ଓ୍ବାଶିଂଟନ୍, ୧୧।୪: ୟୁକ୍ରେନ୍ ଯୁଦ୍ଧ ଉପରେ ଆମେରିକାର ଅତ୍ୟନ୍ତ ଗୋପନ ଦସ୍ତାବିଜ୍ ସୋସିଆଲ ମିଡିଆରେ ଲିକ୍ ହୋଇଯାଇଥିବା ଏହାର ଅଧିକାରୀମାନେ ସ୍ପଷ୍ଟ କରିଛନ୍ତି। କେହି ଜଣେ ଦସ୍ତାବିଜ୍ର ଫଟୋ ଉଠାଇ ସୋସିଆଲ ମିଡିଆ ପ୍ଲାଟ୍ଫର୍ମ ଟେଲିଗ୍ରାମରେ ଛାଡ଼ିଛନ୍ତି। ଉକ୍ତ ପ୍ଲାଟଫର୍ମର ୫୦ କୋଟିରୁ ଊର୍ଦ୍ଧ୍ୱ ୟୁଜର ଥିବା କୁହାଯାଉଛି। ସେଠାରୁ ଏହାକୁ ଟୁଇଟରରେ ଛଡ଼ାଯାଇଛି। ପେଣ୍ଟାଗନ୍ ଅଧିକାରୀମାନେ ସୋସିଆଲ ମିଡିଆରୁ ଏହି କ୍ଲାସିଫାଏଡ୍ ତଥ୍ୟକୁ ହଟାଇବାକୁ ଲାଗିପଡ଼ିଛନ୍ତି। ଉକ୍ତ ଡକ୍ୟୁମେଣ୍ଟରେ କେବଳ ୟୁକ୍ରେନ୍ ଯୁଦ୍ଧ ସମ୍ପର୍କିତ ତଥ୍ୟ ନ ଥିଲା, ବିଶ୍ୱର ଅନ୍ୟ ଭାଗର ଗୋପନ ତଥ୍ୟ ମଧ୍ୟ ରହିଥିଲା। ପେଣ୍ଟାଗନ୍ ଗୋପନୀୟତା ସହ ବଡ଼ ଧରଣର ସାଲିସ୍ କରାଯାଇଥିବା ସନ୍ଦେହ କରାଯାଉଛି। ରୁଷିଆ ସପକ୍ଷବାଦୀ ଟେଲିଗ୍ରାମ ଚ୍ୟାନେଲରେ ଗୁରୁବାର ଡକ୍ୟୁମେଣ୍ଟ ଫଟୋର ୫ଟି ସ୍ଲାଇଡ୍ ପ୍ରକାଶ ପାଇଥିଲା। ୟୁକ୍ରେନ ଯୁଦ୍ଧ ବେଳେ ରୁଷିଆର ୧୬,୦୦୦ରୁ ୧୭,୫୦୦ ସୈନ୍ୟ ମରିଥିବା ଗୋଟିଏ ସ୍ଲାଇଡ୍ରେ ଉଲ୍ଲେଖ ରହିଛି। ଏହା ମାସେ ତଳର ଦସ୍ତାବିଜ୍।
ଗୋପନ ଦସ୍ତାବିଜ୍ ଲିକ୍ ଘଟଣା ସାମ୍ନାକୁ ଆସିବା ପରେ ପେଣ୍ଟାଗନ୍ ସମେତ ନ୍ୟାୟ ବିଭାଗ ତଦନ୍ତରେ ଲାଗିପଡ଼ିଛନ୍ତି। ଗୁପ୍ତ ସାମରିକ ଦସ୍ତାବିଜ୍ କିପରି ଲିକ୍ ହେଲା ଓ ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମକୁ ଗଲା ତାହାର ଖୋଳତାଡ଼ ଚାଲିଛି। ପ୍ରଥମେ ଟେଲିଗ୍ରାମ ଓ ଟୁଇଟରରେ ଉକ୍ତ ଡକ୍ୟୁମେଣ୍ଟ ମିଳିବା ପରେ ଖବରଦାତା, ଗବେଷକ ଓ ସୋସିଆଲ ମିଡିଆ ସହ ସମ୍ପୃକ୍ତ ବ୍ୟକ୍ତିବିଶେଷ, ମାର୍ଚ୍ଚ ୧ରେ ଅନ୍ୟ ସାଇଟ୍ରେ ଲିକ୍ ହୋଇଥିବା ଅତିରିକ୍ତ ଡକ୍ୟୁମେଣ୍ଟ ଖୋଜିବାରେ ଲାଗିପଡ଼ିଥିଲେ। ତେବେ ଡକ୍ୟୁମେଣ୍ଟ ଚୋରି କିମ୍ବା ଲିକ୍ କରିବା ପାଇଁ କିଏ ଦାୟୀ ତାହା କୁହାଯାଇ ନାହିଁ। ଏହା ପଛରେ ରୁଷିଆର ହାତ ଥାଇପାରେ ବୋଲି ସନ୍ଦେହ କରାଯାଉଛି।
