ରମ୍ଭା,୧୦ା୩-ଗଞ୍ଜାମ ଜିଲା ରମ୍ଭା ଥାନା ଅନ୍ତର୍ଗତ ୧୬ନଂ ଜାତୀୟ ରାଜପଥର ସାବୁଳିଆ ଛକରେ ବୁଧବାର ଏକ ଦୁଃଖଦ ଘଟଣା ଘଟିଛି। ଏକ ବିବାହ ଉତ୍ସବରେ ଯୋଗଦେବାକୁ ବାଇକ୍ରେ ଯିବାବେଳେ ଦୁର୍ଘଟଣାରେ ମା’ ବାପାଙ୍କ ଆଗରେ ୨ ପିଲାଙ୍କ ଜୀବନ ଚାଲିଯାଇଛି। ସେମାନେ ହେଲେ ରମ୍ଭା ଟିକରପଡ଼ା ସାହିର ଅନ୍ତର୍ଯାମୀ ବେହେରାଙ୍କ ପୁଅ ପାର୍ଥ (୧୦) ଓ ଝିଅ ଆର୍ଯ୍ୟାସ୍ମିତା (୪)। ସ୍ତ୍ରୀଙ୍କ ସହ ଅନ୍ତର୍ଯାମୀ ମଧ୍ୟ ଗୁରୁତର ଆହତ ହୋଇଛନ୍ତି। ଦମ୍ପତିଙ୍କୁ ପ୍ରଥମେ ରମ୍ଭା ସ୍ବାସ୍ଥ୍ୟକେନ୍ଦ୍ର ଓ ପରେ ବ୍ରହ୍ମପୁର ବଡ଼ ମେଡିକାଲକୁ ପଠାଯାଇଛି।
ବିବାହ ଭୋଜିରେ ଯୋଗଦେବାକୁ ସ୍ତ୍ରୀ ଓ ପିଲାଙ୍କୁ ଧରି ଅନ୍ତର୍ଯାମୀ ଏକ ବାଇକ୍ରେ ପଥରା ଅଭିମୁଖେ ଯାଉଥିଲେ। ସାବୁଳିଆ ଛକରେ ବାଇକ୍ ସହ ଭୁବନେଶ୍ୱର ଅଭିମୁଖେ ଯାଉଥିବା ସିମେଣ୍ଟ ବୋଝେଇ ଟ୍ରକ (ଏପି ୩୧ଟିଡବ୍ଲୁ ୯୩୦୯) ଧକ୍କା ହୋଇଥିଲା। ଫଳରେ ଘଟଣାସ୍ଥଳରେ ଆର୍ଯ୍ୟାସ୍ମିତା ଓ ପାର୍ଥଙ୍କ ମୃତ୍ୟୁ ଘଟିଥିଲା। ଛତ୍ରପୁର ଏସ୍ଡିପିଓ ଗୌତମ କିଷାନ, ଖଲ୍ଲିକୋଟ ତହସିଲଦାର ରାଜକିଶୋର ପଟ୍ଟନାୟକ, ରମ୍ଭା ଥାନା ଅଧିକାରୀ କୃଷ୍ଣଚନ୍ଦ୍ର ସେଠୀ ଦୁର୍ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଥିଲେ। ପୋଲିସ ଦୁର୍ଘଟଣାଗ୍ରସ୍ତ ଟ୍ରକ ଓ ବାଇକକୁ ଜବତ କରିଛି।
