ଭୁବନେଶ୍ୱର,୯।୧୨: ସରକାର କହୁଛନ୍ତି ରାଜ୍ୟରେ ଡାକ୍ତର ନାହାନ୍ତି। କିନ୍ତୁ ଏପଟେ ୧୬୦୦ ଡାକ୍ତର ବେକାର ହୋଇ ବସିଛନ୍ତି। ଏଭଳି ଅଭିଯୋଗ ଆଣି ବେକାର ବସିଥିବା ଡାକ୍ତରମାନେ ବୁଧବାର ଆନ୍ଦୋଳନକୁ ଓହ୍ଲାଇଥିଲେ। ବିଧାନସଭା ସମ୍ମୁଖ ଲୋୟର ପିଏମ୍ଜିରେ ଧାରଣାରେ ବସିବା ସହ ବିକ୍ଷୋଭ ପ୍ରଦର୍ଶନ ମାଧ୍ୟମରେ ଦାବି ରଖିଥିଲେ। ଓପିଏସ୍ସି ଦ୍ୱାରା ୨୦୨୧-୨୨ ପାଇଁ ଆସିଥିବା ନିଯୁକ୍ତିପତ୍ରକୁ ବାତିଲ କରିବା ସହ ଯଥାଶୀଘ୍ର ନୂତନ ନିଯୁକ୍ତି ପ୍ରକ୍ରିୟା ଆରମ୍ଭ କରିବା ଓ ପରୀକ୍ଷା ପରେ ଓ୍ବେଟିଂ ଲିଷ୍ଟ ଜାରି କରିବାକୁ ସେମାନେ ଦାବି କରିଛନ୍ତି। ବର୍ତ୍ତମାନ ନିଯୁକ୍ତିପତ୍ରରେ ୧୮୭୧ଟି ପଦବୀରେ ସାଧାରଣ ବର୍ଗ ଡାକ୍ତରଙ୍କ ପାଇଁ ୧୯୬ଟି ପଦବୀ ଅଛି। କିନ୍ତୁ ସାଧାରଣ ବର୍ଗରେ ୧୬୦୦ଡାକ୍ତର ଘରେ ବସିଛନ୍ତି। ଏତେ ସଂଖ୍ୟକ ସଂରକ୍ଷିତ ବର୍ଗର ପଦବୀ ବର୍ଷବର୍ଷ ଧରି ଖାଲି ପଡ଼ୁଥିବା ସତ୍ତ୍ୱେ ୧୬୭୫ ସଂରକ୍ଷିତ ପଦବୀ ପାଇଁ ୧୦୦ଟି ସଂରକ୍ଷିତ ବର୍ଗର ଡାକ୍ତର ନାହାନ୍ତି। ସରକାର ଡାକ୍ତର ନ ଥିବାର ଏକ କୃତ୍ରିମ ଅଭାବ ସୃଷ୍ଟି କରୁଛନ୍ତି ବୋଲି ଏସିବି ଛାତ୍ର ସଂସଦର ପୂର୍ବ ସଭାପତି ଡା. ଦୀପକ ସାମଲ କହିଛନ୍ତି। ଏପରିକି ଭାଜପା ବିଧାୟକ ଡାକ୍ତର ବୁଦ୍ଦାନ ମୁର୍ମୁ ଓ ନବ ଚରଣ ମାଝି ଏହି ସମସ୍ୟାର ସମାଧାନ ସହ ବିଧାନସଭାରେ ଏ ବିଷୟରେ ଉଠାଇବାକୁ ପ୍ରତିଶ୍ରୁତି ଦେଇଥିବା ସେ ଜଣାଇଛନ୍ତି। ଏହି ଅବସରରେ ଡାକ୍ତର ପ୍ରତିନିଧି ଦଳ ରାଜ୍ୟପାଳଙ୍କ ଉଦ୍ଦେଶ୍ୟରେ ଦାବିପତ୍ର ଦେବା ସହ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ସ୍ବାସ୍ଥ୍ୟ ବିଭାଗର ଅତିରିକ୍ତ ଶାସନ ସଚିବଙ୍କୁ ଭେଟି ଦାବି ଓ ସମସ୍ୟା ବିଷୟରେ ଆଲୋଚନା କରିଥିଲେ।
