ଅତାବିରା,୧୦।୬(ଯୁଧିଷ୍ଠିର ମହାପାତ୍ର): ରାଜ୍ୟରେ ରବି ଧାନ କିଣାବିକା ଅବଧି ଯେତେ ବିତୁଛି, ସେତିକି ଚାଷୀ ସମସ୍ୟା ବଢ଼ିବାରେ ଲାଗିଛି । କେତେବେଳେ ଟୋକନ ତ ଆଉ କେତେବେଳେ କଟନୀ ଛଟନୀ ଚାଷୀଙ୍କ ଦୁଃଖ ଦ୍ବିଗୁଣିତ କରିଛି । ତାହା ସତ୍ତ୍ୱେ ଯେତେବେଳେ ମଣ୍ଡି ଧାନ ମିର୍ଲସ ହେଡ଼କୁ ଆସୁଛି ସେଠାରେ ବି ଚାଷୀଙ୍କୁ ହଇରାଣ ହରକତ ହେବାକୁ ପଡୁଛି । ଏପରି ଏକ ଘଟଣା ବୁଧବାର ଚୋରି ଧାନ ବୋଝେଇ ଟ୍ରକ ଜବତ ହେବା ପରେ ସାମ୍ନାକୁ ଆସିଛି ।
ସମ୍ବଲପୁର ଜିଲା ଠେମରା ସୋସାଇଟି ମାଧ୍ୟମରେ ଗତ ୬ ତାରିଖ ବୁଧବାର ମାନେଶ୍ଵର ବ୍ଲକ ଗମ୍ଭାରକଟା ଗ୍ରାମର ଚାଷୀ ଶୁଭମ ସାହୁଙ୍କ ୫୬୩ ପ୍ୟାକେଟରେ ୨୨୪ କ୍ବିଣ୍ଟାଲ ଧାନ ଗତ ଜଗଦମ୍ବା ରାଇସ ଇଣ୍ଡଷ୍ଟ୍ରିକୁ ଆସିଥିଲା। ଧାନ ଆସିଥିବା ଟ୍ରକ ନମ୍ବର OD15 ଏସ 1887 ସେହିଦିନରୁ ଜଗଦମ୍ବା ରାଇସ ଇଣ୍ଡଷ୍ଟ୍ରି ସାମ୍ନାରେ ଛିଡା ହୋଇଥିଲା । ଚାଷୀଙ୍କ ବାରମ୍ବାର ଅଭିଯୋଗ ସତ୍ତ୍ୱେ ଟ୍ରକରୁ ଧାନ ଅନଲୋଡ଼ ହୋଇନଥିବା ଚାଷୀ ଅଭିଯୋଗ କରିଛନ୍ତି । ଜଗଦମ୍ବା ରାଇସ ଇଣ୍ଡଷ୍ଟ୍ରି ସାମ୍ନାରେ ଛିଡା ହୋଇଥିବା ଟ୍ରକଟି ବୋଝେଇ ହୋଇଥିବା ଧାନ ସହ ଗତକାଲି ଜୁନ ୯ ତାରିଖ ମଙ୍ଗଳବାର ରାତ୍ରିରେ ଚୋରି ହୋଇଯାଇଥିଲା ।
ଚୋରି କରି ନେଇ ପଳାଉଥିବା ଟ୍ରକଟି କୌଣସି କାରଣ ବଶତଃ ଅତାବିରା ଥାନା ତଥା ଗୋଡ଼ଭଗା ଫାଣ୍ଡି ଅଧିନସ୍ଥ ଗୋଡ଼ଭଗା- ସୋନପୁର ୫୪ ନମ୍ବର ରାଜ୍ୟ ରାଜପଥର କୁମ୍ବେଲସିଂହା ପାଖରେ ଦୁର୍ଘଟଣା ଗ୍ରସ୍ତ ହୋଇଥିଲା । ଘଟଣାସ୍ଥଳରୁ ଚୋରି କରି ନେଉଥିବା ଚୋର ଫେରାର ହୋଇଯାଇଥିଲା । ଖବର ପାଇ ଗୋଡ଼ଭଗା ଫାଣ୍ଡି ଅଧିକାରୀ ଗଣେଶ ବାରିକ ଟ୍ରକକୁ ଜବତ କରି ତନାଘନା କରିବା ପରେ ଘଟଣା ପଦାକୁ ଆସିଥିଲା । ଏନେଇ ଅତାବିରା ଥାନାରେ ଏକ ମାମଲା ଦାୟର ହୋଇ ଅଜଣା ଚୋରକୁ ଖୋଜୁଛି ପୋଲିସ ।
