ଭୁବନେଶ୍ୱର, ୨୧।୯ (ବ୍ୟୁରୋ): କାହା ମଧ୍ୟରେ ନ ଥିଲା ସାମାଜିକ ଦୂରତା। ପୁଣି କାହା ମୁହଁରେ ମାସ୍କ ନ ଥିବାବେଳେ ଆଉ କାହାର କାନରୁ ତଳକୁ ଝୁଲି ରହିଥିଲା। ପୂରା ବ୍ୟସ୍ତରେ ଥିଲେ ବ୍ୟବସାୟୀ, ଆଉ ଅମାନିଆ ହୋଇ ପଡ଼ିଥିଲେ ଗ୍ରାହକ। ଖୁନ୍ଦାଖୁନ୍ଦି ଗହଳି ଭିତରେ ଚାଲିଥିଲା ବେପାର। ଦଳଦଳ ହୋଇ ଚିହ୍ନା ପରିଚିତଙ୍କ ମଧ୍ୟରେ ପଡ଼ିଥିଲା ଚହଳ। କିଏ କହୁଥିଲା ଏତେ କଟକଣାରେ କ’ଣ ଚଳିହେବ। ପୁଣି କିଏ କହୁଥିଲା କରୋନା ଭିତରେ ଏମିତି ତ ଜୀବନ ଚାଲିବ। ରବିବାର ରାଜଧାନୀର ପ୍ରମୁଖ ୟୁନିଟ୍-୧ ଅସ୍ଥାୟୀ ପରିବା ହାଟରେ ଏ ପରିସ୍ଥିତି କହୁଥିଲା କରୋନା କଟକଣାକୁ ନେଇ ଆଉ ଉଲ୍ଲଂଘନକାରୀଙ୍କର ଭୟ ନାହିଁ।
ଭୁବନେଶ୍ୱର ଓ କଟକରେ ସଂକ୍ରମଣ ବଢ଼ୁଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅସନ୍ତୋଷ ପ୍ରକାଶ କରିବା ପରେ ଉଲ୍ଲଂଘନକାରୀଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ପାଇଁ ଡିଜିପି ଅଭୟ ଗୁରୁବାର ନିର୍ଦ୍ଦେଶ ଦେଇଥିଲେ। ଏହାପରଠାରୁ କମିଶନରେଟ ଓ ପୌର ପ୍ରଶାସନ ପକ୍ଷରୁ ଦୋକାନ, ବଜାର, ହାଟ, ଛକରେ ଯାଞ୍ଚ ଓ ଜରିମାନାକୁ ଜୋର୍ଦାର କରାଯାଉଛି। ପ୍ରତିଦିନ କେବଳ ଭୁବନେଶ୍ୱରରୁ ପାଖାପାଖି ୩ହଜାର ଅମାନିଆ ଧରାପଡି ତଣ୍ଡ ଗଣୁଛନ୍ତି। ସେହିଭଳି ଗାଇଡ୍ଲାଇନ୍ ଉଲ୍ଲଂଘନ କରୁଥିବା ବ୍ୟବସାୟ ପ୍ରତିଷ୍ଠାନ ଓ ଦୋକାନକୁ ମଧ୍ୟ ସିଲ୍ କରାଯାଉଛି। ଏପରି ପଦକ୍ଷେପ ଯୋଗୁ ୩ଦିନ ହେବ ବ୍ୟବସାୟୀମାନେ ଦୋକାନ ଖୋଲିବାକୁ ଭୟ କରୁଥିବାବେଳେ ଲୋକେ ମଧ୍ୟ ପଦାକୁ ପୂର୍ବଭଳି ବାହାରି ନ ଥିଲେ। ଫଳରେ ଅଧିକାଂଶ ହାଟବଜାର ଖାଁଖାଁ ରହିଥିଲା। କିନ୍ତୁ ରବିବାର ଆଉ ସମ୍ଭାଳି ପାରି ନ ଥିଲେ ଲୋକେ। ଘରେ ବି ପରିବା ଓ ଅତ୍ୟାବଶ୍ୟକ ସାମଗ୍ରୀ ସରିଯାଇଥିଲା। ରାସ୍ତାପାର୍ଶ୍ୱରେ ପୋଲିସ ଧରିବା ଆଶଙ୍କା ଥିବାରୁ ଲୋକେ ଏକମୁହାଁ ହୋଇ ଧାଇଁଥିଲେ ୟୁନିଟ୍-୧ ଅସ୍ଥାୟୀ ପରିବା ହାଟକୁ। ଫଳରେ ସକାଳୁ ଭିଡ଼ ଆରମ୍ଭ ହୋଇଥିଲା। ପାଗ ଭଲ ଥିବାରୁ ଓ ସେଠାରେ ବିଏମ୍ସି କିମ୍ବା ପୋଲିସର ଯାଞ୍ଚ ନ ଥିବାରୁ ଲୋକେ ଅମାନିଆ ହୋଇଯାଇଥିଲେ। ଯେଉଁସ୍ଥାନରେ ପୋଲିସ ପ୍ରହରା ରହିଥିଲା ସେଠାରେ ସ୍ଥିତି ସ୍ବାଭାବିକ ଥିଲା। କିନ୍ତୁ ୟୁନିଟ୍-୧ ପରିବା ହାଟ ଭଳି ଅନେକ ସ୍ଥାନରେ ଭିଡ଼ ଦେଖିବାକୁ ମିଳିଥିଲା।
କରିବାକୁ ଆସିଥିବା ସରୋଜ ଜେନା କୁହନ୍ତି, ଏବେ ତ ସବୁ ଖୋଲିଗଲା। ଆଉ କ’ଣ ଅଛି? ସମୟ ହେଲେ ତ ହାଟକୁ ସଉଦା କରିବାକୁ ଆସୁଛୁ। ଭିଡ଼ ରହୁଥିଲେ ମଧ୍ୟ ଆସିବାକୁ ପଡ଼ୁଛି। ଏଠି ଯଦି ପଛକୁ ରହି ଅପେକ୍ଷା କରିବୁ ତା’ହେଲେ କିଛି ମିଳିବନି। ପରିବା ବ୍ୟବସାୟୀ ସୁଶାନ୍ତ ଜେନା କୁହନ୍ତି, ଆମେ ସମସ୍ତ ପ୍ରକାର ନିୟମ କାନୁନ ପାଳନ କରୁଛୁ। ହେଲେ ଲୋକ ଭିଡ଼ ଜମାଉଛନ୍ତି। କିପରି ଶୀଘ୍ର ସାମଗ୍ରୀ ନେଇ ଘରକୁ ଯିବେ ସେଇ କଥାରେ ବ୍ୟସ୍ତ କରାଉଛନ୍ତି। ଆମେ ବ୍ୟବସାୟ କରିବାକୁ ଆସୁଛୁ, କାହାକୁ ମନା କରିବୁ? ଆମେ ମନା କଲେ ସେ ପାଖ ଦୋକାନକୁ ଯାଉଛନ୍ତି। ତେଣୁ ଏପରି ସ୍ଥିତିରେ ହିଁ ବ୍ୟବସାୟ କରୁଛୁ ବୋଲି ସେ କହିଛନ୍ତି।
ଅନ୍ୟପକ୍ଷେ ଭୁବନେଶ୍ୱରରେ ବିଏମ୍ସି ଓ କମିଶନରେଟ୍ ପୋଲିସର ଏନ୍ଫୋର୍ସମେଣ୍ଟ ସ୍କ୍ବାଡ୍ କଠୋର କାର୍ଯ୍ୟାନୁଷ୍ଠାନ ନେଉଥିବା ରିପୋର୍ଟ ଦେଉଛି। ହେଲେ ଭୁବନେଶ୍ୱରର ହାଟ ବଜାର ସ୍ଥିତି ଦେଖିବା ପରେ ତାହାସବୁ ସାମୟିକ ଓ ଲୋକଦେଖାଣିଆ ପରି ଲାଗୁଛି। ହାଟରେ ଅସମ୍ଭାଳ ଭିଡ଼ ଜମୁଥିବାବେଳେ ରାସ୍ତାରେ ବୁଲି ବାହାବା ନେଉଛି। ବର୍ତ୍ତମାନ ସହରରେ ଆକ୍ରାନ୍ତଙ୍କ ସଂଖ୍ୟା କମୁଥିବାବେଳେ ଏଭଳି ଆଭିମୁଖ୍ୟ ଆଗକୁ ପୁଣି ପୁନରାବୃତ୍ତି ଘଟାଇବ ବୋଲି ଆଶଙ୍କା ପ୍ରକାଶ ପାଇଛି।
