Posted inଜାତୀୟ

ପ୍ରଚାର ପାଇଁ ଲୁଚିଥିଲା ସତ

ରାୟପୁର/ନୂଆଦିଲ୍ଲୀ(ଡି.ଏନ୍‌.ଏ.),୫ା୪: ଛତିଶଗଡ଼ର ବସ୍ତର ଅଞ୍ଚଳରେ ମାଓବାଦୀମାନଙ୍କ ଉପସ୍ଥିତି ନେଇ ଗୋଇନ୍ଦା ସୂଚନା ମିଳିବା ପରେ ସୁରକ୍ଷା ବଳ ସେଠାକୁ ଏନ୍‌କାଉଣ୍ଟର କରିବାକୁ ଯାଇଥିଲା। ବିଜାପୁର ଓ ସୁକୁମା ସୀମାନ୍ତବର୍ତ୍ତୀ ତେରାମ୍‌ ଜଙ୍ଗଲରେ ଶନିବାର ମଧ୍ୟାହ୍ନରେ ମାଓବାଦୀଙ୍କ ସହ ଯବାନମାନେ ମୁହଁାମୁହିଁ ହୋଇଥିଲେ। ମାଓବାଦୀଙ୍କ ଅତର୍କିତ ଆକ୍ରମଣର ଶିକାର ହୋଇ ଶହୀଦ ହୋଇଗଲେ ୨୨ରୁ ଊର୍ଦ୍ଧ୍ୱ ଯବାନ। ୩୨ ଯବାନ ଆହତ ହୋଇଥିବାବେଳେ ଏବେ ବି ଅନେକେ ନିଖୋଜ ଥିବା କୁହାଯାଉଛି। କିନ୍ତୁ ଶନିବାର ସନ୍ଧ୍ୟାରେ ୫ ଯବାନ ଶହୀଦ ଓ ୩ ମାଓବାଦୀ ନିହତ ହୋଇଥିବା କେନ୍ଦ୍ରୀୟ ପୋଲିସ ଓ ପ୍ରଶାସନ ପକ୍ଷରୁ ପ୍ରଚାର କରାଯାଇଥିଲା। ସତ ପଦାକୁ ଆସିବା ପରେ ଏହି ଏନ୍‌କାଉଣ୍ଟର ଅନେକ ପ୍ରଶ୍ନ ଛିଡ଼ା କରାଇଛି। ଶନିବାର ସନ୍ଧ୍ୟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପଶ୍ଚିମବଙ୍ଗର ହୁଗ୍‌ଲୀରେ ନିର୍ବାଚନ ପ୍ରଚାର କରୁଥିବାବେଳେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ହାଓଡାରେ ଭାଜପା ପାଇଁ ରୋଡ୍‌ ଶୋ’ କରି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଟାର୍ଗେଟ କରୁଥିଲେ। ଏଥିପାଇଁ ଶହୀଦ ଯବାନଙ୍କ ପ୍ରକୃତ ସଂଖ୍ୟା ଲୁଚାଇ ଦିଆଯାଇଥିଲା କି ବୋଲି କେତେକ ମହଲରେ ସନ୍ଦେହ ସୃଷ୍ଟି ହେଲାଣି। କାରଣ ୨୦୧୯ ଫେବୃୟାରୀ ୧୪ରେ ଜମ୍ମୁ-କଶ୍ମୀରର ପୁଲଓ୍ବାମାରେ କେନ୍ଦ୍ରୀୟ ରିଜର୍ଭ ପୋଲିସ ବଳ (ସିଆର୍‌ପିଏଫ୍‌)ର ୪୦ରୁ ଊର୍ଦ୍ଧ୍ୱ ଯବାନ ଶହୀଦ ହୋଇଥିବାବେଳେ କିଛି ଘଣ୍ଟା ପାଇଁ ଉକ୍ତ ଖବରକୁ ଚପାଇ ଦିଆଯାଇଥିଲା। ସେତେବେଳେ କୁହାଯାଇଥିଲା ପ୍ରଧାନମନ୍ତ୍ରୀ କର୍‌ବେଟ ନ୍ୟାଶନାଲ ପାର୍କରେ ଡିସ୍‌କଭରି ଚ୍ୟାନେଲ ପାଇଁ ଏକ ଡକ୍ୟୁମେଣ୍ଟାରି ଶୁଟିଂ କରୁଥିଲେ। ଏଥିପାଇଁ ଆତଙ୍କବାଦୀ ଆକ୍ରମଣ ଖବରକୁ ଜାଣିଶୁଣି ତତ୍କାଳ ସାମ୍ନାକୁ ଅଣାଯାଇ ନ ଥିଲା। ସଦ୍ୟ ଘଟଣାରେ ଯବାନମାନେ ଏନ୍‌କାଉଣ୍ଟର କରିବାକୁ ଯାଉଥିବା ନେଇ ମାଓବାଦୀମାନେ ଆଗୁଆ ସୂଚନା ପାଇବା ସୁରକ୍ଷା ବଳର ଗୋଇନ୍ଦା ବିଫଳତାକୁ ମଧ୍ୟ ପଦାରେ ପକାଇଛି।
ବିଜାପୁର ଏସ୍‌ପି କମଳଲୋଚନ କାଶ୍ୟପ ଶନିବାର ମଧ୍ୟାହ୍ନରେ ହୋଇଥିବା ଏନ୍‌କାଉଣ୍ଟର ସମ୍ପର୍କରେ ରବିବାର ପ୍ରେସ୍‌ କନ୍‌ଫରେନ୍ସ କରିଛନ୍ତି। କାଶ୍ୟପ କହିଛନ୍ତି, ମାଲକାନଗିରି ସୀମାନ୍ତ ଛତିଶଗଡ଼ର ତାକୁଳଗୁଡ଼ାମ ଜଙ୍ଗଲରେ ୬୦୦ରୁ ଊର୍ଦ୍ଧ୍ୱ ମାଓବାଦୀ ବୈଠକ କରୁଥିବା ଖବର ପାଇ ବିଜାପୁର ପୋଲିସ, ସିଆର୍‌ପିଏଫ୍‌, ଜିଲା ରିଜର୍ଭ ଗାର୍ଡ (ଡିଆର୍‌ଜି) ଏବଂ କମାଣ୍ଡୋ ବାଟାଲିୟନ୍‌ ଫର୍‌ ରିଜୋଲ୍ୟୁଟ୍‌ ଆକ୍ସନ (କୋବ୍ରା) ବାହିନୀ ପକ୍ଷରୁ ମିଳିତ କୋମ୍ବିଂ ଅପରେଶନ କରାଯାଇଥିଲା। ଏଥିରେ ପ୍ରାୟ ୨୦୦୦ ଯବାନ ସାମିଲ ଥିଲେ। ତେବେ ଯବାନମାନେ ସେଠାକୁ ଯିବା ପୂର୍ବରୁ ପିପୁଲ୍ସ ଲିବରେଶନ ଗୋରିଲା ଆର୍ମି (ପିଏଲ୍‌ଜିଏ) ୨୦୦-୨୫୦ ସଶସ୍ତ୍ର ମାଓବାଦୀ ଖବର ପାଇ ପ୍ରସ୍ତୁତ ହୋଇ ଛକି ରହିଥିଲେ। ଯବାନମାନେ ଜଙ୍ଗଲରେ ପହଞ୍ଚତ୍ବା ମାତ୍ରେ ମାଓବାଦୀମାନେ ରକେଟ ଲଞ୍ଚରରେ ବିସ୍ଫୋରଣ ଘଟାଇବା ସହ ଏକେ-୪୭ରୁ ଆଖିବୁଜା ଗୁଳି ବର୍ଷଣ କରିଥିଲେ। ପ୍ରାୟ ୪ ଘଣ୍ଟା ଧରି ଉଭୟ ପକ୍ଷଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ଏଥିରେ ୨୨ ଯବାନ ଶହୀଦ ହୋଇଛନ୍ତି। ଆହତ ଯବାନମାନଙ୍କ ମଧ୍ୟରୁ ୨୩ ଜଣଙ୍କୁ ବିଜାପୁର ହସ୍ପିଟାଲରେ ଭର୍ତ୍ତି କରାଯାଇଥିବାବେଳେ ଅନ୍ୟ ୭ ଜଣ ରାୟପୁର ହସ୍ପିଟାଲରେ ଚିକିତ୍ସିତ ହେଉଛନ୍ତି। ମାଓବାଦୀଙ୍କ ଅତର୍କିତ ଆକ୍ରମଣରେ ୫ ଯବାନ ଶହୀଦ ହୋଇଥିବା ପ୍ରଥମେ ଜଣାପଡ଼ିଥିଲା। କିନ୍ତୁ ରବିବାର ଘଟଣାସ୍ଥଳରୁ ୨୨ ଯବାନଙ୍କ ମୃତଦେହ ଜବତ ହୋଇଛି। ମୃତଦେହଗୁଡ଼ିକୁ ହେଲିକପ୍ଟରେ ଅଣାଯାଇଛି। ଅନ୍ୟପକ୍ଷେ ଏବେ ମଧ୍ୟ କେତେଜଣ ଯବାନଙ୍କ ପତ୍ତା ମିଳିନାହିଁ। ସେମାନଙ୍କୁ ଠାବ କରି ଉଦ୍ଧାର କରିବା ପାଇଁ ତଲାସି ଅଭିଯାନ ଜାରି ରହିଛି ବୋଲି ଛତିଶଗଡ଼ ପୋଲିସ ମହାନିର୍ଦ୍ଦେଶକ ଡି.