାନୀର ନିରାପତ୍ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ସ୍ବରାଷ୍ଟ୍ର ମନ୍ତ୍ରଣାଳୟର ନିର୍ଦ୍ଦେଶକ୍ରମେ ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ଏହି ମାମଲାର ତଦନ୍ତ ଭାର ହାତକୁ ନେଇଛି। ଅନ୍ୟପକ୍ଷେ ଭାରତରେ ଏହି ରେଡିଓଧର୍ମୀ ଘାତକ ଧାତୁ ଜବତ ହେବା ପରେ ପାକିସ୍ତାନ ଉଦ୍ବେଗ ପ୍ରକାଶ ସହ ବେଆଇନ ୟୁରାନିୟମ୍ କାରବାରର ପୁଙ୍ଖାନୁପୁଙ୍ଖ ତଦନ୍ତ ଦାବି କରିଛି।
ମେ’ ୫ରେ ମୁମ୍ବାଇ ଏଟିଏସ୍ ଜିଗର ଜୟେଶ ପାଣ୍ଡ୍ୟା(୨୭) ଓ ଅବୁ ତାହିର ଅଫଜଲ ଚୌଧରୀ(୩୧)ଙ୍କଠାରୁ ୭.୧ କେ.ଜି. ପ୍ରାକୃତିକ ୟୁରାନିୟମ୍ ଜବତ କରି ଉଭୟଙ୍କୁ ଗିରଫ କରିଥିଲା। ଏହାର ମୂଲ୍ୟ ପ୍ରାୟ ୨୧.୩ କୋଟି ଟଙ୍କା ହେବ ବୋଲି ଆକଳନ କରାଯାଇଛି। ଏଟିଏସ୍ କାଲାଚୌକିରେ ଉଭୟଙ୍କ ବିରୋଧରେ ଏକ ମାମଲା ରୁଜୁ କରିଥିଲା। ଦୁଇ ଅଭିଯୁକ୍ତ ଉକ୍ତ ୟୁରାନିୟମ୍କୁ ଅନ୍ଲାଇନ୍ରେ ୨୫ କୋଟି ଟଙ୍କାରେ ବିକ୍ରି କରିବାକୁ ଚାହୁଁଥିବାବେଳେ ମୁମ୍ବାଇ ଏଟିଏସ୍ର ନାଗପାଡ଼ା ୟୁନିଟ୍ ଜଣେ ଛଦ୍ମବେଶୀ ଗ୍ରାହକଙ୍କୁ ପଠାଇ ଏହାର ନମୁନା ହାତେଇଥିଲା। ଜବତ ପରେ ତାକୁ ଭାବା ଆଟମିକ୍ ରିସର୍ଚ୍ଚ ସେଣ୍ଟର(ବିଏଆର୍ସି)କୁ ଯାଞ୍ଚ ପାଇଁ ପଠାଯାଇଥିଲା। ବିଏଆର୍ସି ଏହା ନାଚୁରାଲ ୟୁରାନିୟମ୍ ବୋଲି ସ୍ପଷ୍ଟ କରିଛି। ଭାରତରେ ବିନା ଲାଇସେନ୍ସରେ ୟୁରାନିୟମ୍ ରଖିବା ବେଆଇନ। ଏହାର ଉଲ୍ଲଂଘନ କଲେ ଆଟମିକ୍ ଏନର୍ଜି ଆଇନ,୧୯୬୫ ବଳରେ କଠୋର ଦଣ୍ଡର ବ୍ୟବସ୍ଥା ରହିଛି। ପୋଲିସ ଉକ୍ତ ଆଇନର ଧାରା ୨୪(୧)(କ) ବଳରେ ଏକ ମାମଲା (ନଂ.୧୪/୨୧) ରୁଜୁ କରିଛି। ଏହା ପୂର୍ବରୁ ୨୦୧୬ରେ ଠାଣେ ପୋଲିସ ବେଆଇନ ୟୁରାନିୟମ୍ କାରବାରର ପର୍ଦ୍ଦାଫାଶ କରି ୨ ଜଣଙ୍କୁ ଗିରଫ କରିଥିଲା। ସେତେବେଳେ ଜବତ ହୋଇଥିବା ୮ କେ.