ଗୋପାଳପୁର,୨୮।୬(ନବୀନ ରାଜ ଆଚାରୀ): ଗଞ୍ଜାମ ଜିଲା ଗୋଳନ୍ଥରା ଥାନା ଅଞ୍ଚଳରେ ରାସ୍ତା ମଝିରେ ଟ୍ରାକ୍ଟର ରଖିବା ନେଇ ଦୁଇ ପଡୋଶୀଙ୍କ ମଧ୍ୟରେ ଗଣ୍ଡଗୋଳ ଘଟିଛି। ଏଥିରେ ପଡୋଶୀ ଜଣକ ରାଗିଯାଇ ଖଣ୍ଡା ଧରି ଅନ୍ୟଜଣଙ୍କ ଘର ସମ୍ମୁଖରେ ଆତଙ୍କ ଖେଳାଇଛନ୍ତି। ଏହାର ଭିଡିଓ ଏବେ ସାମାଜିକ ଗଣମାଧ୍ୟମରେ ଭାଇରାଲ ହେବାରେ ଲାଗିଛି l ଏ ନେଇ ଶନିବାର ରାତି ଥାନାରେ ୨ଟି ଅଭିଯୋଗ ହୋଇଛି।
ଅଭିଯୋଗ ଅନୁଯାୟୀ, ଏହି ଥାନା ଅଧୀନ କୋଳଥି ଗାଁ ତଳସାହିରେ ସନ୍ତୋଷୀ ପାତ୍ରଙ୍କ ଘର ନିର୍ମାଣ କାମ ଯୋଗୁ ଶନିବାର ସକାଳେ ଏକ ବାଲି ବୋଝେଇ ଟ୍ରକ ଆସିଥିଲା। ହେଲେ ଅକ୍ଷୟ ଦଳାଇଙ୍କ ଘର ସମ୍ମୁଖରେ ତାଙ୍କର ଟ୍ରାକ୍ଟର ପାର୍କିଂ ରହିଥିବାରୁ ବାଲି ବୋଝେଇ ଟ୍ରକ ଆଗକୁ ଯାଇପାରି ନ ଥିଲା। ଯାହାକୁ ନେଇ ଅକ୍ଷୟଙ୍କ ପରିବାର ଏବଂ ସନ୍ତୋଷୀଙ୍କ ସମେତ ତାଙ୍କ ଭାଇ ସଞ୍ଜୟ ପରିଡ଼ାଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା।
ସଞ୍ଜୟ ଏକ ଖଣ୍ଡା ଧରି ଅକ୍ଷୟଙ୍କ ଘର ଆଗରେ ପହଞ୍ଚି ଆତଙ୍କ ଖେଳାଇବା ସହ ଜୀବନରେ ମାରି ଦେବାକୁ ଧମକ ଦେବା ସହ ଗାଳିଗୁଲଜ କରି ଥିଲେ। ଯାହାକୁ ନେଇ ଗାଁରେ ଉତ୍ତେଜନା ପରିସ୍ଥିତି ଦେଖା ଦେଇଥିଲା। ଘଟଣା ପରେ ଗାଁରେ ଉଭୟଙ୍କ ମଧ୍ୟରେ ଆପୋଷ ବୁଝାମଣା କରିବାକୁ ଚେଷ୍ଟା କରାଯାଇଥିଲା।
ଏଥିରେ କୌଣସି ସମାଧାନ ହୋଇପାରି ନ ଥିଲା। ପରେ ଅକ୍ଷୟଙ୍କ ସ୍ତ୍ରୀ ଗୋଳନ୍ଥରା ଥାନାରେ ଏକ ଲିଖିତ ଅଭିଯୋଗ କରିଥିଲେ। ଏ ନେଇ ଥାନା ଏକ ମାମଲା(ନଂ.୨୭୫/୨୫) ରୁଜୁ ହୋଇଛି। ଅନ୍ୟପକ୍ଷେ ସନ୍ତୋଷୀଙ୍କ ପକ୍ଷରୁ ଅନୁରୂପ ଭାବେ ଅକ୍ଷୟଙ୍କ ପରିବାର ତାଙ୍କୁ ଓ ତାଙ୍କ ଭାଇଙ୍କୁ ଆକ୍ରମଣ କରିବା ସହ ଗାଳିଗୁଲଜ କରିଥିବା ନେଇ ଏକ ଲିଖିତ ଅଭିଯୋଗ ହୋଇଛି। ଏ ନେଇ ଥାନା ଏକ ମାମଲା(୨୭୬/୨୫) ରୁଜୁ ହୋଇଛି। ଅଭିଯୋଗର ତଦନ୍ତ ଜାରି ରହିଛି। ଆଇନ ଅନୁଯାୟୀ ଅଭିଯୁକ୍ତମାନଙ୍କୁ ଗିରଫ କରାଯିବା ବୋଲି ଥାନା ଅଧିକାରୀ ବିବେକାନନ୍ଦ ସ୍ବାଇଁ ସୂଚନା ଦେଇଛନ୍ତି।