ଏମ୍‌. ଅଓ୍ବସ୍ତି ସୂଚନା ଦେଇଛନ୍ତି। ଏନ୍‌କାଉଣ୍ଟରରେ ୧୫ ମାଓବାଦୀ ନିହତ ହୋଇଥିବା ଜଣାପଡ଼ିଛି। ଏହା ପୂର୍ବରୁ ଆଉ ଜଣେ ବରିଷ୍ଠ ପୋଲିସ ଅଧିକାରୀ କହିଥିଲେ, ନିଖୋଜ ଯବାନଙ୍କ ସଂଖ୍ୟା ଜଣାପଡ଼ିନାହିଁ। କିଛି ଘଣ୍ଟା ମଧ୍ୟରେ ମୃତ୍ୟୁସଂଖ୍ୟା ବଢ଼ିବା ଆଶଙ୍କା କରାଯାଉଛି। ସେପଟେ ଯବାନମାନଙ୍କୁ ଠାବ କରିବା ଲାଗି ତରେମ, ଉସୁର, ପାମେଡ୍‌, ମିନ୍‌ପା ଓ ନରସାପୁରମ୍‌ ଅଞ୍ଚଳରେ ତଲାସି ଅଭିଯାନ ଚଳାଇଥିବା ମିଳିତ ବାହିନୀକୁ ରବିବାର ମଧ୍ୟ ମାଓବାଦୀମାନେ ଟାର୍ଗେଟ କରିଛନ୍ତି।
ଇତିମଧ୍ୟରେ ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ମୋଦି, ସ୍ବରାଷ୍ଟ୍ରମନ୍ତ୍ରୀ ଅମିତ୍‌ ଶାହା ଓ ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ମାଓବାଦୀଙ୍କ ଆକ୍ରମଣକୁ ନିନ୍ଦା କରିବା ସହ ଶହୀଦଙ୍କ ପରିବାରକୁ ସମବେଦନା ଜଣାଇଛନ୍ତି। ଶହୀଦଙ୍କ ତ୍ୟାଗ ବେକାର ଯିବନାହିଁ ବୋଲି ସେମାନେ କହିଛନ୍ତି। ସ୍ବରାଷ୍ଟ୍ରମନ୍ତ୍ରୀ ଶାହା ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲଙ୍କ ସହ ଫୋନ୍‌ରେ ଏନେଇ ଆଲୋଚନା କରିଛନ୍ତି। କଂଗ୍ରେସ ନେତା ରାହୁଲ ଗାନ୍ଧୀ ନିଖୋଜ ଯବାନଙ୍କୁ ଠାବ କରିବାରେ ସୁରକ୍ଷା ବଳକୁ ସହଯୋଗ କରିବା ଲାଗି ଛତିଶଗଡ଼ର ଭୂପେଶ ବାଘେଲ ସରକାରଙ୍କୁ ଅନୁରୋଧ କରିଛନ୍ତି। ଏଥିସହ ଶୋକବ୍ୟକ୍ତ କରି ଶହୀଦ ଯବାନଙ୍କ ପରିବାରକୁ ସମବେଦନା ଜଣାଇଛନ୍ତି। ପ୍ରକାଶ ଯେ, ଗତ ୨୩ ତାରିଖରେ ବସ୍ତର ଅଞ୍ଚଳର ନାରାୟଣପୁର ଜିଲାରେ ମାଓବାଦୀମାନେ ଡିଆର୍‌ଜି ଯବାନଙ୍କୁ ନେଇ ଯାଉଥିବା ଏକ ବସ୍‌ରେ ଆଇଇଡି ବିସ୍ଫୋରଣ କରିଥିଲେ। ଏଥିରେ ୫ ଯବାନ ଶହୀଦ ଏବଂ ୧୪ ଆହତ ହେଇଥିଲେ। ସେହିପରି ୨୦୨୦ ମାର୍ଚ୍ଚ ୨୧ରେ ମଧ୍ୟ ସୁକୁମା ଜିଲାରେ ମାଓବାଦୀଙ୍କ ଅତର୍କିତ ଆକ୍ରମଣରେ ୧୭ ଯବାନ ଶହୀଦ ହୋଇଥିଲେ।


