ଥୁଆମୂଳ ରାମପୁର,୧।୮ (ଦୁର୍ଗା କୀର୍ତ୍ତି): ସକାଳୁ ସ୍କୁଲକୁ ଯିବା ବେଳେ ଏକ ଅଭାବନୀୟ ଦୁର୍ଘଟଣା ଘଟିଛି। ରାସ୍ତାରେ ଥିବା ଗାଈମାନଙ୍କୁ କାଟି ଯିବା ବେଳେ ସାଇକେଲର ଭାରସାମ୍ୟ ହରାଇ ଛିଟିକି ପଡ଼ିବାରୁ ଦୁଇ ଜଣ ସ୍କୁଲ ଛାତ୍ର ଗୁରୁତର ଆହତ ହୋଇଛନ୍ତି।
ମିଳିଥିବା ସୂଚନା ଅନୁଯାୟୀ, ଶନିବାର ସକାଳ ପ୍ରାୟ ୭ଟା ୩୦ ମିନିଟ୍ ସମୟରେ କାଠକୁର ସ୍କୁଲପଡ଼ାର ଦୁଇ ଜଣ ଛାତ୍ର—ହୃଷୀକେଶ ନାଏକ (୧୬), ପିତା-ଦୟାନିଧି ନାଏକ ଏବଂ ଆନନ୍ଦ ନାଏକ (୧୪), ପିତା-ଶତ୍ରୁଘ୍ନ ନାଏକ, ମର୍ଣ୍ଣିଂ କ୍ଲାସ୍ ପାଇଁ ନିଜ ସାଇକେଲରେ ଥୁଆମୂଳ ଉଚ୍ଚ ବିଦ୍ୟାଳୟକୁ ଯାଉଥିଲେ।
ଏହି ସମୟରେ ଭାଟିପଡ଼ା ଟୁରିଷ୍ଟ ବଙ୍ଗଳା ଗଡ଼ାଣି ରାସ୍ତାରେ କିଛି ଗାଈ ଥିବାରୁ ସେମାନଙ୍କୁ କାଟି ଯିବାକୁ ଚେଷ୍ଟା କରୁଥିବା ବେଳେ ସାଇକେଲର ଭାରସାମ୍ୟ ହରାଇ ଭାଟିପଡ଼ା ଧରଣୀପଦା ନିକଟରେ ଉଭୟ ରାସ୍ତା ଉପରେ ଛିଟିକି ପଡ଼ିଥିଲେ। ଫଳରେ ଦୁଇ ଛାତ୍ର ଗୁରୁତର ଆହତ ହୋଇଥିଲେ।
ସେମାନଙ୍କ ସହ ଆସୁଥିବା ଅନ୍ୟ ଛାତ୍ରମାନେ ତୁରନ୍ତ ସେମାନଙ୍କୁ ଉଦ୍ଧାର କରି ଥୁଆମୂଳ ରାମପୁର ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଆନନ୍ଦଙ୍କ ଛାତି ଓ ମୁଣ୍ଡରେ ଗୁରୁତର ଆଘାତ ଲାଗିଥିବା ଜଣାପଡ଼ିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ଅଧିକ ଚିକିତ୍ସା ପାଇଁ କଳାହାଣ୍ଡି ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଅପରପକ୍ଷରେ ହୃଷୀକେଶଙ୍କ ମୁଣ୍ଡ, ହାତ ଓ ଗୋଡ଼ରେ ଖଣ୍ଡିଆଖାବରା ହୋଇଥିବା ବେଳେ ସ୍ଥାନୀୟ ସ୍ୱାସ୍ଥ୍ୟକେନ୍ଦ୍ରରେ ତାଙ୍କର ଚିକିତ୍ସା ଚାଲିଥିବା ଜଣାପଡ଼ିଛି।
