ତୁମୁଡ଼ିବନ୍ଧ,୪ା୨(ଦୀପକ କୁମାର ପରାସେଠ): କନ୍ଧମାଳ ଜିଲା ବେଲଘର ଥାନା ଅଞ୍ଚଳର ୧୪ ବର୍ଷୀୟା ନାବାଳିକାଙ୍କ ସହ ଜଙ୍ଗଲରେ ଦୁଇ ଯୁବକଙ୍କ ବର୍ବରତା ସହ ନିର୍ଯାତନା ଘଟଣାରେ ଦୁଇ ଅଭିଯୁକ୍ତଙ୍କୁ ଗିରଫ କରିଛି ପୋଲିସ।
ଗିରଫ ଦୁଇ ଅଭିଯୁକ୍ତ ନୀତେଶ ନାୟକ ଓ ସୁଶୀଲ ନାୟକ ହୋଇଥିବା ନେଇ ସୂଚନା ଦେଇଛନ୍ତି ବାଲିଗୁଡା ଏସ୍ଡିପିଓ ଶୁଭମ ଭୋସଲେ। ରବିବାର ନାବାଳିକା ଜଣକ ଗାଁ ନାଳକୁ ଏକୁଟିଆ ଗାଧୋଇବାକୁ ଯାଉଥିବା ସମୟରେ ଘଟିଥିଲା ଏପରି ଲୋମହର୍ଷଣକାରୀ ଘଟଣା। ଗିରଫ ଦୁଇ ଅଭିଯୁକ୍ତ ନୀତେଶ ଓ ସୁଶୀଲ ନାବାଳିକାଙ୍କୁ ଅପହରଣ କରି ଜଙ୍ଗଲକୁ ଟେକି ନେଇଥିଲେ। ପରେ ଶାରୀରିକ ସମ୍ପର୍କ ରଖିବା ପାଇଁ ନାବାଳିକାଙ୍କୁ ବାଧ୍ୟ କରିଥିଲେ ଦୁଇ ଅଭିଯୁକ୍ତ। ଏଥିରେ ନାବାଳିକା ଜଣକ ରାଜି ନ ହେବାରୁ ହାତଗୋଡ଼ ବାନ୍ଧି ପାଟିରେ କପଡ଼ା ରଖିଥିଲେ ଦୁଇ ଅଭିଯୁକ୍ତ। ନାବାଳିକାଙ୍କୁ ଶାରୀରିକ ନିର୍ଯାତନା ଦେବା ସହ ଅସଦାଚରଣ କରି ନୃଶଂସ କାଣ୍ଡ ଭିଆଇଥିଲେ ଦୁଇ ଅଭିଯୁକ୍ତ। ନାବାଳିକାଙ୍କ ପୋଷାକ ଚିରି ନାବାଳିକାଙ୍କ ଭିଡିଓ ମଧ୍ୟ ଉତ୍ତୋଳନ କରିବା ସହ ଭାଇରାଲ କରିବାକୁ ଦୁଇ ଅଭିଯୁକ୍ତ ଦେଇଥିଲେ ଧମକ। ପରେ ନାବାଳିକାଙ୍କୁ ହାତ ଗୋଡ଼ ବନ୍ଧା ଅବସ୍ଥାରେ ଛାଡ଼ି ଚାଲି ଯାଇଥିଲେ ୨ କାମାନ୍ଧ ଯୁବକ ନୀତେଶ ଓ ସୁଶୀଲ। ତେବେ ଜଙ୍ଗଲ ମଧ୍ୟରେ ରାତି କାଟି ବହୁ କଷ୍ଟରେ ସୋମବାର କୌଣସି ମତେ ଖସି ଆସି ପରିବାର ଲୋକଙ୍କୁ ଜଣାଇଥିଲେ ପୀଡ଼ିତା ନାବାଳିକା। ପରିବାର ପକ୍ଷରୁ
ଏ ନେଇ ବେଲଘର ଥାନାରେ ଅଭିଯୋଗ ପରେ ୧୦/୨୬ରେ ଏକ ମାମଲା ରୁଜୁ କରି ତଦନ୍ତ କରିଥିଲା ପୋଲିସ। ପୀଡ଼ିତାଙ୍କ ବୟାନ ରେକର୍ଡ କରାଯିବା ସହ ଡାକ୍ତର ମଇନା କରାଯିବା ସହ ଦୁଇ ଅଭିଯୁକ୍ତଙ୍କୁ ଗିରଫ କରିଛି ପୋଲିସ। ଏବେ ବି ଅଧିକ ତଦନ୍ତ ଜାରି ରହିଥିବା କହିଛନ୍ତି ବାଲିଗୁଡା ଏସ୍ଡିପିଓ ଶୁଭମ ଭୋସଲେ।
