ଅହମ୍ମଦାବାଦ,୧୧।୨: ପାରିବାରିକ ହିଂସା ମାମଲା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଫଳସ୍ବରୂପ ଅନେକ ଲୋକ ଆତ୍ମହତ୍ୟା କରୁଛନ୍ତି। ଅହମ୍ମଦାବାଦ ସହରରେ ଏମିତି ଏକ ଘଟଣା ଦେଖିବାକୁ ମିଳିଛି। ସ୍ତ୍ରୀଙ୍କ ପ୍ରତାରାଣା ସହି ନ ପାରି ସ୍ବାମୀ ଆତ୍ମହତ୍ୟା କରିଛନ୍ତି। ଫଳରେ ସ୍ତ୍ରୀଙ୍କ ବିରୋଧରେ ଆତ୍ମହତ୍ୟା ମାମଲା ରୁଜୁ ହୋଇଛି। ନିକୋଲ ନ୍ୟୁ ନାରୋଡା ଅଞ୍ଚଳର ବାସିନ୍ଦା ରାଧାଚରଣ ଶର୍ମା ଅଭିଯୋଗ କରିଛନ୍ତି ଯେ ତାଙ୍କ ଭାଇ ଶିବକାନ୍ତ ଶର୍ମା ତାଙ୍କ ଘରର ସପ୍ତମ ମହଲାର ରୋଷେଇ ଗ୍ୟାଲେରୀରୁ ଡେଇଁ ଆତ୍ମହତ୍ୟା କରିଛନ୍ତି। ତେବେ ତାଙ୍କର ଅନ୍ତିମ ସଂସ୍କାର ସମାପ୍ତ ହେବା ପରେ ଭାଇ ପୋଲିସରେ ଏହି ଅଭିଯୋଗ କରିଥିଲେ। ଘଟଣାଦିନ ସ୍ବାମୀ-ସ୍ତ୍ରୀଙ୍କ ମଧ୍ୟରେ ଝଗଡା ଯୋଗୁ ଭାଇ ଏମିତି ପଦକ୍ଷେପ ନେଇଥିବା ସେ ଅଭିଯୋଗ କରିଛନ୍ତି। ସକାଳ ପ୍ରାୟ ୯.୩୦ ସମୟରେ ଶିବକାନ୍ତ ତାଙ୍କ ରୋଷେଇ ଘରକୁ ଯାଇ ଫ୍ରିଜରୁ ଏକ ବୋତଲ ପାଣି ବାହାର କରି ପାଣି ପିଇ ଏହାକୁ ଫିଙ୍ଗି ରୋଷେଇ ଗ୍ୟାଲେରୀରୁ ଡେଇଁ ପଡିଲେ। ତେବେ ବନ୍ଧୁଙ୍କଠାରୁ ଏହା ମଧ୍ୟ ଜାଣିବାକୁ ମିଳିଥିଲା ଯେ ଶିବକାନ୍ତ ତାଙ୍କୁ କହିଥିଲେ ଯେ ତାଙ୍କ ସ୍ତ୍ରୀ ତାଙ୍କୁ ମାନସିକ ନିର୍ଯାତନା ଦେଉଛନ୍ତି। ଏହି ଅଭିଯୋଗ ଆସିବା ପରେ ସ୍ତ୍ରୀଙ୍କ ବିରୋଧରେ ପୋଲିସ ମାମଲା ରୁଜୁ କରିଛି।
