ଢେଙ୍କାନାଳ ଅଫିସ,୮।୫: କରୋନା ସଂକ୍ରମିତ ବୋଲି କେହି ପାଖ ମାଡ଼ିଲେନି। ଜୀବନ ଭୟରେ ଲୁଚିଲେ କୋଭିଡ୍ ଯୋଦ୍ଧା। ବହୁକଷ୍ଟରେ ହସ୍ପିଟାଲ ଯାଏ ଆସିଥିଲେ ହେଁ ଶଯ୍ୟା ପର୍ଯ୍ୟନ୍ତ ନେବାକୁ ପହଞ୍ଚତ୍ଲାନି କାହାରି ସହାୟତାର ହାତ। ଫଳରେ ଛଟପଟ ହୋଇ ଚାଲିଗଲା ଜଣେ ମହିଳା ରୋଗୀଙ୍କ ଜୀବନ। ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟ ପରିସରରେ ଶୁକ୍ରବାର ଏଭଳି ଏକ ହୃଦୟ ବିଦାରକ ଘଟଣା ଘଟିଛି, ଯାହା ଜିଲାର କୋଭିଡ୍ ପରିଚାଳନା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ଢେଙ୍କାନାଳ ଜିଲା ଯୋରନ୍ଦା ଅଞ୍ଚଳର ସମ୍ପୃକ୍ତ ମହିଳାଙ୍କ ସ୍ବାସ୍ଥ୍ୟାବସ୍ଥା ହଠାତ୍ ବିଗିଡ଼ି ଯାଇଥିଲା। ସେ ନିଜ ଝିଅଙ୍କ ସହିତ ଏକ ଅଟୋରିକ୍ସାରେ ଜିଲା ମୁଖ୍ୟ ଚିକିତ୍ସାଳୟକୁ ଆସିଥିଲେ। ଆଣ୍ଟିଜେନ୍ ଟେଷ୍ଟ ରିପୋର୍ଟରୁ ପଜିଟିଭ୍ ବୋଲି ଜଣାପଡ଼ିବା ପରେ ସେ ଘରେ ରହି ଚିକିତ୍ସିତ ହେବାକୁ ଇଚ୍ଛାପ୍ରକାଶ କରିଥିଲେ। ଆବଶ୍ୟକ ଔଷଧ ନେଇ ଫେରୁଥିବାବେଳେ ଡାକ୍ତରଖାନାଠାରୁ ୨ କିଲୋମିଟର ଦୂରରେ ସେ ପୁଣି ଅସୁସ୍ଥ ଅନୁଭବ କରିଥିଲେ। ତାଙ୍କୁ ପୁଣି ଜିଲା ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିଲା। ଗୁରୁତର ହୋଇପଡ଼ିଥିବା ମା’ଙ୍କୁ ତୁରନ୍ତ ଚିକିତ୍ସା ସହାୟତା ପ୍ରଦାନ କରିବାକୁ ଝିଅ ଆକୁଳ ନିବେଦନ କରିଥିଲେ ମଧ୍ୟ କୌଣସି ସ୍ବାସ୍ଥ୍ୟ କର୍ମଚାରୀ ପାଖ ମାଡ଼ି ନ ଥିଲେ। ଫଳରେ ଚିକିତ୍ସାଳୟ ସମ୍ମୁଖ ବାରଣ୍ଡାରେ ପଡ଼ି ପଡ଼ି ମହିଳାଙ୍କ ମୃତ୍ୟୁ ହୋଇଯାଇଥିଲା। ସୂଚନା ପାଇ ଜିଲା ମୁଖ୍ୟ ଚିକିତ୍ସାଧିକାରୀ ଡା. ସୁଜାତାରାଣୀ ମିଶ୍ର ପହଞ୍ଚତ୍ଥିଲେ। କେତେଜଣ ସାମାଜିକ କର୍ମୀ ପିପିଇ କିଟ୍ ପିନ୍ଧି ମୃତଦେହକୁ ମର୍ଚୁରୀରେ ଭର୍ତ୍ତି କରିଥିଲେ। କରୋନା ରୋଗୀଙ୍କୁ ଆବଶ୍ୟକ ସମସ୍ତ ସହାୟତା ଯୋଗାଇ ଦେବାକୁ ରାଜ୍ୟ ସରକାର ଗୁରୁତ୍ୱ ଦେଉଛନ୍ତି। କୋଭିଡ୍ ରୋଗୀଙ୍କ ସେବାରେ ନିୟୋଜିତ ସ୍ବାସ୍ଥ୍ୟ କର୍ମଚାରୀଙ୍କୁ ଆଗଧାଡ଼ିର ଯୋଦ୍ଧା ମାନ୍ୟତା ଦିଆଯାଇଛି। ଏହା ସତ୍ତ୍ୱେ ସ୍ବାସ୍ଥ୍ୟକର୍ମୀଙ୍କ ଆଖି ଆଗରେ ଛଟପଟ ହୋଇ ଜଣେ ରୋଗୀଙ୍କ ଜୀବନ ଚାଲିଯିବା ଜିଲାର କୋଭିଡ୍ ପରିଚାଳନାର ବାସ୍ତବତାକୁ ପଦାକୁ ଆଣିଛି।
ଏ ସଂକ୍ରାନ୍ତରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ସୁଜାତାରାଣୀ ମିଶ୍ର କୁହନ୍ତି, ମହିଳା ରୋଗୀ ଜଣକ କୋଭିଡ୍ ପଜିଟିଭ୍ ଟିହ୍ନଟ ହୋଇଥିଲେ। ତାଙ୍କୁ କୋଭିଡ୍ ହସ୍ପିଟାଲରେ ରହିବା ପାଇଁ ଡାକ୍ତର ପରାମର୍ଶ ଦେଇଥିଲେ। ହେଲେ ସେ ଘରେ ଚିକିତ୍ସିତ ହେବେ ବୋଲି କହି ଔଷଧ ନେଇଯାଇଥିଲେ। ପୁଣି ଅସୁସ୍ଥ ହେବାରୁ ଅଧା ରାସ୍ତାରୁ ଫେରି ଆସିଥିଲେ। ଅଟୋ ଚାଳକ ତାଙ୍କୁ ବାହାରେ ଛାଡ଼ି ପଳାଇଥିଲେ। ଫଳରେ ତାଙ୍କର ମୃତ୍ୟୁ ହୋଇଯାଇଥିଲା। ମୃତଦେହକୁ ମର୍ଚୁରିରେ ରଖାଯାଇଥିବା ସେ ସୂଚନା ଦେଇଛନ୍ତି।
