କଟାହେଉନି ରିଜେକ୍ସନ ନୋଟ୍‌
7:43 amJuly 30, 2023July 30, 2023 / 08

ନୟାଗଡ଼,୩୦ା୭ (ଲୋକନାଥ ମିଶ୍ର)ଓଡ଼ିଶା ରାଜ୍ୟ ପଣ୍ୟାଗାର ନିଗମ (ଓଏସ୍‌ଡବ୍ଲ୍ୟୁସି)ର ଚାଉଳ ଗୋଦାମକୁ ନୟାଗଡ଼ ଜିଲାର କେତେଜଣ ମିଲର ଅଧିକାଂଶ ସମୟରେ ଖରାପ ଚାଉଳ ଯୋଗାଣ କରୁଥିଲେ ମଧ୍ୟ ରିଜେକ୍ସନ ନୋଟ୍‌ କଟା ଯାଉ ନାହିଁ । ମିଲରକୁ ଅନୁକମ୍ପା ଦେଖାଯାଇ ବିଭିନ୍ନ ସମୟରେ ଚାଉଳ ଫେରାଯାଉଥିବା ନଜିର ରହିଛି। ଗତ ୨୫ ତାରିଖରେ କାନକଟା ଗୋଦାମରୁ ଜୟ ମହାବୀର ଫୁଡ୍‌ ପ୍ରଡକ୍ଟସ ପଙ୍କାଳସାହି ଦଶପଲ୍ଲା ମିଲରଙ୍କର ୬ ଲଟ୍‌ ଚାଉଳ ଫେରିଛି । ଚାଉଳ ଗୋଦାମରୁ ବାରମ୍ବାର ନିମ୍ନମାନର ଚାଉଳ ଯୋଗାଣ ସତ୍ତ୍ୱେ ମିଲରଙ୍କ ବିରୋଧରେ କୌଣସି ପଦକ୍ଷେପ ନିଆଯାଉନାହିଁ ା ଫଳରେ ଏଭଳି ଘଟଣା ବଢ଼ି ଚାଲିଛି ।
ସୂଚନା ଅନୁଯାୟୀ, ନୟାଗଡ଼ ଜିଲାରେ ଗୋଟିଏ ଚାଉଳ ଗୋଦାମ ଓ ୨ଟି ଚାଉଳ ସଂଗ୍ରହ କେନ୍ଦ୍ର ରହିଛି । ଗୋତିସାହି ଓ କଦଳୀବନ୍ଧଠାରେ ରାଜ୍ୟ ଚାଉଳ ସଂଗ୍ରହ କେନ୍ଦ୍ର ରହିଥିବାବେଳେ କାନକଟାଠାରେ ଚାଉଳ ଗୋଦାମ ରହିଛି । ଚାଉଳ ଗୋଦାମ ହେଉ କି ଚାଉଳ ସଂଗ୍ରହ କେନ୍ଦ୍ର ହେଉ ପ୍ରତିଟି ସ୍ଥାନକୁ କେତେଜଣ ମିଲର ନିମ୍ନମାନର ଚାଉଳ ଯୋଗାଣ କରୁଥିବା ଅଭିଯୋଗ ହୋଇ ଆସୁଛି । ବେଳେ ବେଳେ ଅଭିଯୋଗ ବାହାରକୁ ଆସୁଛି । ଆଉ ଆପୋସ ସମାଧାନ ମାଧ୍ୟମରେ ନେଣଦେଣ କାରବାରରେ ନିମ୍ନମାନର ଚାଉଳ ଯୋଗାଣ ପ୍ରସଙ୍ଗ ଲୁଚି ଯାଉଛି । ଗୋତିସାହି ଓ କଦଳୀବନ୍ଧଠାରେ ଦୁଇ ଜଣ ପ୍ରୋକରମେଣ୍ଟ ଇନ୍ସପେକ୍ଟର ଚାଉଳ ସଂଗ୍ରହ କେନ୍ଦ୍ରର ଦାୟିତ୍ୱରେ ଅଛନ୍ତି । କାନକଟା ଚାଉଳ ଗୋଦାମରେ ଜଣେ ସୁପରିଟେଣ୍ଡେଣ୍ଟ ଅନୁରୂପ ଭାବେ ଦାୟିତ୍ୱରେ ଅଛନ୍ତି । ନିକଟରେ କାନକଟା ଚାଉଳ ଗୋଦାମର ସୁପରିଟେଣ୍ଡେଣ୍ଟ ସୁରଜିତ ମହାନ୍ତିଙ୍କ ବଦଳି ହୋଇଛି । ସେ ରିଲିଫ ହେବା ପୂର୍ବରୁ ୨ ଲଟ୍‌ ଚାଉଳ ନିମ୍ନମାନର ଦର୍ଶାଯାଇ ଗୋଦାମରେ ବାହାରେ ରଖା ଯାଇଥିଲା । କାନକଟା ଚାଉଳ ଗୋଦାମରେ ନୂଆ ସୁପରିଟେଣ୍ଡେଣ୍ଟ ଭାବେ ରାମଚନ୍ଦ୍ର ବେହେରା ଯୋଗ ଦେବା ପରେ ତାଙ୍କ ସମୟରେ ୪ ଲଟ୍‌ ଚାଉଳ ଗୋଦାମ ବାହାରେ ଥିଲା । ଦୁଇ ସୁପରିଟେଣ୍ଡେଣ୍ଟଙ୍କ ସମୟରେ ୬ ଲଟ୍‌ ଚାଉଳ ଯାହାକି ପ୍ରାୟ ୧୮୦୦ କୁଇଣ୍ଟାଲ ହେବ ଫେରିଛି । ଏହି ଚାଉଳ ଜୟ ମହାବୀର ଫୁଡ୍‌ ପ୍ରଡକ୍ଟସ ପଙ୍କାଳସାହି ଦଶପଲ୍ଲା ମିଲର ଗତ ୨୫ ତାରିଖରେ ଫେରାଇ ନେଇଛନ୍ତି । ପ୍ରଶ୍ନ ଉଠୁଛି ନୟାଗଡ଼ ଜିଲାର ମିଲର ମାନେ ଧାନମଣ୍ଡିରୁ ଚାଷୀଙ୍କଠାରୁ ଉକ୍‌ୃଷ୍ଟ ମାନର ଧାନ କିଶୁଛନ୍ତି । ଧାନରେ ମାନ ଖରାପ ଦର୍ଶାଇ କଟ୍‌ନୀଛଟ୍‌ନୀ କରି ପୁଣି ୧୦ରୁ ୧୫ କେଜି କୁଇଣ୍ଟାଲ ପିଛା କାଟୁଛନ୍ତି । ତେବେ ସରକାରଙ୍କୁ ଚାଉଳ ଫେରାଇ ବେଳେ ନିମ୍ନମାନର ଚାଉଳ ଫେରାଉଛନ୍ତି । ମାନ ପରୀକ୍ଷଣ ପରେ ଯଦି ଏଭଳି ଘଟଣା ନଜରକୁ ଆସୁଛି ତେବେ ସେମାନଙ୍କ ଚାଉଳ ଫେରାଇବା ସମୟରେ ରିଜେକ୍ସନ ନୋଟ କଟା ଯାଉନି କାହିଁକି ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି ା ରିଜେକ୍ସନ ନୋଟ କଟାଗଲେ ମିଲରମାନେ ନିମ୍ନମାନର ଚାଉଳ ଦେବାକୁ ଭୟ କରନ୍ତେ । ତେବେ ଏଭଳି ପଦକ୍ଷେପ ଚାଉଳ ଗୋଦାମ ସୁପରିଟେଣ୍ଡଣ୍ଟ ଓ ଚାଉଳ ସଂଗ୍ରହ କେନ୍ଦ୍ରର ପ୍ରେକରମେଣ୍ଟ ଇନ୍ସପେକ୍ଟର ଜିଲା ଯୋଗାଣ ଅଧିକାରୀଙ୍କୁ ଅବଗତ କରାଇ ନେଉଥିଲେ ଗୋଦାମକୁ ଆଉ ନିମ୍ନମାନର ଚାଉଳ ଯୋଗାଣ ହେଉ ନଥାନ୍ତା । ଏଭଳି ଭୟ ନଥିବାରୁ ବିଭିନ୍ନ ସମୟରେ ଏଭଳି ଘଟଣା ନଜରକୁ ଆସୁଛି। ଗତ ମାର୍ଚ୍ଚ ମାସରେ ଏହି ଗୋଦାମରେ ୫୮୦ କୁଇଣ୍ଟାଲ ଚାଉଳ ପଡି ରହିଥିଲା । ଜୟ ମହାବୀର ଫୁଡ ପ୍ରଡକ୍ଟସ ପଙ୍କାଳସାହି ଦଶପଲ୍ଲାର ମିଲର ଏହି ଚାଉଳ ଦେଇଥିଲେ। ଏହି ଘଟଣାକୁ ନେଇ ତତ୍‌କାଳୀନ ସୁପରିଟେଣ୍ଡେଣ୍ଟ ସୁରଜିତ ମହାନ୍ତିଙ୍କୁ ମାରପିଟ୍‌ କରାଯାଇଥିଲା । ଏନେଇ ଶରଣକୁଳ ଥାନାରେ ମାମଲା ହୋଇଥିଲା । ପରେ ଏହାକୁ ସମାଧାନ କରାଯାଇଥିଲା । ସେହି ମିଲର ପୁଣି ଥରେ ୬ ଲଟ ନିମ୍ନମାନର ଚାଉଳ ଗୋଦାମକୁ ଆଣି ପୁଣି ଫେରାଇ ନେବା ପରେ ଯୋଗାଣ ବିଭାଗର କାର୍ଯ୍ୟ ସନ୍ଦେହ ସୃଷ୍ଟି ହୋଇଛି । ଘଟଣା ସମ୍ପର୍କରେ ଜିଲା ଯୋଗାଣ ଅଧିକାରୀ ତିଳୋତ୍ତମା ପ୍ରଧାନଙ୍କ ୮୨୮୦୦୦୦୫୨୫ ନମ୍ବର ଫୋନକୁ ଯୋଗାଯୋଗ କରାଯାଇଥିଲା। ହେଲେ ତାଙ୍କ ଫୋନ ନଟ ରିଚେବୁଲ ରହିଥିଲା । କାନକଟା ଚାଉଳ ଗୋଦାମର ସୁପରିଟେଣ୍ଡେଣ୍ଟ ରମେଶ ଚନ୍ଦ୍ର ବେହେରାଙ୍କ ୯୪୩୭୩୩୮୪୦୦ ନମ୍ବରକୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ଉଠାଇ ନ ଥିଲେ।