ଖୋର୍ଦ୍ଧା ଅଫିସ,୬ା୮: ଶିଶୁଙ୍କ ଉପଯୁକ୍ତ ସୁରକ୍ଷା, ଶିକ୍ଷା, ଥଇଥାନ ଲାଗି ରାଜ୍ୟ ସରକାର ଗୁରୁତ୍ୱ ଦେଉଛନ୍ତି। ଓଡ଼ିଶା ରାଜ୍ୟ ଶିଶୁ ଅଧିକାର ଆୟୋଗ(ଓଏସ୍ସିପିସିଆର୍) ଶିଶୁଙ୍କ ବିକାଶ ଦିଗରେ ଡିଣ୍ଡିମ ପିଟୁଥିବା ବେଳେ ବାସ୍ତବ ଚିତ୍ର ଅଲଗା ରହିଛି। ମା’ଛେଉଣ୍ଡ ଦୁଇ ଶିଶୁ ଦୁଇ ଓଳି ଖାଇବା ପାଇଁ ଘର ଘର ବୁଲି ଭିକ୍ଷା କରୁଛନ୍ତି। ଘରେ ରୋଗଗ୍ରସ୍ତ ବାପା। ଏପଟେ ସାନ ଭାଇର ଭବିଷ୍ୟତ ଲାଗି ୧୦ବର୍ଷର ଶିଶୁ କାନ୍ଧରେ ରହିଛି ପରିବାର ବୋଝ। ପାଠପଢ଼ା ବୟସରେ ସେ ମୂଲ ଲାଗି ପରିବାର ଚଳାଇବା ପାଇଁ ସଂଘର୍ଷ କରୁଛି। ଦିନେ କି ଦୁଇ ଦିନ ନୁହଁ ଗତ ଦୁଇ ବର୍ଷ ଧରି ସଂଘର୍ଷ ଜାରି ରଖିଥିବା ଖୋର୍ଦ୍ଧା ଜିଲା ବେଗୁନିଆ ବ୍ଲକ ଅଧୀନ ଭୂଇଁପୁର ଗ୍ରାମରେ ଦେଖିବାକୁ ମିଳିଛି।
ମୁତାବକ, ଭୂଇଁପୁର ଗ୍ରାମର ସୁଦର୍ଶନ ସ୍ବାଇଁ। ତାଙ୍କ ସ୍ତ୍ରୀଙ୍କ ମୃତ୍ୟୁ ଘଟିଥିବା ବେଳେ ୧୦ ଓ ୫ବର୍ଷର ଦୁଇଟି ଶିଶୁ ରହିଛନ୍ତି। ମୂଲ ଲାଗି ଯାହା ମିଳୁଥିଲା, ସେଥିରେ ପରିବାର ଗୁଜୁରାଣ କରୁଥିଲେ। ଏକ ଦୁର୍ଘଟଣାରେ ସୁଦର୍ଶନଙ୍କ ଅଣ୍ଟା ଭାଙ୍ଗିଗଲା। ଫଳରେ ଆର୍ଥିକ ସ୍ବେଚ୍ଛଳତା କାରଣରୁ ଚିକିତ୍ସାରୁ ବଞ୍ଚିତ ହେଲେ। ସବୁ ଦିନ ଲାଗି ରୋଜଗାର ହରାଇ ବସିଲେ। ମାନସିକ ସ୍ତରରେ ଭାଙ୍ଗିପଡି ଶଯ୍ୟାଶାୟୀ ହୋଇପଡିଛନ୍ତି। ଫଳରେ ପରିବାର ଚଳାଇବା କଷ୍ଟକର ହୋଇପଡ଼ିଛି। ଶଯ୍ୟାଶାୟୀ ବାପା ଏବଂ ସାନଭାଇର ପାଠପଢା ଲାଗି ବଡପୁଅ ସଞ୍ଜୟ ୮ବର୍ଷ ବୟସରେ ପାଠପଢା ଛାଡିଦେଲେ। ସାନଭାଇକୁ ପାଠପଢାଇ ବଡ ମଣିଷ କରିବା ଉଦ୍ଦେଶ୍ୟରେ ମୂଲ ଲାଗୁଛନ୍ତି। ବାପା, ସାନଭାଇ ମୁହଁରେ ହସ ଫୁଟାଇବାକୁ ଯାଇ ୧୦ବର୍ଷର ସଞ୍ଜୟଙ୍କ ପାଠପଢାରେ ଡୋରି ବାନ୍ଧି ହୋଇପଡିଛି। ସାନଭାଇକୁ ଗାଧୋଇବା ଦେବା ଠାରୁ ଆରମ୍ଭ କରି ସବୁ କାର୍ଯ୍ୟ କରୁଛନ୍ତି। ଏଥିସହ ବାପା ସୁଦର୍ଶନଙ୍କୁ ଦୈନିକ ଗାଧୋଇ ଦେବା, ହାତ ଧରି ଚଲାବୁଲା କରାଉଛନ୍ତି ସଞ୍ଜୟ। ଏପରିକି ଦୁଇ ଓଳି ଖାଇବା ଲାଗି ଦୁଇ ଭାଇ ମିିଶି ଗାଁରେ ଘର ଘର ବୁଲି ଭିକ୍ଷା କରୁଛନ୍ତି। କିଏ ବଦାନ୍ୟ ବ୍ୟକ୍ତି ତାଙ୍କୁ କୌଣସି ଖାଦ୍ୟ ସାମଗ୍ରୀ ଦେଲେ, ତାହାକୁ ଖାଇ ଗୁଜୁରାଣ ମେଣ୍ଟାଉଛନ୍ତି। ଏପରିକି ଦିନେ ଦିନେ ଉପାସ ମଧ୍ୟ ରହୁଛନ୍ତି। ପାଖରେ ଟଙ୍କା ପଇସା ନଥିବାରୁ ଭଲ ପୋଷାକ ପିନ୍ଧି ପାରୁନାହାନ୍ତି। ସଞ୍ଜୟ କୁହନ୍ତି, ପିଲାମାନେ ସ୍କୁଲକୁ ପାଠପଢିବାକୁ ଯାଉଥିବା ବେଳେ ମୋର ମଧ୍ୟ ସ୍କୁଲକୁ ଯିବାକୁ ଇଚ୍ଛା ହୁଏ। ତେବେ ମୁଁ ସ୍କୁଲକୁ ଗଲେ, ପରିବାର କିପରି ଚଲିବ। ମୂଲ ଲାଗିବି ପଛକେ ସାନଭାଇକୁ ପାଠ ପଢାଇ ବଡ ମଣିଷ କରିବି ବୋଲି ସେ କହିଛନ୍ତି। ସୁଦର୍ଶନ କୁହନ୍ତ, ସାନପୁଅ ଜନ୍ମ ହେବା ପରେ ସ୍ତ୍ରୀଙ୍କ ମୃତ୍ୟୁ ଘଟିଲା। ପରେ ଏକ ଦୁର୍ଘଟଣାରେ ତାଙ୍କ ଅଣ୍ଟା ଭାଙ୍ଗିଗଲା। ପ୍ରଶାସନ ନିକଟରେ ଆର୍ଥିକ ସହଯୋଗ ଲାଗି ବାରମ୍ବାର ଗୁହାରି ସତ୍ତ୍ୱେ କେହି ଶୁଣିଲେ ନାହିଁ। ଦୁଇପୁଅ ସାହି ପଡିଶା ଘରୁ ଯାହା ମାଗିକି ଆଣୁଛନ୍ତି ସେଥିରେ ଚଳୁଛୁ। ତେବେ ଏନେଇ ସ୍ଥାନୀୟ ପ୍ରଶାସନ ନିକଟରେ କୌଣସି ଖବର ନ ଥିବା ଜଣାପଡିଛି। ଏହି ପରିବାର ପ୍ରତି ସହଯୋଗର ହାତ ବଢ଼ାଇବାକୁ ଗ୍ରାମବାସୀ ଜିଲା ପ୍ରଶାସନ ନିକଟରେ ଅନୁରୋଧ କରୁଛନ୍ତି। ସ୍ଥାନୀୟ ସରପଞ୍ଚ ସତ୍ୟ ନାରାୟଣ ପ୍ରଧାନ କୁହନ୍ତି, ପଞ୍ଚାୟତ ପକ୍ଷରୁ ସମସ୍ତ ସହଯୋଗ କରାଯିବ। ଅନ୍ୟପକ୍ଷରେ ଏ ସମ୍ପର୍କରେ ଅତିରିକ୍ତ ଜିଲାପାଳ ମନୋଜ ପାଢୀ କହିଥିଲେ, ଏହା ସମ୍ବେଦନଶୀଳ ଘଟଣା। ଦୁଇ ଶିଶୁଙ୍କ ପାଠପଢା ବ୍ୟବସ୍ଥା କରାଯିବ। ଏଥିସହିତ ଉକ୍ତ ପରିବାରକୁ ଯଥୋଚିତ ସାହାଯ୍ୟ ଯୋଗାଇ ଦିଆଯିବ ବୋଲି ସେ କହିଛନ୍ତି।
