ମେକ୍ସିକୋ ସିଟି, ୯ା୫: ଅଦମ୍ୟ ଇଚ୍ଛାଶକ୍ତି ବଳରେ ସବୁ ସମ୍ଭବ। ଏହାକୁ ପ୍ରମାଣିତ କରି ଦେଖାଇଛନ୍ତି ମେକ୍ସିକୋର ୧୧ ବର୍ଷୀୟା ଆଧାରା ପେରେଜ୍ ସାନ୍ଚେଜ୍। ଅଟିଷ୍ଟିକ୍ ହେବା ସତ୍ତ୍ୱେ ଆଧାରା ଖୁବ୍ ଜ୍ଞାନୀ। ତାଙ୍କ ଆଇକ୍ୟୁ (ଇଣ୍ଟେଲିଜେନ୍ସ କୋସେଣ୍ଟ) ୧୬୨ ରହିଛି। ପ୍ରକାଶିତ ରିପୋର୍ଟ ଅନୁସାରେ, ଆଧାରାଙ୍କ ଆଇକ୍ୟୁ ନୋବେଲ ପୁରସ୍କାର ବିଜେତା ପଦାର୍ଥ ବିଜ୍ଞାନୀ ଆଲବର୍ଟ ଆଇନ୍ଷ୍ଟାଇନ୍ଙ୍କଠାରୁ ମଧ୍ୟ ଅଧିକ। ମେକ୍ସିକୋର ସିଏନ୍ସିଆଇ ୟୁନିଭର୍ସିଟିର ସିଷ୍ଟମ ଇଞ୍ଜିନିୟରିଂରେ ଆଧାରା ସ୍ନାତକ ହାସଲ କରିଛନ୍ତି। ଏହାଛଡ଼ା ଟେକ୍ନୋଲୋଜିକାଲ ୟୁନିଭର୍ସିଟି ଅଫ୍ ମେକ୍ସିକୋରେ ଇଣ୍ଡଷ୍ଟ୍ରିଆଲାଇଜିଂ ଇଞ୍ଜିନିୟରିଂରେ ମଧ୍ୟ ସେ ଡିଗ୍ରୀ କରିଛନ୍ତି। ବଡ଼ ହୋଇ ଆମେରିକୀୟ ମହାକାଶ ଗବେଷଣା ସଂସ୍ଥା (ନାସା)ରେ ଜ୍ୟୋତିର୍ବିଜ୍ଞାନୀ ଭାବେ କାର୍ଯ୍ୟ କରିବା ତାଙ୍କ ସ୍ବପ୍ନ। ବର୍ତ୍ତମାନ ଆଧାରା ମେକ୍ସିକୋ ସ୍ପେସ୍ ଏଜେନ୍ସିରେ କାମ କରୁଛନ୍ତି।
ଅଟିଷ୍ଟିକ୍ ହେବା ଯୋଗୁ ସ୍କୁଲରେ ପଢ଼ିବା ସମୟରେ ସହପାଠୀମାନେ ଆଧାରାଙ୍କୁ ଥଟ୍ଟା କରୁଥିଲେ। ନିମ୍ନ ମଧ୍ୟବିତ୍ତ ପରିବାରରେ ଜନ୍ମ ହୋଇଥିବା ଆଧାରା ମାତ୍ର ୫ ବର୍ଷ ବୟସରେ ପ୍ରାଇମେରି ସ୍କୁଲ ପାଠପଢ଼ା ଶେଷ କରିଥିଲେ। ଅଟିଷ୍ଟିକ୍ ପାଇଁ ୩ ବର୍ଷ ବୟସରେ ତାଙ୍କର ଏକ ଅସ୍ତ୍ରୋପଚାର କରାଯାଇଥିଲା, ଯାହାପରେ ସେ ଧୀରେ ଧୀରେ କଥା କହିବା
ଆରମ୍ଭ କରିଥିଲେ। ସାଙ୍ଗମାନଙ୍କ ଥଟ୍ଟା ଇଙ୍ଗିତକୁ କେନ୍ଦ୍ର କରି ତାଙ୍କୁ ୩ଥର ସ୍କୁଲ ପରିବର୍ତ୍ତନ କରିବାକୁ ପଡ଼ିଥିଲା। ଅବସାଦ ଯୋଗୁ ଆଧାରା କିଛିଦିନ ନିଜକୁ ରୁମ୍ରେ ବନ୍ଦ କରି ରଖିଥିଲେ। ପରେ ମା’ ନାଲେଲି ସାଞ୍ଚେଜ୍ ତାଙ୍କୁ ଜଣେ ଥେରାପିଷ୍ଟଙ୍କ ନିକଟକୁ ନେଇଥିଲେ, ଯାହାପରେ ଆଧାରାଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଥିଲା। ସେ ପ୍ରଖର ବୁଦ୍ଧିମତ୍ତା ସମ୍ପନ୍ନ ବୋଲି ଥେରାପି ଜରିଆରେ ଡାକ୍ତର ଜାଣିବାକୁ ପାଇଥିଲେ। ଧୀରେ ଧୀରେ ପାଠପଢ଼ା ପ୍ରତି ତାଙ୍କର ଆଗ୍ରହ ବଢ଼ିବାକୁ ଲାଗିଥିଲା। ମାତ୍ର ୬ ବର୍ଷ ବୟସରେ ସେ ହାଇସ୍କୁଲ ପାଠପଢ଼ା ଶେଷ କରିବାକୁ ସକ୍ଷମ ହୋଇଥିଲେ। ଏପ୍ରିଲରେ ମାରି କ୍ଲେର୍ ମେକ୍ସିକୋ ମାଗାଜିନ୍ର କଭର୍ରେ ଆଧାରାଙ୍କ ଫଟୋ ଛପାଯାଇଛି।
ଭିଜା ହୋଇ ନ ପାରିବାରୁ ଆଧାରା ୟୁନିଭର୍ସିଟି ଅଫ୍ ଆରିଜୋନାରେ ପାଠ ପଢ଼ିବାର ଇଚ୍ଛାକୁ ପୂରା କରିପାରି ନ ଥିବା କହିଛନ୍ତି। ୟଙ୍ଗ ସାଇଣ୍ଟିଷ୍ଟମାନଙ୍କୁ ପ୍ରୋତ୍ସାହିତ କରିବା ପାଇଁ କରାଯାଉଥିବା ଜି-ଟେଷ୍ଟସ୍ରେ ଆଧାରା ଅଂଶଗ୍ରହଣ କରିଛନ୍ତି। ଏହି ପରୀକ୍ଷାରେ ଉତ୍ତୀର୍ଣ୍ଣ ହେବାବେଳକୁ ତାଙ୍କୁ ୧୭ ବର୍ଷ ହୋଇଯାଇଥିବାବେଳେ ବିଶ୍ୱରେ ପ୍ରଥମ ଅଟିଷ୍ଟିକ୍ ଭାବେ ଆଧାରା ମହାକାଶରେ ଉଡ଼ିବାର ସୁଯୋଗ ପାଇବେ।