Enter your email to get our daily news in your inbox.

All Right Reserved By Dharitri.Com

ଆରମ୍ଭ ହେଲା ସର୍ବ ବୃହତ ଜିଓପଲିଟିକ୍ସ୍‌ ଗେମ୍‌, ପୃଥିବୀ ଦୁଇ ଭାଗ ହେବା ଆଶଙ୍କା…

ନୂଆଦିଲ୍ଲୀ/ଓ୍ବାଶିଂଟନ/ଟୋକିଓ, ୨୨।୫ : ୟୁକ୍ରେନ ଯୁଦ୍ଧ ସହିତ ପୃଥିବୀକୁ ଦୁଇ ଭାଗରେ ବିଭକ୍ତ କରିବା ଲାଗି ସର୍ବ ବୃହତ ଜିଓ ପଲିଟିକ୍ସ୍‌ ଗେମ୍‌ ଆରମ୍ଭ ହୋଇଛି।...

ଅଟୋ ଚଳାଇ ପରିବାର ପୋଷୁଛନ୍ତି ୮ ବର୍ଷର ବାଳକ

ବିଜୟଓ୍ବାଡ଼ା, ୫।୯: ଆନ୍ଧ୍ରପ୍ରଦେଶ ଚିତ୍ତୋର ଜିଲାରେ ଜଣେ ୮ ବର୍ଷର ବାଳକ ରାଜଗୋପାଳ ରେଡ୍ଡୀ ନିଜ କଅଁଳ କାନ୍ଧରେ ପରିବାରର ବୋଝ ଉଠାଉଛନ୍ତି। ସେ ଏକ...

୧୦୦ ଛୁଇଁଲା ଟମାଟୋ ଦର

ନୂଆଦିଲ୍ଲୀ,୨୩।୧୧: ସାଧାରଣତଃ ଶୀତ ଦିନେ ଟମାଟୋ କିଲୋ ପିଛା ୨୦ ଟଙ୍କାରେ ବିକ୍ରି ହୁଏ। କିନ୍ତୁ ଦକ୍ଷିଣାଞ୍ଚଳରେ ଥିବା ୩ ରାଜ୍ୟ (ଆନ୍ଧ୍ର ପ୍ରଦେଶ, କର୍ନାଟକ...

