ଲୋଇସିଂହା,୧୫।୭(ସୁଶାନ୍ତ ବାରିକ):ବୟସର ଅପରାହ୍ନରେ ଜୀବନ ସହ ଲଢେଇ କରୁଛନ୍ତି ବଲାଙ୍ଗୀର ଜିଲା ଲୋଇସିଂହା ବ୍ଲକ ସଲତରପାଲି ଗ୍ରାମର ୭୭ ବର୍ଷୀୟା ଅସହାୟ ବୃଦ୍ଧା ତ୍ରିପୁରା ମହାନନ୍ଦ। ସ୍ବାମୀ କିମ୍ବା ସନ୍ତାନ କେହି ନଥିବାରୁ ଏକାକୀ ଜୀବନ ବିତାଉଛନ୍ତି। ଭାଗ୍ୟକୁ ଆଦରି ଏକ ଜରାଜୀର୍ଣ୍ଣ ଚାଳ ଘରେ ଦୁର୍ବିଶହ ଜୀବନ କାଟୁଛନ୍ତି ତ୍ରିପୁରା।
ପ୍ରକାଶ ଯେ, ତ୍ରିପୁରା ପ୍ରଥମେ ମେଣ୍ଡା ଅଞ୍ଚଳରେ ବିବାହ କରିଥିଲେ। ତାଙ୍କର ଗୋଟିଏ ଝିଅ ଜନ୍ମ ହୋଇଥିଲା। କିନ୍ତୁ କିଛି ମାସ ପରେ ଝିଅର ମୃତ୍ୟୁ ହୋଇଥିଲା। ଏହାପରେ ସ୍ବାମୀଙ୍କୁ ମଧ୍ୟ ହରାଇଥିଲେ। ସ୍ବାମୀଙ୍କ ମୃତ୍ୟୁ ପରେ ବାପ ଘରକୁ ଚାଲି ଆସିଥିଲେ। ଆଗଲପୁର ବ୍ଲକ ବକଟି ପଞ୍ଚାୟତ ଖଲିଆପାଲି ଗ୍ରାମର ଗରିବ ମହାନନ୍ଦଙ୍କୁ ଦ୍ୱିତୀୟ ବିବାହ କରିଥିଲେ। ଭାଗ୍ୟର ନିଷ୍ଠୁରତା ଦ୍ୱିତୀୟ ସ୍ବାମୀଙ୍କୁ ମଧ୍ୟ ପ୍ରାୟ ୧୫ ବର୍ଷ ପୂର୍ବେ ସେ ହରାଇଥିଲେ। ସନ୍ତାନସନ୍ତତି ନଥିବାରୁ ସଲତରପାଲି ବାପ ଗରକୁ ଫେରି ଆସି ରହୁଛନ୍ତି। ଏକ ଜରାଜୀର୍ଣ୍ଣ ଚାଳ କୁଡ଼ିଆରେ ସେ ରହୁଛନ୍ତି। ବର୍ଷା ଦିନରେ କୁଡ଼ିଆରେ ପାଣି ଗଳୁଛି ା ଫଳରେ ଘରେ କାଦୁଅ ପଚପଚରେ ରହୁଛନ୍ତି। ତ୍ରିପୁରାଙ୍କୁ ସରକାରଙ୍କ ପକ୍ଷରୁ ପ୍ରତିମାସ ୫ କେଜି ପିଡିଏସ୍ ଚାଉଳ ଓ ୧ ହଜାର ଟଙ୍କା ଭତ୍ତା ବବଦକୁ ପାଉଛନ୍ତି। କିନ୍ତୁ ସେଥିରେ ମାସଟିଏ ଚଳିବା ତାଙ୍କ ପକ୍ଷେ କଷ୍ଟକର ବୋଲି ସେ କହିଛନ୍ତି। ତାଙ୍କ କହିବା ଅନୁସାରେ ଉଚ୍ଚରକ୍ତ ଚାପ ଆଉ କେତେକ ରୋଗରେ ଶଢୁଛନ୍ତି। ବୟସାଧିକ ଯୋଗୁ କାମ ଧନ୍ଦା କରି ପାରୁନାହାନ୍ତି। ଗୋଟିଏ ଦିନ ଭାତ ରାନ୍ଧି ତାହାକୁ ତିନିଦିନଧରି ଖାଉବାକୁ ପଡୁଛି। ରାତି ବେଳେ ଅନ୍ଧକାରରେ ଚାଳ ଘରେ ରହୁଥିବାରୁ ମସା ଉପଦ୍ରବ ଯୋଗୁ ଅତିଷ୍ଠ ହୋଇ ପଡୁଛନ୍ତି। ଦୀର୍ଘ ଦିନଧରି ଅଭାବ ଓ ଅସହାୟତାରେ ଜୀବନ ବିତାଉଥିଲେ ମଧ୍ୟ ତାଙ୍କ ପ୍ରତି ପଞ୍ଚାୟତ ଓ ବ୍ଲକ ପ୍ରଶାସନର ଶୁଭଦୃଷ୍ଟି ପଡିନଥିବା ଅଭିଯୋଗ କରିଛନ୍ତି ତ୍ରିପୁରା। ବୃଦ୍ଧା ତ୍ରିପୁରାଙ୍କୁ ଉପଯୁକ୍ତ ସ୍ବାସ୍ଥ୍ୟ ସେବା ଓ ଅନ୍ୟାନ୍ୟ ସରକାରୀ ସୁବିଧା ଯୋଗଇ ଦେବାକୁ ସାଧାରଣରେ ଦାବି ହେଉଛି। ଜିଲାପାଳ ଏଥିପ୍ରତି ସ୍ବତନ୍ତ୍ର ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ସ୍ଥାନୀୟ ସରପଞ୍ଚ ଲକ୍ଷ୍ମୀ ପଧାନଙ୍କ ଦୃଷ୍ଟି ଆକର୍ଷଣ କରିବାରୁ ତାଙ୍କ ନଜରକୁ ଆସିନାହିଁ ା ଯଦି ସେପରି କେହି ଅଛନ୍ତି ତେବେ ଅନ୍ତୋଦାୟ ଯୋଜାନରେ ୩୫ କେଜି ପିଡିଏସ ଓ ପକ୍କା ଘର ବ୍ୟବସ୍ଥା କରାଯିବ ବୋଲି ସେ କହିଛନ୍ତି।
Dharitri – Odisha’s No.1 Odia Daily
