ହିଞ୍ଜିଳିକାଟୁ,୫ା୯(ଡି.ଏନ୍.ଏ.)-ଗଞ୍ଜାମ ଜିଲା ହିଞ୍ଜିଳି ଥାନା ସିଙ୍ଗିପୁର ଗ୍ରାମରେ ଶନିବାର ଏକ ଅଭାବନୀୟ ଘଟଣା ଘଟିଛି। ଶିକାର କରିବା ପାଇଁ ବିଛା ଯାଇଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ୨ଭାଇଙ୍କ ମୃତ୍ୟୁ ଘଟିଛି । ସେମାନେ ହେଲେ ସିଙ୍ଗିପୁର ଗ୍ରାମର ରମେଶ ମୁନି (୫୫) ଓ ମଙ୍ଗୁଳୁ ମୁନି (୫୦)। ପୋଲିସ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ମେଡିକାଲକୁ ପଠାଇଛି।
ଶୁକ୍ରବାର ରାତିରେ ଦୁଇ ଭାଇ ରମେଶ ଓ ମଙ୍ଗୁଳୁ ଜମିରେ ପାଣି ମଡ଼ାଇବାକୁ ଯାଇ ଆଉ ଫେରି ନ ଥିଲେ। ପରିବାର ଲୋକେ ବହୁ ଖୋଜାଖୋଜି କରି ଶନିବାର ଅପରାହ୍ନରେ ଚାଷଜମି ନିକଟ ଲଟାବୁଦାରେ ଉଭୟଙ୍କ ମୃତଦେହ ଦେଖି ପୋଲିସକୁ ଖବର ଦେଇଥିଲେ। ବନ୍ୟ ଜନ୍ତୁ ଶିକାର ପାଇଁ କେହି ବିଦ୍ୟୁତ ତାର ପକାଇଥିବାରୁ ସେଥିରେ ଲାଗି ୨ଭାଇଙ୍କ ମୃତ୍ୟୁ ଘଟିଥିବା ଆଲୋଚନା ହେଉଛି। ଏ ନେଇ ନଂ.୩୧୦/୨୦ରେ ମାମଲା ରୁଜୁ କରି ପୋଲିସ ଘଟଣାର ତଦନ୍ତ କରୁଛି।
