କ୍ୱିଭ୍,୨୭।୨: ରୁଷିଆ ୟୁକ୍ରେନ ଯୁଦ୍ଧକୁ ବିତିଯାଇଛି ତିନିଦିନ। ସାରା ବିଶ୍ୱବାସୀଙ୍କ ନଜର ଏହି ଯୁଦ୍ଧ ଉପରେ ରହିଛି। ଏଭଳି ଘଡ଼ିସନ୍ଧି ମୁହୂର୍ତ୍ତରେ ୟୁକ୍ରେନରେ ଏକ ଛବି ଲୋକଙ୍କ ଦୃ୍ଷ୍ଟି ଆକର୍ଷଣ କରିଛି। ଛବି ହେଉଛି ଜଣେ ସନ୍ଥଙ୍କର ଯେ, ଏକ ଜାଭେଲିନ୍ ଧରି ଛିଡ଼ା ହୋଇଥିବାର ଦେଖାଯାଉଛି। ଜାଭେଲିନ ହେଉଛି ଏକ ଆଣ୍ଟି ଟ୍ୟାଙ୍କ୍ ମିଶାଇଲ୍ ଲଞ୍ଚର। ଖାଲି ୟୁକ୍ରେନରେ ନୁହେଁ ସୋସିଆଲ ମିଡିଆରେ ମଧ୍ୟ ସେଣ୍ଟ ଜାଭେଲିନ୍ଙ୍କ ଫଟୋ ଖୁବ୍ ଭାଇରାଲ ହେବାରେ ଲାଗିଛି। ତେବେ ଏହି ଛବି ପଛରେ ଲୁଚି ରହିଛି ୟୁକ୍ରେନବାସୀଙ୍କ ବିଶ୍ୱାସ। କାରଣ ବର୍ତ୍ତମାନ ସମୟରେ ୟୁକ୍ରେନବାସୀଙ୍କ ଜୀବନ ପ୍ରତି ଘୋର ବିପଦ ଘନେଇ ଆସୁଥିବାବେଳେ ଆଗାମୀ ଦିନରେ ସେମାନେ ଅନେକ ସଙ୍କଟ ଦେଇ ଗତି କରିବା ଆଶଙ୍କା କରାଯାଉଛି।
ଏଭଳି ସଙ୍କଟାପନ୍ନ ସ୍ଥିତିର ମୁକାବିଲା କରିବା ପାଇଁ ‘ସେଣ୍ଟ ଜାଭେଲିନ’ ନାମରେ ଏକ ଓ୍ବେବ୍ସାଇଟ୍ ଲଞ୍ଚ କରାଯାଇଛି, ଯାହା ଜରିଆରେ ୟୁକ୍ରେନ ସଙ୍କଟର ମୁକାବିଲା ପାଇଁ ଅର୍ଥ ଏକତ୍ର କରାଯିବା ସାଙ୍ଗକୁ ଏହା ଜରିଆରେ ପୋଷାକ ଏବଂ ସେଣ୍ଟ ଜାଭେଲିନଙ୍କ ଷ୍ଟିକର ବିକ୍ରି କରାଯାଉଛି। କାନାଡିଆନ ଚାରିଟେବୁଲ ଅର୍ଗାନାଇଜେସନ୍ ଜରିଆରେ ସେଣ୍ଟ ଜାଭେଲିନ୍ ପରିଚାଳିତ ହେଉଛି। ତେବେ ଏହି ସେଣ୍ଟ ଜାଭେଲିନ୍ ୟୁକ୍ରେନବାସୀଙ୍କ ଏକ ପଅକାର ଆସ୍ଥା ପାଲଟିଯାଇଛି।
୯୮୦ରେ ଆମେରିକା ଭାଜେଲିନ ମିଶାଇଲ ଲଞ୍ଚରକୁ ତିଆରି କରିଥିଲା। ଏହାର ଓଜନ ୫୦ ପାଉଣ୍ଡ ହୋଇଥିବାବେଳେ ଲକ୍ଷ୍ୟଭେଦ ପାଇଁ ଏହାକୁ କୌଣସି ମାଇଲ ଲଞ୍ଚର ଆବଶ୍ୟକତା ପଡ଼ି ନ ଥାଏ। ବାୟୁମଣ୍ଡଳରେ ୪୯୦ ଫୁଟ ଦୂର ପର୍ଯ୍ୟନ୍ତ ନିଜ ଲକ୍ଷ୍ୟ ଭେଦ କରିବାର କ୍ଷମତା ଏହି ମିଶାଇଲ ପାଖରେ ରହିଛି। ଅନ୍ୟପଟେ ୟୁକ୍ରେନ ସେନା ଯୁଦ୍ଧରେ ବହୁମାତ୍ରାରେ ଜାଭେଲିନ ବ୍ୟବହାର କରୁଥିବା ଦେଖିବାକୁ ମିଳିଛି। ୟୁକ୍ରେନ ପାଖରେ ଏହି ମିଶାଇଲ ଉପଲବ୍ଧ ନ ଥିବାବେଳେ ପ୍ରତିରକ୍ଷା କ୍ଷେତ୍ରକୁ ଶକ୍ତିଶାଳୀ କରିବା ପାଇଁ ସେ ୨୦୧୮ରେ ଏହି ମିଶାଇଲ ଆମେରିକାଠାରୁ କିଣିଥିଲା।
