ଘଣ୍ଟାପଡ଼ା,୧୧।୯(ପ୍ରଭାତ କୁମାର ସାହୁ): ବୌଦ୍ଧ ଜିଲା କଣ୍ଟାମାଳ ବ୍ଲକର ତେଲନଦୀ ଘାଟରୁ ବାଲି ଚାଲାଣ ଅବାଧରେ ଚାଲିଛି। ବେଆଇନ ବାଲି ଚାଲାଣ ଯୋଗୁ ସରକାରଙ୍କ ଲକ୍ଷ ଲକ୍ଷ ଟଙ୍କାର ରାଜସ୍ବ ହାନି ହେଉଥିବା ବେଳେ ପ୍ରଶାସନ ଲୋକ ଦେଖାଣିଆ ଚଢାଉ କରିବା ସହ କିଛି ଜରିମାନା ଆଦାୟ କରି ବାଲି ଚୋରାଚାଲାଣକାରୀଙ୍କୁ ଛାଡି ଦେଉଥିବା ଅଭିଯୋଗ ହେଉଛି।
କଣ୍ଟାମାଳ ବ୍ଲକର ପ୍ରାୟ ୬୦ କିଲୋମିଟର ଅଞ୍ଚଳ ଦେଇ ପ୍ରବାହିତ ତେଲନଦୀ ବ୍ଲକର ଜୀବନ ରେଖା କହିଲେ କିଛି ଅତ୍ୟୁକ୍ତି ହେବ ନାହିଁ। ଏହି ବ୍ଲକର ଫାସେଡ଼, ଘଣ୍ଟାପଡ଼ା, କଣ୍ଟାମାଳ, ଲୋକାପଡା, ପଥର୍ଲା, ଗବଜୋର୍ , କିର୍ଲା ପ୍ରଭୃତି ଗାଁଗୁଡ଼ିକର ତେଲନଦୀ ଘାଟରୁ ଟ୍ରାକ୍ଟର, ହାଇୱା ଯୋଗେ ପ୍ରତିଦିନ ଶହ ଶହ ଟ୍ରିପ ବାଲି ଚାଲାଣ ହେଉଛି ା ବାଲି ବୋଝେଇ ଗାଡିଗୁଡିକ ନ ଘୋଡାଇ ରାସ୍ତାରେ ଅତି ଦ୍ରୁତ ଗତିରେ ବେଫିକର ଭାବେ ଯିବାଆସିବା କରୁଛି। ଏଥିଯୋଗୁ ରାସ୍ତାରେ ଧୂଳି ଗୁଣ୍ଡ ଉଡି ଛୋଟ ବଡ଼ ଦୁର୍ଘଟଣା ଘଟୁଛି। ବାଲି ବ୍ୟବସାୟୀଙ୍କ ନଜର ତେଲନଦୀ ଉପରେ ପଡ଼ିଥିବା ବେଳେ ଦୈନନ୍ଦିନ ଏଠାରୁ ଶହ ଶହ ଟ୍ରିପ ବାଲି ଚୋରାଚାଲାଣ ହେଉଥିବା ଦେଖିବାକୁ ମିଳୁଛି । ବାଲି ଚୋରାଚାଲାଣ ହେବା ଯୋଗୁ ତେଲନଦୀର ଶଯ୍ୟା ନଷ୍ଟ ହେବା ସହ ଅନେକ ଖାଲଖମା ସୃଷ୍ଟି ହେଉଛି। ଏପରି କି କଣ୍ଟାମାଳ ବ୍ଲକ ଶିମିଳିପଦର ପଞ୍ଚାୟତ ଅନ୍ତର୍ଗତ କୀର୍ଲା ତେଲନଦୀ ଘାଟରୁ ହାଇଓ୍ବା ସାହାଯ୍ୟରେ ବାଲି ଚୋରାଚାଲାଣ ହୋଇ ସୋନପୁର ପଟକୁ ଯାଉଥିବା ଦେଖିବାକୁ ମିଳିଛି। ଫଳରେ ଗବଯୋର – ବୈଦ୍ୟନାଥ ନୂତନ ସେତୁର ଗବଯୋର ପଟର ଆପ୍ରୋଚ ରାସ୍ତା ଭାଙ୍ଗି ଯାଇଥିବା ଅଭିଯୋଗ ହୋଇଛି । ସରକାରୀ ନିୟମ ଅନୁସାରେ, ଏହି ଆପ୍ରୋଚ ରାସ୍ତାରେ ଆବଶ୍ୟକତା ଠାରୁ ଅଧିକ ଓଜନର ଗାଡି ଚଳାଚଳ କରୁଛି ା ୧୦ ଟନ ଜିନିଷ ଭର୍ତ୍ତି ଗାଡ଼ି ଯିବା ପାଇଁ ଏହି ରାସ୍ତା ଉପଯୋଗୀ ଥିବା ସ୍ଥଳେ ବାଲି ବ୍ୟବସାୟୀମାନେ ୪୦ରୁ ୫୦ ଟନ ଓଜନର ପାଣି ମିଶା ବାଲି ଏହି ରାସ୍ତା ଦେଇ ହାଇଓ୍ବାରେ ନେଉଥିବାରୁ ରାସ୍ତା ଭାଙ୍ଗି ଯାଇଥିବା ସେତୁ ନିର୍ମାଣ ଦାୟିତ୍ୱରେ ଥିବା ଜଣେ କର୍ମଚାରୀ କହିଛନ୍ତି। ଦୀର୍ଘ ବର୍ଷ ହେବ ନଦୀରୁ ବାଲି ଚୋରାଚାଲାଣ ହେଉଥିଲେ ମଧ୍ୟ ତହସିଲ ପ୍ରଶାସନ କୌଣସି ପଦକ୍ଷେପ ନେଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଅନ୍ୟପଟେ ବିଜୁ ପକ୍କା ଘର କିମ୍ବା ଆବାସ ଘର ନିର୍ମାଣ ପାଇଁ ସାଧାରଣ ଲୋକେ ଚଢ଼ା ଦରରେ ବାଲି ଆଣୁଥିବା ଅଭିଯୋଗ କରିଛନ୍ତି। ଅନେକ ବାଲି ଘାଟ ଟେଣ୍ଡର ହୋଇ ନ ଥିବା ବେଳେ ବେପାରୀମାନେ ବେଧଡକ ବାଲି ଚୋରାଚାଲାଣ କରୁଥିବା ଦେଖିବାକୁ ମିଳୁଛି। ଏପରି କି ଲିଜ୍ ହୋଇଥିବା ସ୍ଥାନରେ ରସିଦ ଅନୁସାରେ ଆବଶ୍ୟକ ପରିମାଣର ବାଲି ଉଠାଇବା ପରିବର୍ତ୍ତେ ଜେସିବି ମେଶିନ ସାହାଯ୍ୟରେ ଅଧିକ ବାଲି ଉଠାଣ ହେଉଥିବା ଦେଖିବାକୁ ମିଳିଛି। ଏଥିପ୍ରତି ପ୍ରଶାସନ ତୁରନ୍ତ ଦୃଷ୍ଟି ଦେଇ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ କଣ୍ଟାମାଳ ତହସିଲଦାର କର୍ଣ୍ଣ ମଲ୍ଲିକଙ୍କୁ ପଚାରିବାରେ ଏହାର ତଦନ୍ତ କରି ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
