ଢେଙ୍କାନାଳ ଅଫିସ, ୩।୨: ବେଆଇନ ଭାବେ ତାମିଲନାଡୁ ଚାଲାଣ କରାଯାଉଥିବା ୨୪ ଶ୍ରମିକଙ୍କୁ ଢେଙ୍କାନାଳ ଜିଲା ଶ୍ରମ ବିଭାଗ ପୋଲିସ ସହାୟତାରେ ମଙ୍ଗଳବାର ଉଦ୍ଧାର କରିଛି। ଶ୍ରମିକ ଚାଲାଣରେ ମଧ୍ୟସ୍ଥ ସାଜିଥିବା ବ୍ୟକ୍ତିଙ୍କୁ କାରଣଦର୍ଶାଅ ନୋଟିସ ଜାରି କରାଯାଇଛି। ଅନ୍ୟପଟେ ଶ୍ରମିକଙ୍କୁ ନେବାକୁ ତାମିଲନାଡୁରୁ ଆସୁଥିବା ବସ୍ ଖାଲି ଫେରିଛି। ଏହି ଘଟଣା ଜିଲାରେ ଚର୍ଚ୍ଚାର ବିଷୟ ହୋଇଛି।
କଙ୍କଡ଼ାହାଡ଼, କାମାକ୍ଷାନଗର, ଭୁବନ, କେନ୍ଦୁଝର ଜିଲା ତେଲକୋଇ ଅଞ୍ଚଳର ସମ୍ପୃକ୍ତ ଶ୍ରମିକମାନେ ତାମିଲନାଡୁର ଏକ ଖାଦ୍ୟ ପ୍ରକ୍ରିୟାକରଣ କମ୍ପାନୀରେ କାମ କରୁଥିଲେ। କରୋନା ଲକ୍ଡାଉନ୍ ପରେ କମ୍ପାନୀ ବନ୍ଦ ହୋଇଯିବାରୁ ସେମାନେ ଘରକୁ ବାହୁଡ଼ି ଆସିଥିଲେ। ସ୍ଥିତି ସୁଧୁରିବା ପରେ ଉକ୍ତ କମ୍ପାନୀ ଶ୍ରମିକଙ୍କୁ ଫେରାଇ ନେବା ଲାଗି ତାମିଲନାଡୁରୁ ଏକ ବସ୍ ପଠାଇଥିଲା। ଶ୍ରମିକଙ୍କୁ ତାମିଲନାଡୁ ପହଞ୍ଚାଇବାରେ ମଧ୍ୟସ୍ଥ ସାଜିଥିଲେ ତେଲକୋଇ ଅଞ୍ଚଳର ସୁଶାନ୍ତ ପାତ୍ର। କୌଣସି ସୂତ୍ରରୁ ସୂଚନା ପାଇ ଢେଙ୍କାନାଳ ସହର ଉପକଣ୍ଠ ୫୫ନଂ. ଜାତୀୟ ରାଜପଥର କାମାକ୍ଷାନଗର ରୋଡ ଛକଠାରେ ଅପରାହ୍ନ ସାଢ଼େ ୨ଟାରେ ଜିଲା ଶ୍ରମ ବିଭାଗ କର୍ମଚାରୀ ଗାଡ଼ିକୁ ଅଟକାଇ ଯାଞ୍ଚ କରିଥିଲେ। କୌଣସି କାଗଜପତ୍ର ନ ଥାଇ ସମ୍ପୃକ୍ତ ଶ୍ରମିକଙ୍କୁ ବେଆଇନ ଭାବେ ନିଆଯାଉଥିଲା। ସେମାନଙ୍କୁ ଉଦ୍ଧାର କରି ହାଟରୋଡ୍ସ୍ଥିତ ଶ୍ରମ ବିଭାଗ କାର୍ଯ୍ୟାଳୟକୁ ଆଣି ପଚରାଉଚୁରା କରାଯାଇଥିଲା। ସମସ୍ତଙ୍କୁ ଗାଡ଼ିରେ ନିଜ ନିଜ ଘରକୁ ପଠାଇ ଦିଆଯାଇଛି। ସୁଶାନ୍ତଙ୍କୁ ଶ୍ରମ ବିଭାଗ ପକ୍ଷରୁ କାରଣ ଦର୍ଶାଅ ନୋଟିସ ଜାରି କରାଯାଇଛି।
ଏ ସଂକ୍ରାନ୍ତରେ ସଦର ଏସ୍ଡିପିଓ ଶ୍ରୀହର୍ଷ ମିଶ୍ର କୁହନ୍ତି, ବିଶ୍ୱସ୍ତ ସୂତ୍ରରୁ ସୂଚନା ପାଇବା ପରେ ଶ୍ରମିକଙ୍କୁ ନେଉଥିବା ବସ୍ ଅଟକାଇ ଶ୍ରମ ବିଭାଗ ଜିମା ଦିଆଯାଇଥିଲା। ଜିଲା ଶ୍ରମ ଅଧିକାରୀ ସତ୍ୟନାରାୟଣ ଆଚାର୍ଯ୍ୟ କୁହନ୍ତି, ତାମିଲନାଡୁର ଏକ କମ୍ପାନୀରେ କାର୍ଯ୍ୟରତ ସମ୍ପୃକ୍ତ ଶ୍ରମିକମାନେ ଲକ୍ଡାଉନ୍ରେ ଘରକୁ ଫେରି ଆସିଥିଲେ। ବିନା କାଗଜପତ୍ର ଏବଂ ମାଲିକଙ୍କ ଲେଖା ନ ଥାଇ ସେମାନଙ୍କୁ ପୁଣି ନିଆଯାଉଥିଲା, ଯାହା ବେଆଇନ। ମଧ୍ୟସ୍ଥଙ୍କୁ କାରଣଦର୍ଶାଅ ନୋଟିସ ଜାରି କରାଯାଇଛି। ଘଟଣାର ତଦନ୍ତ କରାଯାଉଛି।
