ଦାରିଙ୍ଗବାଡି,୨୯।୯(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସିଆଙ୍ଗବାଲିଠାରେ ମଙ୍ଗଳବାର ସକାଳ ୬ଟାରେ ସରକାରୀ ବସକୁ ଗ୍ରାମବାସୀ ଅଟକାଇ ରଖିଛନ୍ତି। ବ୍ଲକ ହେଡ଼ କ୍ୱାର୍ଟରଠାରୁ ପଞ୍ଚାୟତ ହେଡକ୍ୱାର୍ଟର ପର୍ଯ୍ୟନ୍ତ ଅର୍ଥାତ ଦାରିଙ୍ଗବାଡିରୁ ସିଆଙ୍ଗବାଲି ପର୍ଯ୍ୟନ୍ତ ଯାତାୟାତ କରୁଥିବା ମୁଖ୍ୟମନ୍ତ୍ରୀ ବସ ସେବା ଅଞ୍ଚଳରେ ଲୋକଙ୍କୁ ସଠିକ ଭାବେ ମିଳୁନାହିଁ। ସିଆଙ୍ଗବାଲିଠାରୁ ଆଉ ଅଢେଇ କିମି କୁସିପାଙ୍କା ଗ୍ରାମ ପର୍ଯ୍ୟନ୍ତ ବସଟି ଚଳାଚଳ କଲେ ଅଞ୍ଚଳର ଲୋକ ମାନେ ସ୍ବାସ୍ଥ୍ୟସେବା ସହ ସରକାରୀ ଓ ବେସରକାରୀ କାର୍ଯ୍ୟାଳୟକୁ ସୁବିଧାରେ ଯାତାୟାତ କରିପାରିବେ।
ସେହିପରି ଉକ୍ତ ଅଞ୍ଚଳରୁ ଛାତ୍ରୀଛାତ୍ରମାନେ ଦାରିଙ୍ଗବାଡିକୁ ଓଡିଶା ଆଦର୍ଶ ବିଦ୍ୟାଳୟ, କଲେଜ ଆଦିକୁ ପଢିବା ପାଇଁ ଯାତାୟାତ କରୁଛନ୍ତି। ଅଟୋ ଭଡା କରି ଅଧିକା ଖର୍ଚ୍ଚାନ୍ତ ହେଉଥିବା ଗ୍ରାମବାସୀ ବାରମ୍ବାର ସ୍ଥାନୀୟ ପ୍ରଶାସନ ନିକଟରେ ଦାବି କରିଆସିଥିଲେ ମଧ୍ୟ କେବଳ ପ୍ରତିଶ୍ରୁତି ମିଳୁଛି। କିନ୍ତୁ କୌଣସି ସୁଫଳ ମିଳୁନାହିଁ।
ତେଣୁ ସିଆଙ୍ଗବାଲି ନୁହେଁ କୁସିପାଙ୍କା ପର୍ଯ୍ୟନ୍ତ ବସ ଚଳାଚଳ ନ କରିବା ପର୍ଯ୍ୟନ୍ତ ଆମେ ଏଠାରେ ବସକୁ ଅଟକାଇ ରଖି ବିକ୍ଷୋଭ କରିବୁ ବୋଲି ଗ୍ରାମର ସେବିତା ପ୍ରଧାନ, ନାଏବ ସରପଞ୍ଚ ମେନକା ପ୍ରଧାନ, ଲୁନୀ ପ୍ରଧାନ, ମୋସେସ ପ୍ରଧାନ, ଅଜୟ ପ୍ରଧାନ, ସୂର୍ଯ୍ୟକାନ୍ତି ପ୍ରଧାନ ପ୍ରମୁଖ କହିଛନ୍ତି ଖବର ଲେଖିବା ସୁଦ୍ଧା ଘଟଣାସ୍ଥଳରେ ମୁଖ୍ୟମନ୍ତ୍ରୀ ବସ ସେବାର କୌଣସି ଅଧିକାରୀ କିମ୍ବା ବିଡ଼ିଓ ପହଞ୍ଚି ନ ଥିବା ଜଣାପଡିଛି ଆନ୍ଦୋଳନ ଅବ୍ୟାହତ ରହିଛି।
Dharitri – Odisha’s No.1 Odia Daily