୧୯୪୭ରୁ ୭୨୦ ଅପରାଧୀ ପାଇଲେଣି ମୃତ୍ୟୁଦଣ୍ଡ: ପାଖାପାଖି ଅଧା ଉତ୍ତରପ୍ରଦେଶର

ନୂଆଦିଲ୍ଲୀ, ୨୧ା୩: ସ୍ବାଧୀନତା ପରଠାରୁ ଭାରତରେ ମୋଟ ୭୨୦ ଅପରାଧୀ ଫାଶୀ ପାଇଛନ୍ତି। ସେମାନଙ୍କ ମଧ୍ୟରୁ ପାଖାପାଖି ଅଧା ଉତ୍ତରପ୍ରଦେଶର। ଜାତୀୟ ଆଇନ ବିଶ୍ୱବିଦ୍ୟାଳୟର ଏକ...

ବୋହୂଙ୍କ ନାମ ବଦଳାଇଲେ ଲାଲୁ

ପାଟନା,୧୪।୧୨: ରାଷ୍ଟ୍ରୀୟ ଜନତା ଦଳ (ଆରଜେଡି) ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ସାନ ପୁଅ ତେଜସ୍ବୀ ଯାଦବ ନିକଟରେ ଦିଲ୍ଲୀରେ ବିବାହ କରିଛନ୍ତି। ଦୀର୍ଘଦିନର ବନ୍ଧୁ...

ଭାଜପାରେ ମିଶିଲେ ୧୩ ବଙ୍ଗାଳୀ ଫିଲ୍ମଷ୍ଟାର

ନୂଆଦିଲ୍ଲୀ,୧୯ା୭ (ପି.ଟି.):ବଙ୍ଗାଳୀ ଚଳଚ୍ଚିତ୍ର ଓ ଟେଲିଭିଜନର ୧୩ ଜଣ ଅଭିନେତା ଅଭିନେତ୍ରୀ ଗୁରୁବାର ଭାଜପାରେ ସାମିଲ ହୋଇଛନ୍ତି। ଏହି ମିଶ୍ରଣ ପର୍ବ ବେଳେ ପଶ୍ଚିମବଙ୍ଗ ଭାଜପା ସଭାପତି...

ଟ୍ରମ୍ପ୍‌ ବୁଲିଯିବେ ତାଜମହଲ: ଦୁର୍ଗନ୍ଧ ହଟାଇବା ପାଇଁ ଯମୁନାରେ ଛଡ଼ାଗଲା ୫୦୦ କ୍ୟୁସେକ୍‌ ଜଳ

ଆଗ୍ରା,୧୯।୨: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍‌ ଭାରତ ଗସ୍ତରେ ଆସୁଛନ୍ତି। ତାଙ୍କର ଭବ୍ୟ ସମ୍ବର୍ଦ୍ଧନା ପାଇଁ ପ୍ରଧାନନ୍ତ୍ରୀ ନରେନ୍ଦ୍ର ମୋଦି ସରକାର ଉଦ୍ୟମ ଜାରି ରଖିଛନ୍ତି।...

ଯୋଗୀ ସରକାରଙ୍କ ବିରୋଧରେ ମନ୍ତବ୍ୟ ଦେବା ମହଙ୍ଗା ପଡ଼ିଲା

ଲକ୍ଷ୍ନୌ,୭।୯: ଉତ୍ତରପ୍ରଦେଶର ପୂର୍ବତନ ରାଜ୍ୟପାଳ ଅଜିଜ୍‌ କୁରେଶୀଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ ହୋଇଛି। ସେ ଯୋଗୀ ଆଦିତ୍ୟନାଥ ସରକାରଙ୍କ ବିରୋଧରେ ଅପମାନଜନକ ମନ୍ତବ୍ୟ ଦେଇଥିବା...

Advertisement
Archives

Model This Week