ମେକ୍ସିକୋ ସିଟି: ଆମେରିକାର ମେକ୍ସିକୋରେ ଏକ ଅଜବ ଘଟଣା ଦେଖିବାକୁ ମିଳିଛି। ୩ ବର୍ଷୀୟା କୁନି ଝିଅଙ୍କର ଦୁଇଥର ମୃତ୍ୟୁ ହୋଇଛି। ପାକସ୍ଥଳୀ ସଂକ୍ରମଣ କାରଣରୁ କାମିଲାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। କିଛିଦିନର ଚିକିତ୍ସା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପରିବାର ଲୋକେ ତାଙ୍କ ଅନ୍ତିମ ସଂସ୍କାର କାମ କରିବା ସମୟରେ କାମିଲା ଜିଇ ଉଠିଥିଲେ। କୁନି ଝିଅର ଚେତା ଫେରିବା ଜାଣି ଘରଲୋକେ ତାଙ୍କୁ ଡାକ୍ତରଖାନା ନେଇଯାଇଥିଲେ। କିନ୍ତୁ ହସ୍ପିଟାଲରେ ଡାକ୍ତର ତାଙ୍କୁ ପୁଣି ମୃତ ଘୋଷଣା କରିଥିଲେ। କାମିଲାଙ୍କୁ କଫିନ୍ରେ ଭର୍ତ୍ତି କରିବାର କିଛି ସମୟ ପରେ ସେ କଡ଼ ଲେଉଟାଉଥିବାର ତାଙ୍କ ମା’ ଦେଖିବାକୁ ପାଇଥିଲେ। ସେ ଏକଥାକୁ ଅନ୍ୟମାନଙ୍କୁ କହିବାରୁ କେହି ବିଶ୍ୱାସ କଲେ ନାହିଁ। କିନ୍ତୁ ଯେତେବେଳେ କାମିଲାଙ୍କ ଜେଜେମା’ ଦେଖିଲେ ଯେ, ସେ ଆଖି ଖୋଲିଛନ୍ତି ତା’ ପରେ ସେମାନେ କାମିଲାଙ୍କୁ ଆଉଥରେ ଡାକ୍ତରଖାନା ନେଇଥିଲେ। ପାକସ୍ଥଳୀ ସଂକ୍ରମଣ କାରଣରୁ କାମିଲାଙ୍କ ପେଟରେ ପିଡ଼ା, ଥଣ୍ଡା ଓ ବାନ୍ତି ହେଉଥିଲା। ଯନ୍ତ୍ରଣା ସାମାନ୍ୟ କହି ଡାକ୍ତର କୁନି ଝିଅଙ୍କୁ ପାରାସିଟାମଲ ଖାଇବାକୁ ଦେଇଥିଲେ। କିନ୍ତୁ ଦିନ ବିତିବା ସହ କାମିଲାଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିବା ଆରମ୍ଭ କରିଥିବା ତାଙ୍କ ମା’ କହିଛନ୍ତି। ଦ୍ୱିତୀୟ ଥର ପାଇଁ ଡାକ୍ତରଖାନା ନେବା ପରେ ସେଠାରେ ତାଙ୍କ ମୃତ୍ୟୁ ହୋଇଥିଲା।