ଜି. ୟୁରାନିୟମ୍ର ଆନୁମାନିକ ମୂଲ୍ୟ ୨୪ କୋଟି ଟଙ୍କା ହେବ ବୋଲି ଆକଳନ କରାଯାଇଥିଲା। ଏଠାରେ ପ୍ରଶ୍ନ ଉଠେ ଆଣବିକ ପାଓ୍ବାର ପ୍ଲାଣ୍ଟରେ ବ୍ୟବହାର ହେଉଥିବା ରେଡିଓ ଆକ୍ଟିଭ୍ ମେଟାଲ ୟୁରାନିୟମ୍କୁ ବେଆଇନ ଭାବେ କିପରି ବିକ୍ରି କରାଯାଉଛି। ବିଶେଷଜ୍ଞଙ୍କ ମତରେ ଫିସିଲ୍ ଆଇସୋଟୋପ୍ ରହିତ ଡିପ୍ଲେଟେଡ୍ ୟୁରାନିୟମ୍ (ଡିୟୁ)କୁ କର୍କଟର ରେଡିଏଶନ ଥେରାପି ଏବଂ ରେଡିଓ ଆକ୍ଟିଭ୍ ସାମଗ୍ରୀ ପରିବହନରେ ମଧ୍ୟ ବ୍ୟବହାର କରାଯାଇଥାଏ। ସିଲ୍ଭର ଭଳି ଚକଚକିଆ ଧାତୁ ୟୁରାନିୟମ୍ର ଉଚ୍ଚ ସାନ୍ଧ୍ରତା ଯୋଗୁ ଏହାକୁ ବିମାନ ଓ ଅନ୍ୟ ଶିଳ୍ପ ଉପକରଣରେ ମଧ୍ୟ ବ୍ୟବହାର କରାଯାଏ।
ମନ୍ଖୁର୍ଦ୍ଦ ନିବାସୀ ଅବୁ ତାହିର ଚୌଧରୀଙ୍କ ବାପା ଜଣେ ସ୍କ୍ରାପ୍ ଡିଲର। ଦୁଇବର୍ଷ ତଳେ ସେ
ଏକ ଶିଳ୍ପ ଆବର୍ଜନା ଭର୍ତ୍ତି ଟ୍ରକ୍ କିଣିଥିଲେ। ସେଥିରୁ ସେ ଏହି ୟୁରାନିୟମ୍ ପାଇଥିଲେ ବୋଲି କୁହାଯାଉଛି। ସେତେବେଳେ ତାହିର ଏହାକୁ ଲୁଚାଇ ରଖିଥିଲେ ଏବଂ ଚଳିତ ଲକ୍ଡାଉନ୍ ବେଳେ ପାଣ୍ଡ୍ୟାଙ୍କ ସହ ଏହାକୁ ବିକିବା ପାଇଁ ଯୋଜନା କରିଥିଲେ। ଅନ୍ଲାଇନ୍ରେ ବିକ୍ରି ଉଦ୍ୟମ ବେଳେ ଉଭୟେ ଧରାପଡ଼ିଥିଲେ। ଦୁହଁିଙ୍କୁ ବୁଧବାର ଏକ ସ୍ଥାନୀୟ କୋର୍ଟରେ ହାଜର କରାଯାଇଥିଲା। କୋର୍ଟ ମେ’ ୧୨ ପର୍ଯ୍ୟନ୍ତ ଏଟିଏସ୍ ହାଜତକୁ ରିମାଣ୍ଡରେ ପଠାଇଥିବାବେଳେ ଆତଙ୍କବାଦୀ ଆକ୍ରମଣର ତଦନ୍ତ କରୁଥିବା ଏନ୍ଆଇଏ କେନ୍ଦ୍ର ସରକାରଙ୍କ ସୁପାରିସ କ୍ରମେ ଏହି ମାମଲା ହାତକୁ ନେଇଛି। ଏବେ ଏହାକୁ ନେଇ ସୋସିଆଲ ମିଡିଆରେ ନାନା ସନ୍ଦେହ ବ୍ୟକ୍ତ କରାଯାଉଛି। ୧୯୯୩ ମୁମ୍ବାଇ ସିରିୟଲ ବ୍ଲାଷ୍ଟ ଭଳି ବିଧ୍ୱଂସକ କାର୍ଯ୍ୟରେ ଏହି ୟୁରାନିୟମ୍କୁ ବ୍ୟବହାର କରିବାକୁ ଯୋଜନା ଥିଲା କି ବୋଲି ଅନେକେ ପ୍ରଶ୍ନ କରିଛନ୍ତି। ଅନ୍ୟପକ୍ଷେ ଭାରତରୁ ୟୁରାନିୟମ୍ ଜବତ ହେବା ପରେ ଇସ୍ଲାମାବାଦ ଚିନ୍ତାବ୍ୟକ୍ତ କରିଛି। ପାକିସ୍ତାନର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଜାହିଦ ହାଫିଜ୍ ଚୌଧରୀ ଶନିବାର ଏହାର ପୁଙ୍ଖାନୁପୁଙ୍ଖ ତଦନ୍ତ ଦାବି କରିଛନ୍ତି। ଆଣବିକ ସାମଗ୍ରୀଗୁଡ଼ିକର ନିରାପତ୍ତା ସମସ୍ତ ଦେଶର ସର୍ବୋଚ୍ଚ ପ୍ରାଥମିକତା ହେବା ଆବଶ୍ୟକ। ଏହାର ତଦନ୍ତ କରାଯାଉ ବୋଲି ସେ ଟୁଇଟ୍ କରିଛନ୍ତି।
