କର୍ଲାମୁଣ୍ଡା/ମଦନପୁର୧୫।୯(ଡି.ଏନ୍.ଏ.): କଳାହାଣ୍ଡି ଜିଲା ରିଷି-ରାମପୁର ରାସ୍ତା ପରମାନନ୍ଦପୁର ନିକଟରେ ଏକ ସଡ଼କ ଦୁର୍ଘଟଣାରେ ଜଣେ ବାଇକ୍ ଚାଳକଙ୍କ ମୃତ ଘଟିଥିବା ବେଳେ ଅନ୍ୟ ଦୁଇ ଜଣ ଗୁରୁତର ଆହତ ହୋଇଛନ୍ତି। ମୃତକ ହେଲେ କ୍ଷମା ବାଗ (୪୦)। ଆହତମାନେ ହେଲେ ମଦନପୁରର ଶତ୍ରୁଘ୍ନ ଭୋଇ(୩୮) ଓ ବାଲିଗୁଡାର ସଦାଶିବ ଭୋଇ(୪୫)।
ମିଳିଥିବା ସୂଚନା ମୁତାବକ, ରାଉରକେଲାରୁ ଲୁହାରଡ଼ ବୋଝେଇ ଏକ ଟ୍ରକ ମୁନିଗୁଡ଼ା ଯାଉଥିବା ବେଳେ ବିପରୀତ ଦିଗରୁ ଆସୁଥିବା ଏକ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ଫଳରେ ବାଇକ୍ରେ ଥିବା ୩ ଜଣ ରାସ୍ତାରେ ଛିଟିକି ପଡିଥିଲେ। ବାଇକ୍ ଚାଳକ କ୍ଷମାଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଶତ୍ରୁଘ୍ନ ଓ ସଦାଶିବ ଭୋଇ ଗୁରୁତର ଆହତ ହୋଇଛନ୍ତି। ଶତ୍ରୁଘ୍ନଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାପଡିଛି। ସେମାନେ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଖବରପାଇ ମ.ରାମପୁର ଏସ୍ଆଇ ଜୟଦେବ ତାରିଣୀ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାରଙ୍କୁ ହସ୍ତାନ୍ତର କରିଛନ୍ତି। ଏନେଇ ଥାନରେ ଏକ ଦୁର୍ଘଟଣା ମାମଲା ( ନଂ.୨୩୩/୨୨) ରୁଜୁ ହୋଇଛି।
