ପୁରୁଷୋତ୍ତମପୁର,୨୬ା୫( ସୀମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ତଥା କବିସୂର୍ଯନଗର ଥାନା ଅନ୍ତର୍ଗତ ବଡଖରିଡା କାଳେଶ୍ବର ମନ୍ଦିର ନିକଟରେ ରବିବାର ରାତିରେ ଜଣେ ଯୁବକଙ୍କୁ ସଂଘବଦ୍ଧ ଭାବେ ଖଣ୍ଡାରେ ମରଣାନ୍ତକ ଆକ୍ରମଣ କରାଯାଇଛି। ଆକ୍ରମଣର ଶିକାର ହୋଇଥିବା ଯୁବକ ହେଲେ ବଡଖରିଡା ବାଣନଇ ଗ୍ରାମର ବଣ୍ଟି ବାରିକ (୨୬)। କାଳେଶ୍ବର ପୀଠରେ ଯଜ୍ଞ ଚାଲିଥିବାରୁ ସେଠାକୁ ବଣ୍ଟି ଦେଖିବା ଲାଗି ଯାଇଥିବା ବେଳେ ପୂର୍ବ ଶତ୍ରୁତାକୁ ନେଇ ତାଙ୍କୁ ସଂଘବଦ୍ଧ ଭାବେ କିଛି ଯୁବକ ଖଣ୍ଡାରେ ଆକ୍ରମଣ କରି ଫେରାର ହୋଇଯାଇଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ପୁରୁଷୋତ୍ତମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ମାତ୍ର ଅବସ୍ଥା ଗୁରୁତର ଥିବାରୁ ବ୍ରହ୍ମପୁର ବଡମେଡିକାଲକୁ ପଠାଇ ଦିଆଯାଇଛି। ଖବର ପାଇ ପୁରୁଷୋତ୍ତମପୁର ଏସ୍ଡିପିଓ ରଜନୀକାନ୍ତ ଘଟଣାର ତଦନ୍ତ କରିଛି। ବଣ୍ଟି ନାମରେ ପୂର୍ବରୁ କବିସୂର୍ଯନଗର ଥାନାରେ ବହୁ ମାମଲା ରହଛି, ଯାହାଦ୍ବାରା ସେ ଗ୍ରାମଛାଡି ଫେରାର ହୋଇଯାଇଥିବା ବେଳେ ରବିବାର ଆସିଥିଲା ବୋଲି ଏସ୍ଡିପିଓ କହିଛନ୍ତି।
